ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi ajutang akapathu Hambi koso angdengsi dolo

Danielson Bey, Diphu:
Karbi akhei along ason-ason kapathu asonsi hambi kapathu ta hako pen Karbi akhei atum pathu lo. Hako ahut ke Karbi atum kapathu kachihung pik ajoine hambi kapathu pen khei angbong penang ning arong chipi lapen kapathu penang an ahir chipi anparta kachethang dolo.
Hambi kapathu aron ateng kado kave ingdeng 22 do, laso along Su-e along kethom angdeng pen pen pulote kado kave ingdeng 25 an do. Rong ap pen pangchengsi Jir, Chalobat, Harchon, Hanthu, Har-o, Bongkejoi, Phekpi, Hapa, Churi, Langkeilot, Karchak, Karhek, Kanchong, Chengso, Mekdang, Hangklir, Pherklum, Vo-um, Vohi, Nung, Su-e, Su-e along Batur, Rabat, Bahep ta dolong.
Karbi ajutang kapathu lo puvoiphit seta non ove kimi atum laso kapathu aron atang kachinine atumsi ke-ong lo. Laso ajoine hako ahut Karbi ahamphang asong isi kachethang klong a kapathu lo seta Karbi ahamphang along pirthe adang anong kechethang akapathu football lapen kaprek-kaprek akapathu abi kijumpik ajoine hako pen Karbi ahamphang along akapathu ingbo det asonsi man lo. Angbong malom lahai kapathu avedet asonsi thek longlo.
Karbi ahamphang along pen kangbo det hambi a kapathu puthot kapachihung thuji aphan pusi Karbi Anglong Autonomous Council kaparlo Art & Culture asaikam pen kelang Karbi Traditional Music & Cultural Research Institute atum pen ritarlipsi hambi kapathu Karbi ahamphang along pareng thu lo.
Laso ahut Karbi Cultural Society atumta kilun-kekan chot kali Karbi akhei along ason-ason jutang kapathu ta rim nangji lapen pachan nangji pu mathasi Taralangso Karbi Peoples Hall along kapaman Karbi Youth Festival along ta hambi kapathu pen chenglok kaprek-kaprek jutang kapathuta pachepate lo.
Karbi Traditional Music & Culture Research Institute atum pen hambi kapathu kapachethang thuji pusi Karbi Anglong Autonomous Council Art & Culture asaikam atum pen cherapsi KCS zone atum aphan phasi hambi kapathu pachepate lo. Alanglitum pen pining aningkan nonhet jong Borjan pathu aklam along Kaman pen-pen ke ingdeng trok an alanglitum paman tang lo.
Karbi Traditional Music & Culture Research Institute pen Karbi Cultural Society atum pen jutang kapathu hampi kapachan thuji aphan kabor-i bom ke isi kemesen angthek binong lo. Seta non Karbi akhei along ta kaprek-kaprek ahamphang along ason thakthak football pen cricket anparta kaprek-kaprek akapathu abi kijumpik apor ahut hambi kapathu ajutang hamphang along panglum dun unjima puta kamatha nangji alam binong athe football, cricket, kekat kachebai, boxing, karate pen kechenglok pirthe along kachethang tang kapathu amokha along methang kereng atovar kachelong i-dun avarsai thedung khangjang.
Laso ajoine ove kimi kapathu aning kehang atumta halahai kapathu alongsi kaike aning do dun eh lapen  halahai akapathusi kapathu kachepathekji dunji aphansi aning do. Lapuson Karbi ove kimi atum methang ajutang akapathu kalidet pusi kaprek-kaprek kapathu kachepathekji aphan aning kehang dun lapen kabor-i dunta isi kemesen asai pusi non akai ke hokdet lo.
Lason ahut Karbi ajutang kapathu hambi kapathu ko-an Karbi ahamphang along pachan unji. Jongsi ahokpet Karbi jutang kapathu pachethangji pulote hambi kapathu international, national angdeng pon dun thek nangji, kali ladak Karbi Anglong arlo anvet pulote aphi ong kapathu aning kehang atum jum ong-ongji asonsi thek long. National angdeng mate international angdeng pale dun nangji pulote ladak kedo Karbi akhei pen akaprek akhei atum aphan laso kapathu than ponsi aning pahang nangji. Laso kapathu jongsi aning pahangji pulote Karbi Anglong Autonomous Council atum pen bor-isi hambi kapathu kethek atum aphan isi kereng atovar (scope) paklang thek nangji. Lapuson Karbi angbong pathuchot pulote kirim kibi aphan anke chokji seta kapachanji puke ki-unji aphan atovar thek long oh-eh.

Leave a Reply

Your email address will not be published. Required fields are marked *

March 2019
M T W T F S S
« Feb   Apr »
 123
45678910
11121314151617
18192021222324
25262728293031
Archives