ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi ajalin atum kosonsi Sixth Scheduled kachari ajakong kachepangbo?

India Independent longdet aphi ‘Excluded & partially e excluded areas’ along an aphan Sixth Scheduled aron ateng pen salajong kachechari ajakong pirep lo. Independent aprang ke Lushai Hills (non Mizoram) aphanke Excluded Areas, Mikir Hills oa-et, Khasi lapen Garo Hills aphanke Partially Excluded areas pusi British sorkar pen pangthek lo. Lahai alongri aphan British sorkar kapangri aron heihui pen pajok pondet. British sorkar pen lahai alongri aphan medu kirung apharman arpu ansi arideng chibichot. Lasi medu kirung asaiphu-Bishoya, Mauzadar heihui si pado chot. Bonta lahai alongri amonit atum alongle-phelang kachari aron lapen ajutang jubat, rong-rup kapangri kapangdaon ajakong anke ladak kedo akhei atum aridengsi pidet. Lahai a-inglong akhei thoi keche atum pen alam aki, jutang-jubat, kamatha-kajadi anta kacheprek kethedung apotsi Independent longdet Assam alongri aphan hemprek hokdet aphita amethang atum alongle-phelang, jutang-jubat, alam aki kacheraikom thekji aphan Indian a constitution along kibi pon Sixth Scheduled kachari ajakong district council pu seng pirep lo. Lasi Khasi Hills District Council, Garo Hills District Council, N.C. Hills  District Council lapen Mikir Hills District (KAAC) lo. Sixth Scheduled aron ateng District Council keseng akemang athepi ke kheiso (tribal) atum amethang atum alongle-phelang kacheraikomji aphan amethang alamki, jutang-jubat kacheraikom pen kachepangcho thekji aphan. Lasi Central sorkar kerai angnam kalidet angkang anke longle kipi keplak pen kepangri aron kapathik pen keklemji aphan District Council aphan ajakong pidet lo. LP School angdeng an methang alam pen loh kacharli avarsai mate Medium kethek anta ajakong pidet lo. Jutang-jubat, niti-nihat kapathirji aphan puta Lindok po, Habe, Pator Sarthe atum aphan ki-eh kebat ajakong pilo. Bonta akaprek Sixth Scheduled kapangri pulonang Khasi, Garo pen Jaintia alongri pen langpangbar dam lote Karbi Anglong ke Sixth Scheduled alongri kali det bonta general district asonsi cheman det lo. Bangso angthek ladak langdam sinang. Akaprek Sixth Scheduled alongri along longle-phelang kachari aron District Council pen aprang pen kapangri aron mate traditional chief Habe, pinpo atum aphansi ajakong pilo. Pulonang Khasi Hills alongri along Richo atum puthot atum aphansi longle-phelang kachari ajakong pilo. Richo atum puthot ‘RAID’ mate longri somar plak thukrei lo. Rat atum longle-phelang patta pen ajat asai anta ilitum ason ARO Circle office dam nangne. Athema ‘RAID’ akehaoi mate Lyndo atumsi lahai asai klem detlo. Jaintia Hills alongri ke ‘Doloiship’ pu alongri thak thurep. Haladak Doloi atumsi longle-phelang chari. Longle a patta kipi, kethak, keplak ajakong Doloi atumsi klempo. Kacheprek abangke Doloi atum aphanke ningkan pho pu ephong si rat pen ingvai po bonta Richo atumke kai aphansi pidet. Kopine kechokche thedung do pulote District Council pu aman padam rok un. Garo Hills alongke kur ason mate Nokma mate Mahari atumsi longle-phelang kipi-kethak ajakong kelong. Karbi Anglong ke Sixth Scheduled alongri pu mesensi Assam land policy aron atengsi dengdundet amat ladak kedo barim atum alongle-phelang angtan aso arideng pale-et. Akaprek alongri along laso kithirklong aron kipikok ajok angtan aso atum longle-phelang kacherai damji avarsai longle. District Council kilik along angtan aso vote kipi pen kilik karjap dunlonglok ta isi manghu meme binong. Athema akaprek a Sixth Scheduled alongri along angtan aso atum vote kejok dunji ta longle det. Karbi Anglong ke 1959 aningkan Kt. Chatra Sing Teron CEM arpu kedeng ahutsi angtan aso atum ladak ningkan 12 pleng lote Council kilik arjap dun long po pu aron thikdet. Bangso ajok pini arni KAAC ke Karbi atum aphan ma kalite general aphan loma pu kipu sungkrung lo. Karbi alam chekoiroksi kedamtang an aningkan Assamese Medium a school aphan ardi kipi varet ta kamatha dam un-eh akam. Pini arni akaprek a-inglong akhei atum Sixth Scheduled ajakong kelong pen ajok methang alongri longle phelang cheraikom thek pame lo lapen amethang alam aki ta chepangcho pame thek lo. Lasi ingsai dam pame lote Karbi ajalin atumke kelongtang ajakong anta kachepavir lok asonsi keklem angthek ilitum theklong long.

Leave a Reply

Your email address will not be published. Required fields are marked *

March 2019
M T W T F S S
« Feb   Apr »
 123
45678910
11121314151617
18192021222324
25262728293031
Archives