ADVERTISEMENT

This area is available for advertisement. Please contact for details.

Arnivang
Get Adobe Flash player

Assam along 21,760,604 angbong 706,489 kechengsi aphong, 503 lopunghok voter aphai

Staff Reporter
GUWAHATI, Thekar, There 11:
Kevangji Lok Sabha kilik ahut Assam along pangrumpet 21,760,604 a voters atum vote jok dun po.
Atumi There 10 arni Election Commission of India pen kilik kapangdak along Assam aphan phase thom ke Jangmi 11, 18 lapen 23 arnisi kapathik. Havar along ratchari kangtang muchot state kachari bom BJP lapen Congress angbongsi kilik chedan po.
Pangrumpet 706,489 atumke kechengsi aphong a voter atum vote jok dun po, laso angbong bang 40,47,15 pinso lapen bang 301,774 so-arlo– alangtum ningkan 18 pen 19 arta atum lo. Lok Sabha kilik along alanglitum kechengsi aphong lo vote kejok dunji. Kado kave 21,760,604 voter angbong pinso aphai ke 111,327,82 lapen 106,278,22 ke so-arlo aphai lo.
Kechengsi a phase along 756,284 voters aphai do, adunthu a phase 68,364,96 lapen kethom a phase 74,078,24 voter aphai do, ratchari lapen salajong pen kithur dun ning kachethe abangphu aphan long 28,143 polling station adimsi long vote jok po. Kado kave 1913 polling stations along ‘kasiksak’ (Sensitive) lapen long 3663 polling station along ke ‘siksak pik meme’ (Very sensitive) adim pangthek lo.
Non kevangji Lok Sabha kilik along Assam pen phai kalakha ateng 503 electorate atum ke lopunghok voter pusi pangthek lo. Saiphu atum kapachini atengke, kechengsi a phase along 158 voter, adunthu phase along 181 lapen kethom phase along bang 164 voter do pusi pangthek.
2019 Lok Sabha kilik along crore 90 atum ning chethe bangphu/phi atum vote jok po.
Kilik kapachethang amai kangni ahut candidate a criminal record kijumnei ta phong thom TV lapen birta along chepaklangji akenangsot pusi Election Commission kapangdak.
District Election asaiphu pen voter atum aphan kapathik pi kilik arni ni pho aprang photo voter slip anparta elector amohor kedo aloh keron pachetang lap nangji puta ECI pinkhat.
Aru 23 arni vote lakha po pusi There 10 arni New Delhi Vigyan Bhavan along Chief Election Commissioner (CEC) Sunil Arora pen pherangke amai kangni ahut pangdak.
Kevangji Vosik 3 arnisi kikhi bom Lok Sabha a MP aseke kijut lo. Kedamtang Lok Sabha kilik ahut Assam along Congress pen inghoi 14 an hai lo lapen BJP ratchari asong pen inghoi troksi cherai dun lo.
Non adihu det adangpi ke-en asonsi Assam ahavar ta VVPAT machine si en po. VVPAT device ke Electronic Voting Machines (EVM) cheraplok a printer lo. Komat aphansi nangli amen lapen song pen kithur dun abangphu aphan kipi ma, laso arjan a vote VVPAT devices along aloh (slip) nang cheklang po. EVM along keber pen VVPAT aloh chelakha po, lasonsi vote kejok aphai ta cheklang bom po.

Leave a Reply

Your email address will not be published. Required fields are marked *

March 2019
M T W T F S S
« Feb    
 123
45678910
11121314151617
18192021222324
25262728293031
Archives