ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi Anglong regional party amoi arbung kebop

2002 pen 2017 aningkan angbong phong trok sose KAAC, Legisalative Assembly lapen Lok Sabha kilik nangdolo. Bonta ihut isi KAAC, MLA lapen MP kilik aphongtin Karbi Anglong pen N.C Hills angkang kedongthor a regional asong  ASDC ke pini arni KAAC along inghoi isita chepahai dun thekthe det lo. Kedamtang ningkan krepho angbong aphong-aphong kilik angthek pen langdam lote ASDC asong aphi-ong ajakong nangjum ong ason si klang lo. Ratchari asong kangtang-kangduk ke rat atum aling. Rat atum cheto dun lote ingtangpo jongsi cheto dunde pulote ajakong nangbop detpo. ASDC atum ahok alam chini nangji apotlo. Ratchari asong kilik along kerem kehai ke aron lo. Bonta rat atum dodunthip pulote nangkachingthurthuji aphan joike. ASDc asong lason kalidet asonsi theklong. Aphi-ong rat atum che-o dun ong asonsi angthek klanglo. Songja atum bonghom ason arengpu chepangtang chotlote ahok alam chinidam delo. Kopi dosi ASDC along rat atum kache-o dun-et pu ahok alamthe songja atum munthi pamera kechokche adim kachepachok, kachepakengji aphan klemkle pulote ASDC asong aphrang asonthot ajakong kachelang thuji un-e detpo. Rat atum kopi athesi che-o dun bom? Alamvoi ke lahelo. Hajat asong non songja aphan nengkachithe dam pensi rat atum cheto dunji. Ihut isi Karbi arat akar-i ahemprek kachesong aphuthak Congress asongja atum aphan ningkethe avedet apotsi rat atum ovekimi, kethek muchot pu ASDC asongja atum aphan nengchethe dam thulo lapen cherap-cheto dunlo. Rat thurpak ajakong aphanke sorkar ta mathanangkok pu angthek ilitum angthek thek longlo. Rat ajakong aphan phere duk apotsi asai jokje pen 1995 aningkan MoU anke chettok longlo. MoU alamdon chetokte ako KAAC ajakong ko-ando ilitum chinihur lo. Bonta ASDC asongja atum angbong kopine  ratchari kamatha (Political ideology) kachetonte alam pen lam kachihili cheng lo. Aphi anke kachetonte nangthebom amat songja angbong chekak phun ajok atoi ta chethak dak amat ajakong chepajumdet lo anke kilik aling alongta nanghai dun un-edetlo. Aphong-aphong kilik kerem aphi rat atum ASDC asong aphan nengkachithe kave atum aphai nangbatbom amat akaprek asong along cheto dunbomlo. Kechengke ASDC ejahak asongja atum hemprek kehang alam apar CPI-ML kapangdangji aphansi bor-i rong pusi alamklang lo. Bangso alam angkur kave pin ke kali. ASDC along CPI-ML nang palutchok pu alam pensi songja pen atoi atumta pratjamlo. ASDC atoi atum angbong CPI-ML aphan kedeng kangtungte atum ongdung. Pupe asonte ASDC nonke HSDC isivet chingrum thudet aphike rat atum cheto dun nangji apotlo. Ahok alamke non kedobom ASDC asongja atum aphan rat atum ningchithe dam adim avedet. Ningkachithe dam kave apotsi hai un-e-e pura rat atum pine pina avarsai chelong dunji bon pura kehaimeme jatsimetke National Party along kilik ahut chengbe dun lap titi lo. Bonta isi ahok alam kachini nangji do. Karbi atum angbong aneng aso pen regional party helo kime pu kekroi atum dolang lapen kekroihip atumta do-o lang. Tangka-maha kadure angbongta kilik ahut vote kelong aphai do-o lang. Lake  khei kachinghon atum aphan neng pachithe-i dam meme alam binonglo. Bonta songja atum “arpong along ketok alam’ (the writing on the wall) chini nangpo. Rat atumke non kedo bom asongja atum aphan anengchithe damdelo. Songja kimi, jakong kimi lote aphrang phrang pen kekroithip ASDC atoi atum aningkethe dosi cheto dun thupo anke song ajakongta ingtangthupo. Kilik ahut hemprek alam ningjechotchot, thangnat keklem angthek paklangthekthesi netum helo ahok hemprek kehang atum pu ningjekong chotke rat atum kroi ingtungte lo. Bangso angthek kilik aphong aphongsi nangklang lo.

Leave a Reply

Your email address will not be published. Required fields are marked *

March 2019
M T W T F S S
« Feb    
 123
45678910
11121314151617
18192021222324
25262728293031
Archives