ADVERTISEMENT

This area is available for advertisement. Please contact for details.

Arnivang
Get Adobe Flash player

46 angdeng KSA ningkan esek amaipi mesen pen kapachun

Bijoy Bey meiphu lapen Thangsing Timung sankur chunbang keman

A Correspondent
Diphu, Thekar, There 10:
Karbi Students Association (KSA) tiripi atum kedamtang There 7, 8 lapen 9 an ni thom apharman Chokihola Sanglang Aklam along ingdeng 46 ningkan asek amaipi mesen kapachun.
Kecheng arni pharman bangphu atum aphan men kachethap, kedo abeha amokha kangpu lapen subject committee amai KSA tiripi ameiphu Bijoy Bey ingpu lo.
Adunthu arni KSA tiripi ameiphu Bijoy Bey arideng KSA alama pachipur lo. Laso aphi KSA sankur chunbang Moniram Tokbi pen jalinsi karlitang atum aphan chikimo lo. Laso aphi pharman bangphu lapen charli osomar atum angbong kachingki-chingvai amai pangni lo.
Atumi There 9 arni adap apor Thong Nokbe kekat, hirjir kihir chepate, lun kelun lapen kaprek-kaprek akapathu chepate lo.
Anerlo porphai 2 apor pen rat amaipi pangni. Meiphu Bijoy Bey kachepahemphu amai along rap chunbang Thangsing Timung alohi kapachini apor en. Alohi sarpo aman pen KLA ameiphu Suren Kramsa, man-peng alohi KAASDCOM ameiphu Ajit Timung, KLNLF chairman P. Dili, KAASDCOM chunbang Sing Timung, HTL convenor Saising Rongpi, gold medalist AFMG Pokhila Ingtipi, KCS Nilip Havar Amei ameiphu Suresh Tisso lapen kaprek-kaprek song ameiphu-chunbang atum chetong dun.
Mai along chetong dun APMG gold medalist Pokhila Ingtipi kejai ke ‘alangli aprangsi KSA atum aphan kachoro pajir’, ‘Alangli non kithurmi ove kimi ariso-nimso atum aphan kapathu ahin chepaduk pen aleh kelong alam klardak pen than pajirmi lapen alang lapuson angdeng an pini kele dun alam mai along chethan pajirmi.
Lason thakthak kachetong dun alohi sarpo lapen chopha alohi atum penta Karbi ariso-nimso atum kopusonsi loh charli anathu paprang nangji, methang jutang-jubat, alam-aki, methang khei kachinghon nangji alam heihui aphuthak lamthe jai rinti.
Apor keme ahut Rengma Cultural aterank atum jutang kekan paklang lapen kijut lotun ajo along nong nam kachethang klong lunsepi Joyti Terangpi lapen ari asangho atum pen jumesen-jumesen alun lunsi ingdeng 46 KSA ningkan asek amaipi alir-alon pen pachun lo.
Ingdeng 46 KSA ningkan asek amaipi along arpu KSA kapachariji aphan pusi arpu kimi chingvai lo. Laso ateng Bijoy Bey aphan puthot KSA ameiphu lapen KSA rap chunbang Thangsing  Timung aphan akimi KSA sankur chunbang arpu pek lo. Laso along kaprek-kaprek KSA arpu amokha ta chepek lo.

Leave a Reply

Your email address will not be published. Required fields are marked *

March 2019
M T W T F S S
« Feb    
 123
45678910
11121314151617
18192021222324
25262728293031
Archives