ADVERTISEMENT

This area is available for advertisement. Please contact for details.

Arnivang
Get Adobe Flash player

Sika lakh 26880.50 kelong angbong pen Sika lakh 32297.80 an kapadamji aphan KAAC Budget kedeng

Staff Reporter,
Diphu, Thekar, There 6:
Pini There 5 arni pen kapangcheng Karbi Anglong Autonomous Council atum phong 233 KAAC budget Session pini There 6 arni adap apor kapajut.
Karbi Anglong Autonomous Council a CEM Tuliram Ronghang pen 2019-20 dihin aningkan angbong kapadamji lapen kapalongji aphan session along budget paklang lo.
Laso ahut kado kave kelong aphai Sika lakh 26880.50 angbong pen Sika lakh 32297.80 an kapadamji aphan jong lo. Laso ajok kado kave Sika Lakh 5417.30 atangka kachilut mate kapapleng nangji dokok lo. laso ateng pini kado kave chingvai chingsai pen kado kave MAC atum angbong chedonsar pen deng det lo. 
Ilitum methang kelong akrong pensi lahai atangka pavangpo, laso along kachariji aphan State ratpangri lapen India ratpangri pen nang kapale kerap atangka (grants-in-aid) pensi longlo. Council atum jasemetpet Forest Product, Entry Tax, Professional Tax, Trade callings lapen employment, Land Revenue, Motor Vehicle Tax a share, Weekly Markets kejor, Ghats, Fisheries, Cattle Pounds heihui pensi medu longlo. Akaprek kelong akrong ke District Council kejor, Court Fee Stamps lapen Mines & Minerals Royalty heihui hen lo.
Council Sector pen medu kelong jumhet khangjang puke klang dak lapen kachekrong nangji alam binong. Head of Accounts – 013 kaparlo Forest hen lo seta kedamtang 1995 aningkan Supreme Court pen Forest pen kelong ahormu aphuthak kanghap chek ajoine medu kelong nangji anta longle det lo. Seta Karbi Anglong District kaparjap ahut penta ingnam pen hen lo kapavang krong kethenai ke puta Session along CEM Tuliram Ronghang jai. Forest pen akaprek a medu kelong ke ning oi meme asonsi thek long.
Lahai kedorde kapaplengji aphan Trading Licenses Fee, Transfer Fee on Land Transaction lapen kaprek kaprek abeha along medu ke-en kapabatji phan matha lo puta paklang. CCI, Motor Vehicle Tax, Land Revenue Working plan ateng pen thengpi abeng heihui atum pen Royalty lapen taxes kelong nangji thedung lang. Lasi lahai kapalong vekji aphanta jai.
Administrative Charge lapen Motor Vehicle Tax along pen-pen Sika Lakh 3900.00 anbak State ratpangri a preng kelongji aphan ning chepathe lo.
Sika Lakh 32297.80 atangka
2019-20 dihin aningkan kapadamji aphansi thik lo lapen laso atengsi session along paklang lo. KAAC pen kejong kaprek kaprek kelong akrong ke, Council’s amethang jongjung pen Sika Lakh 5230.50, State Govt. pen GIA lapen Administrative anam Sika Lakh 21650.00 jong lo. Lahai kado kave pangrumsi sika Lakh 26880.50 kelong aphai session along paklang pen cherai lo.
KAAC kaparlo Finance, Taxation, Land Revenue, Forest lapen kaprek kaprek medu kelong asaikam atum pen kepadam lapen kapalong kapachetongji aphan keklem nangji asai do-an ke klem et lo.
2019-20 Council Budget along jasemetpet kejong ke, Supreme court pen kanghap dokok aphita tame to Head of Account – 013 – Forest pen Sika 1619.00 jong lo. Council pen laso a budget kejong ke Land Revenue, Mines and Minerals, Road & Transport Services along akenangsot kave amedu kapajumji aphan lo cherai lo.
Land Revenue along English alam pen KAAC Land Periodic Patta kaselamji aphan Sika Lakh 50.00 deng lo. SGB a coat keroiji aphan Sika Lakha 20 deng lo.
Public Works along kethedung asai keklem sika lakhs 680.00 lapen Constituency Development fund aphan Sika lakhs 390.00 deng lo.
Pension lapen akaprek Retirement ahut kelong nangji ale aphan Sika Lakh 100.00 deng lo. Laso along KAAC amember barim atum aphanta laso atangka pensi pension pipo puta cherai lo.
Education asaikam ahin ke, laso aningkan angbong West Karbi Anglong apharman Primary Education asaihem pangnipo lapen ahempi Hamren alongsi pangni po puta cherai lo. Sika Lakh 5.00 atangka GIA to Centre for Studies in Karbi Language and Culture aphan pipo puta cherai lo.
Art & Culture, Karbi Youth Festival along kipi dunji aphan Sika lakh 50.00 lapen Karbi Lammet Amei aphan Sika lakh 10.00 panong pi lo.
Urban Development ahin Municipal pen Town Committee atum aphan kipi dunji aphan kado kave sika Lakh 200.00 atangka cherai lo.
Information and Technology asaikam mesen pen kapadam thekji aphan Machinery lapen kaprek kaprek kenangji ahomri kenam thekji aphan pusi Sika Lakh 45.00 cherau lo. Natural Calamities ahut kerap kipi dunji aphan kado kave sika Lakh 50.00 cherai lo. Seh kechelang along kerap dunji aphan Sika 50.00 atangka panong lo.
Minor Irrigation apharman Sika Lakh 10.00 atangka jong lo, Road & Bridges aphan kasolokji aphan kado kave sika lakh 50.00 ansi panong lo. Laso atangka pensi aban atovar, dolong heihui salok po puta cherai lo.
Karbi Anglong Autonomous Council a chokomar atum aphan Loans and Advances kipiji aphan Sika lakh 50.00 atangka panong lapen hem kachikimji, motor cycle kachenamji atum aphan Sika 15.00 panongsi loan kipiji aphan cherai lo.
Atumi Karbi Anglong Autonomous Council a CEM Tuliram Ronghang I/C finance kapaklang ateng pini Session adunthu arni kado kave alam lang ingthi pamesi cherai det lo.

Leave a Reply

Your email address will not be published. Required fields are marked *

March 2019
M T W T F S S
« Feb    
 123
45678910
11121314151617
18192021222324
25262728293031
Archives