ADVERTISEMENT

This area is available for advertisement. Please contact for details.

Arnivang
Get Adobe Flash player

Diphu Poetry Festival ingdeng hini talonji: JLF

imageStaff Reporter,
Diphu, Thekar, There 6:
Non kevangji There 20 lapen 21 pani ni apharman Diphu Matipung Aboretum cum Craft Centre along ingdeng hini Diphu Poetry Festival katalonji aphansi hot lo pusi pini District Press Club of Karbi Anglong along pherangke amai kangni ahut Jambilee Literary Foundation a chunbang On Teron pangdak.
Ingdeng hini Diphu Poetry Festival kapachunji along Karbi Anglong Autonomous Council pensi cherap dunji puta pherangke amai along pangdak. Ingdeng hini Diphu Poetry Festival along Multi Lingual Poet’s Meet, temo kethan, hirjir kihir kachepate, arlosomar atokbang atum amai, anong kachethang klong tokbang atum pen chingki-chethan, loh pharchap kangpu, hirjir aphuthak saikulat, kethek-kere lapen pherangke atum pen chingki-chethan, okkarjang (Youth) tokbang atum amai, hirjir aphuthak saikulat, adim along amat hirjir kihir kachepate lapen kado kave hirbang atum hirjir kachihir apor heihui ni ni arong-aje along doji puta pangdak.
Laso amai along Padmashree Prof. Rongbong Terang pen chenglok Karbi Anglong arlo kedo anong kachethang klong tokbangpo, tokbangpi lapen kethek kere abangphu-phi atumta chetong dunji pusi mai along JLF a chunbang On Teron pherangke amai along jai.
Arunachal Pradesh along anong kachethang klong ahirbang Dr. Jamuna Bini, Sahitya Akademi anong-eh kedeng abangphu Dr. Homen Borgohain atumta mai along chetong dunji anparta tokbang atum amai along Karbi Anglong Autonomous Council a CEM Tuliram Ronghang ta alohi sarpo aman pen chetong dunji puta pherangke amai along pangdak.
Pherangke amai along Karbi Anglong Autonomous Council a EM barim mate JLF a bidisar Surjyo Rongphar chetong dunsi JLF pen kapatirpiji ingdeng hini Diphu Poetry Festival along Karbi Anglong arat do-an lapen kethe-kiding man kedo atum kacheto dunji aphan choningri.
Pherangke amai along JLF meiphu Welsing Hanse, Helvelyn Timungpi pen kechenglok kaprek-kaprek Jambilee Literary Foundation ajabang atum chetong dun.

Leave a Reply

Your email address will not be published. Required fields are marked *

March 2019
M T W T F S S
« Feb    
 123
45678910
11121314151617
18192021222324
25262728293031
Archives