ADVERTISEMENT

This area is available for advertisement. Please contact for details.

Arnivang
Get Adobe Flash player

Katharle lapen rat arpu

Karbi Anglong angkang ahoi nangkepet pen alongle nangjumbom puke asitin ratchari asong le Karbi Anglong Autonomous Council (KAAC) nangchari seta alamsi ningje chot titi, bonta kedamtang aphong (Term) Tuliram Ronghang CEM kekhibom ahut pen non an ke katengkhengdut pu dolo. Lapuson aso asa abang ke aprang-prang ta kerai ingnam arlo kedo pupen ta katharle dolo lapen methang hijan angbong aphanta ha Lumding atovar 5 km malom ta dolo, seta thetan pen pu abang ke non Langkaijan katharle dam ta isi lo. Phurkimo langdam pulote ha 2004 aningkan Khorsing Ingti CEM kekhi ahut Misibailam mate ha Dhonsiri kedai Doldoli kerai ingnam Paipai achiklo katharle ahut ta Naga atum pen kache-ap inut magistrate Dipankar Das pen inut police apran dam lo. Laso ahut bang kep atum hile amu kero pen areng keso ta dolo. Lapuson an alam kethe aphi ta Naga atum longle ahoi nangkepet ingtontesi masap-masup ahoi abang ke nang ingdoi bom. Seta 2014, 2016 aningkan There lapen 2017 aningkan Dimapur kedai ta ko an lone Karbi Anglong Police pen Naga atum hile kache-ap ahut, jasemet pen hamphang asong atum ke dunvek-vek lo. Bonta longle nangkacherai lapen soluk-sodak atemon kejap abang ke lapu ingsamdem lo puke pini arni ta ave, seta kejapjir asonke kaike ta do. Lapuson ha block I pen II ke chethan jokplot lo seta halapu anat ke pini arni ta abatai-batai katharle dam pathetan puke ave lang. Non lahai aphurkimo langdam pulote la non ason ephong tharle dam pen doklip ke thang ale ave. Nagaland ahoi pen Langkaijan ke cheprek chet seta akisung lapen akasiksak kevangji ke isivet lo athe Nagaland ahoi ason-son ke katharle pen puthot arni pen amat hile rongrang pen nang ardong thu lipo titi. Lasonsi ha ahin-ahin ahoi malom aprang-prang katharle tang adim thek longbom lo. Lasonsi hithi arlo lapen ratpangri alongle kacherai-kithi, Diphu adung Arboratum & Craft Centre adung pen amat ta thek longhur lo. Lake ajir kiding alam ta kalilo. Lapuson ke ha Dhonsuri kedam atovar Central Forest Range adung malom katharle ta puthot bang chedo thuthip. Lasonsi Lumding atovar ari Sericulture alongle pen danglok konat ma katharle puthot cherailap titi. Bangso ajok ahoi malom alongle ta tharle nak titi lo lapen Diphu ahithi pen danglok Karbi Anglong arlo ratpangri (Government) alongle anta rat cherailap lo. La anchot ta kali lahai alongle arleng kethe lapen jakong kedo atum pen amatsi kapangcheng ajok patta anta longlap titi lo. Lasonsi hala ahoi malom ke methang amonit atum amatsi chojor po lapen latum amatsi raidun po titi ajok patta anta latum longlok titi lo. Non hala Dimapur kedai Lahorijan malom ke town si cheman thu ronglo. Lapuson kachelar ke Dillai pen amatta thek longhur lo.
Non lasi kedamtang phurkimo pen ili kacharli, kachini lapen kachelar kenangsot thepik an lo kali lepute Karbi Anglong alongle non ta ko an ma map along kedo, jongsi pun pame pulote laso ateng ke ave tanglo. Lasi non abang ke katharle tang adim kelang kerui (Review) klemver nangji lapen keklem kirui (Follow up action) dover nangji, seta non ateng Forest atum keklem ke chokche athe ke-ongdung saikhi atum ke bang aphan akoi arvak pen amethang ale aphansi chematha rinti. Lasi kachelar ke Forest saikam pensi pangcheng nangji lapen laso aphi ke Revenue saikam lo. Laso along rat ta kamatha aning kachelar thepik an nangji lang athe rat along ke penang an atum akechokche ajoksi kisung nang, lake jakong kedo arat atumsi keklem ke-ong.

Leave a Reply

Your email address will not be published. Required fields are marked *

March 2019
M T W T F S S
« Feb    
 123
45678910
11121314151617
18192021222324
25262728293031
Archives