ADVERTISEMENT

This area is available for advertisement. Please contact for details.

Arnivang
Get Adobe Flash player

Longle aphuthak J.I Kathar ke ahokhe alamsi kapachetak: ASDC

Staff Reporter,
Diphu, Thekar, There 4:
Ningkan thongkep sose ratpangri along chokamar klemdet aphi MP, MLA , MAC kemanji aphan akemang pen Assam ratpangri a chunbang barim J.I Kathar Autonomous State Demand Committee atum aphan anong kejo thap asai keklem. Madu MP, MLA, MAC man long, laso along ASDC pen thangta kipu dunji alam ave, amethang ale kelongji akemang pen rat aphan kapamanghu asai keklem lapen adai kave arat aphan kapalu asai keklem aphuthak aprang penta ASDC ke khamkhe lapen kevangji arni khamkheji.
Longle ajakong bang aphan kipi (‘Alienation of Land’) ke longle kacheraiji aphan isi Constitution aphuthak J.I Kathar kechokche alamsi paklang lo. Alangli kipu atengke, Alien pu angtan amonit lapen alienation pu laso ajakong angtan amonit aphan kipi. Laso aphuthak dictionary alamthesi paklang lo. Laso arlo kado kave pangrumpet along kopisi kedo aphuthak ke alangli kaprek ahinsi pondet lo. Alangli ningkan 30 sose kachari asai keklem tang ajoine lapuson alangli klem thekser tahai. Seta alangli thekser pu aling ke amethang ratchari ale kelongji aphan pura adai kave sankur arat atum aphan chongthui nangne. Alangli kapaklang longle ajakong bang aphan kipi pu alam ke thangta kali, lake kapachobai alam chot.
‘Alienation Of Land’ ke India constitution pen state ratpangri atum aphan longle ajakong kipi avarsai chot. Laso aphuthak Seventh Shedule a List-II along No.18 a list along tok lo. Laso along longle aphuthak kaprek alamta tok pon lo. State ratpangri atum pen longle aphuthak ajakong alam list-II No. 45 along longle amedu, kalakha, medu kirung nangji, longle aphuthak kirim kibi nangji, medu aphan longle alakha ke-en nangji lapen Alienation of revenues parlo lo.
Laso ateng kado kave ta kedamtang 1994 aningkan anke longle angtan monit ahan kipiji ajakong state ratpangri aridengsi dolo, aphi 1995 aningkan MoU kachetok pen Constitution amendment Act 1995 ahut Sixth Schedule pensi Sixth Schedule Paragraph 3-A (I) (o) palut dun lo.
Sixth schedule pen laso apot kapalut dun ke Karbi Anglong Autonomous Council atum longle aphuthak ajakong kedoji aphan lo, lasi non ke Karbi Anglong Autonomous Council atum aning kehang alingsi longle aphuthak aron selam un lo.
Kaprek-kaprek aphong Kathar asangho Constitution along kedo 1950 a sixth schedule si kenangji, athe lake ajakong thepik pusi kaningje, seta lake ahok alam kali pusi Autonomous State Demand Committee atum jong. Lasi sixth schedule along kedo ajakong anvet ke inglong aso akhei lapen inglong aso atum along kacheraikom i-ji aphan dorplup kali. Seta laso aphuthak J.I Kathar kalile anatthusi rat aphan paklang lo. Inherent powers lapen sixth schedule asai amokha Karbi Anglong, West Karbi Anglong lapen Dima Hasao arat atum aphan akaprek ahinsi than rong lo.
ASDC atum Alienation of Land ajakong lapen Constitution a Seventh schedule a List II a state list along state ratpangri ajakong do-ansi hang bom lo lapen Inner Line Power ta ASDC hang lo. Seta Congress, BJP, CPI(ML) atum kedokok ajoinesi kedamtang 1995 aningkan MoU kachetok ahut laso akemang chun un-eh det lo. Ahok halaso ahut kemang ateng ASDC pachun un-eh det seta state pen ajakong jumchet an ajakong ke van lo.
Karbi Anglong arlo det adang kihuplup ratchari asong lapen kaprek-kaprek hamphang anparta ratchari asong atum hako penta state alam ningje lo seta pini arni an achiso ajakong anta palong thekthe det lo. Lasi kemang ateng state kapalongvekji aphan Karbi Anglong, West Karbi Anglong lapen Dima Hasao District arat do-an atum vangnoi chesong rappet lonang puta ASDC atum jong pusi ASDC chunbang Jotson Bey pachetak.

Leave a Reply

Your email address will not be published. Required fields are marked *

March 2019
M T W T F S S
« Feb    
 123
45678910
11121314151617
18192021222324
25262728293031
Archives