ADVERTISEMENT

This area is available for advertisement. Please contact for details.

Arnivang
Get Adobe Flash player

Langkaijan ahavar aronre kapathir atum aphan adunthu arni katharle; kado kave hum 554 ahem kipri

imageStaff Reporter
Diphu, Thekar There 4:
KAAC CEM Tuliram Ronghang lamtoi ateng Langkaijan ahavar along aronre longle kacherai adim long pini adunthu arni katharle dam. Adap apor pen law and order atum cherap-cheto dunsi Forest asaikam pen Land & Revenue asaikam ARO Tarun Ingti atum pen-pen ahoi kapangthekji aphan pura GPS kelang ateng pensi hadak aronre ahoi along kikim ahem amokha kipri asai klem lo.
Pini adunthu arni katharle ahut hum 554 anbak ahem paru tekang long lo. Katharleji aphuthak thangnat  kapachini aloh ta nang palele, anparta nelitum ke Hojai district arlo sido lapen voter ID pen chenglok Hojai district aratchari atumsi nang pilo, la-an chot kali Hojai district pensi langtuk ta nang hut pilo. La-an chot kali hemso kikim do pusi haladak aronre pen kedo atum chethan.
Pranprilangso adong henlo Karbi Anglong pen Hojai district ahoi angthek lo pusi chethan lapen hadak piller ta do pu kethan ateng pherangke atum pen-pen adim along anta humri dam.
Piller along ketheklong ateng pulote ke Forest atumsi kesom seta KAAC Revenue pen kali. Anparta alangli atum kethan thu atengke nelitum aphan Karbi arong asar (GB) atumsi ajahak ahavar nelitum aphan longle pen tangka kelar, lata ari pensi kejong. A chiri kali anglong pensi sika suri pho-trok atangka pen nangjor lo puta jai. Lasi pini aronre pen hem kachikim katharle asai along Hojai district pen majok ta vangve seta Karbi Anglong pen SP, DSP, ARO, Forest achokamar atum anta katharle along dun lo. Pinpurme, adap katharle kecheng ahut Karbi Anglong Autonomous Council Land & Revenue EM Amarsing Tisso ta dun.
Langkaijan ahavar along aprang penta aronre longle kacherai do pu nelitum chini lo. Laso ateng aphong-aphong pachini lo lapen latum kapachini aloh longle pule ningje seta netum ahin pen ke kapachini aloh pi-et lo. La-an chot kali kapachetak puseta kedamtang ningkan isi aprangsi pensi pachini lo. La-an aphita alanglitum kacheterekre det ajoinesi katharle asai klem nangkok lo pusi Phuloni Revenue Circle a ARO Tarun Ingti jai.
Pini an ni ni plenglo seta jongsi tang un-eh pulote kevangji arni anta katharle asai klem bomji puta alangli ningje.
Addl. SP kaningje atengke, nahok penta soluk soluk-sodak ave lang, seta sector 4 ahoi along amat katora doji angring do. Netum keton-kelang aphansi vang lo. Laso ateng netum ton lang dun bom lo.
Langkaijan along prapjin pen Border Police Outpost pangni dampo lapen katharle asai non kevang There niphai 10 aprang patang vekji pusi Karbi Anglong Autonomous Council a CEM Tuliram Ronghang ningje.

Leave a Reply

Your email address will not be published. Required fields are marked *

March 2019
M T W T F S S
« Feb    
 123
45678910
11121314151617
18192021222324
25262728293031
Archives