ADVERTISEMENT

This area is available for advertisement. Please contact for details.

Arnivang
Get Adobe Flash player

Semson Sing Ingti karli arni ASDC, KSA, KNCA chelangpet kachikimo

imageStaff Reporter,
Diphu, Thekar, Thangthang 28:
Pini Thangthang 28 arni Autonomous State Demand Committee, Karbi Students Association lapen Karbi Nimso Chingthur Asong atum chelangsi Karbi Anglong ahempi Diphu pen chenglok Karbi Anglong angkang along-along adim kachikimo.
ASDC, KSA lapen KNCA atum Diphu ASDC tiri amei asaihem along pen kechenglok Hamren, Baithalangso, Donkamukam, Kheroni, Dolamara, Bakalia, Tarabasa, Dokmoka, Dengaon, Howraghat, Hidipi, Bornewria lapen Chowkihola heihui adim along Karbi Anglong kikim tekang abangphu Ru Semson Sing Ingti karli arni chikimo dun. Semson Sing Ingti keklem kachepaduk asonsi keklem kachepaduk pen Karbi Anglong lapen North Cachar Hills atum hemprek chelongle tik an kachesongji aphan seme deng lo.
Pinpurme, Karbi arat apharman district kehang kachesong piji aphan pusi Semson Sing Ingti kemesen a chokamar anghoi sub inspector of schools anghoi che-oh lo. Ahok alangli aporpe arong akachevoi jui ajok alangli kereng un ahut Karbi Anglong district selam patang un-eh det lo, seta alangli keklem tekang amo 1951 aningkan Karbi Anglong district selam lo lapen 1952 aningkan Karbi Anglong a Autonomous Council ta selam lo. Halaso ahut ratchari atemon ta Semson Sing Ingti kangthur tekang district kehang kachesong aphan dip un-eh det lo.
Kachipidet, khei kachinghon lapen ingthirjir pen Semson Sing Ingti keklem ason keklemji aphan ASDC, KSA lapen KNCA asongja atum pini Semson Sing Ingti karli arni seme deng lo.
Diphu ASDC tiri amei asaihem along arnisi apharman kachikimo asaimo adap apor KAAC chairman barim Daniel Teron lama pachipursi saimo pangcheng lo. MLA barim Hemsing Tisso jalinsi Semson Sing Ingti aphan chikimo lo. Laso aphi kachingki-chethan amai ingni lo. Mai along ASDC ameiphu Holiram Terang, CEM barim Jotson Bey, Chandra Kanta Terang lapen Chomang Kro atum chetong dun.
Semson Sing Ingti akai alamo lapen ratchari along keklem-kedam anparta alangli khei aphan keklem kachepaduk alam heihui Holiram Terang pen Jotson Bey atum than pajirmi lo. Non apor ove kimi atum Semson Sing Ingti kejalin akengkam kachejor dun nangji akenangsot lo pusi ASDC pachethang chunbang Daniel Teron birta pachetak.

Leave a Reply

Your email address will not be published. Required fields are marked *

March 2019
M T W T F S S
« Feb   Apr »
 123
45678910
11121314151617
18192021222324
25262728293031
Archives