ADVERTISEMENT

This area is available for advertisement. Please contact for details.

Arnivang
Get Adobe Flash player

‘Non Meghalaya MDC kilik ahut vote kapajokje detji aphan ta bitung atum pare tekang’

Ahoi kedai ahavar along CYDC pen KSA atum kelangchari dam

imageSpecial Source
Diphu, Thekar, Thangthang 28:
Kedamtang Thangthang 26 arni Chinthong Youth Development Committee (CYDC) pen KSA Chinthong along aro do an atum chelangsi Upper Chinthong Meghalaya ahoi kedai ahavar Umlapher angkang anparta kaprek-kaprek school along kahumri dam.
Laso ahut Umlapher pen Umchiken an PMGSY central saideng (scheme) pen kaselam bom atovar ta alanglitum lang tekang lo. Upper Chinthong pen Lower Chinthong adak ko-an arni pen lone Chinthong ahavar arat atum kacheleng katora chechak nanglo, bonta non apor EM Prodeep Rongpi aning keme mate Chinthong arat aphan kachinghon ajok Umlapher pen Umchiken adak aphan PMGSY a saideng hang dunsi tovar kapaselam apot CYDC atum kachoro pajir lo, seta ningduk meme alam ke, laso atovar kaselam a contractor aning klarsap kalidet ajoine culvert selam pameme det lo. Kaselam ahut sangti, arlong lapen cement kapangvui kapachingbarbe det ajoine tangdet pen chiklo jon ni-jon thom angbong inghang et lo.
Laso aphuthak pini nelitum CYDC-KSA chingrum petsi sai kelang dun arpu kedo Manager Podum Sharma aphan chetong kangsi culvert akimi cheselam thu vek nangji pu toi tekang lo. Alangli ta cheselam vekpo pusi nang chechak dun lo. Km 26 keklem nangji adim Km 23 si alanglitum klem chot. Laso aphuthak ta nelitum ahin pen sodak pen a contractor aphan pinrem tekang lo lapen Km 26 an keklem chepatangvek nangji puta nelitum sodak pachini tekang lo pusi CYDC ameiphu Kamsing Rongphar birta nang pale.
Laso aphi Rongmandu LP School along ta humri damsi hadak osomar aphan non anta uniform keronre lang lapen mid day meal pipe lapen kitap ronre lang pusi chini dam lo. Lasi prapjin osomar atum aphan kipi nangji lapen keron nangji ason do-an kipi serakji aphan pachini tekang lo.
Laso aphi pini Thangthang 27 arni Meghalaya MDC kilik vote kejok arni pacheton dunsi ahoi kedai kedo Karbi Anglong asorta aronre voter ID cheselamsi vote jok dunver atum aphan vote kapajok dun longle detji aphan kekhang dunji aphanta pare tekang lo. Kijutsi non Umlapher Rengsibon aklam along mini stadium kaselam bom adim anta pale damsi sai keklem along lang dun lo puta CYDC ameiphu Kamsing Rongphar birta nang pale.

Leave a Reply

Your email address will not be published. Required fields are marked *

March 2019
M T W T F S S
« Feb    
 123
45678910
11121314151617
18192021222324
25262728293031
Archives