ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi Anglong Autonomous Council pen ingdeng 71 Ru Semson Sing Ingti karli arni kachikimo

imageStaff Reporter,
Diphu, Thekar, Thangthang 28:
Pini Thangthang 28 arni Karbi Anglong Autonomous Council atum pen Karbi Anglong District kapalong abangphu Ru Semson Sing Ingti karli arni kachikimo.
Kachikimo asaimo ateng todap porphai 8 apor  Ru Semson Sing Ingti memorial Park akimi along kedo Semson Sing Ingti akumlin along mir alek arvak dam lo. Laso aphi porphai 8:30 apor Semson Sing Ingti Memorial Park aban along kedo atumi CEM Tuliram Ronghang arideng pen kangpu Semson Sing Ingti akumlin aphanta mir alek arvak dam lo.
Laso aphi porphai 9 apor arnam kardom amai pangni lo, laso ahut, Kahoron (Kataram)
Geeta Path, Bible kaporhi, Guru Granth, Quran kaporhi, Kirtan Path, Lokhimon akardom asai deng lo.
Karbi Anglong Autonomous Council kaparlo Traditional, Music & Research Institute atum pen “O Semson Nangkai pen” pu alun along kekan paklang lo. Laso aphi mai along kachetong dun kaprek kaprek alohi atum pen Semson Sing Ingti akai alamo aphuthak kachikimo amai along jai.
Laso aphji porphai 10 apor pen Karbi Anglong pen West Karbi Anglong map arjan kihi arta 8 pen 12 atum aphan pachepate lo. Laso aphi arnikangsam porphai 5 apor Semson Sing Ingti kachikimo asai pajut lo.
Pinpurme, Semson Sing Ingti, amahang
kethek Thangthang 8,1910 aningkan Tika Anglong. Bonta alangli kai kethe-kiding ke Golaghat ,Sibsagar District. Alangli ningkan hini arta kepleng aphijong pen dhorom kapachethang apharman apo-apai along Golaghat vangjui lo.Golaghat Missionary School alongsi alangli toklang charli dun cheng lo. 1920 aningkan alangli L.P School angdeng asatlang aphrangsi angdeng ki-un anparta scholarship anong-eh chepalong dun. High School angdeng aphan Golaghat Bez Barua High School along charli dunsi 1928 aningkan kep angdeng toklang asatlang alongta aphrang angdeng chepa-un dun. Akangtui angdeng kacharli dun thuji aphan alangli Guwahati Cotton College along Intermediate Arts aphan charli dun. Bonta alangli hem chokam ahin kadore lapen Reng kelok arideng pen detpi kejokji apharman kachesong atemon pen ajok kacharli tikukrok lo. Aphithu alangli Sylhet District, Murarichand College, Bangladesh pensi 1933 aningkan nongnam mesen B.A angdeng chepa-unsi vang lo. Karbi Angbong halaso ahut alangli helo B.A. angdeng ki-un cheng abangphu lo. Chokam ahin katorapik ajoine Barua High School along ta lomso apor loh than dun. High School loh thanbom ahut,1934 aningkan, Rengkelok a Sorkar atum Deputy Inspector of School arpu Nowgong  District apharman voreng avarsai cho-en dun.
Deputy Inspector of School arpu sai keklem ahut Nowgong District atok-ano a school kelang avarsai kelong ahutsi Karbi atum Thoi-Inglong, atok-ano kedo adim kahumri dam avarsai long lo. Karbi atum kedo, Nihang-Nirep ahavar, Chomang anglong pen chenglok Bangladesh, Silchar, Darrang, Kamrup, Nowgong an keng pen damsi Karbi atum kedo-kethak arjan thek long pame lo. Karbi atum akiduk-kisung aputhak mek-hini pen kethek long ajoine alangli mekri buprup lo.
Semson Sing Ingti ‘Kalakha akitap’,”Tomo Puru’ ‘Vopi’ ‘Bituso’ hei-hui paklang lo. Lapuson asai Ingti asanghho keklem along kapatikuk dunji aphan ajehak atum aphi-ong nongno kejodun asai klem dun-ong ong-lo. Karbi angbong amatsi halaso ahut kemesen asai keklem pon abangphu aphan nongno kejo lapen khei kethak asai klem dun lo. Bonta alangli kamatha thirthip, aphi chiruiresi an sose bor-i pon thulo. Voreng avarsai cho-en dunbom pen ke khei kejokji aphan keklem jokvan kalidet. Methang kerengchot ke Khei rengre pu mathasi keklembom voreng avarsai, Deputy Inspector of School arpu pen  kache-oji aphan mathasi 1946 aningkan arpu pen che-o bup lo. Laso aphi penke Karbi akhei kapachingjokji lapen asitin ahin kapaprangji aphan loksi apor chipi pen klem lo.
1940, Semsonsing Ingti ningkan 30, arta ahut Nowgong Mission Pati along kedo Labangalata Baruapi pen chepachorsi ahupo ahem amat dodun kok lo. Voreng avarsai arpu pen kache-o pen ke alangli chokam ahin torapik lo. Kedam-kevang avarsai ave, Nowgong pen ‘Cycle’ kevek pensi alangli Karbi Anglong atok-ano adim vang pen Karbi arat apharman sai klem lo. Alangli mathalo, khei kejokvanji apharman keklem ponji aphan isi asong keseng nangji akenangsot. Lasi alangli kabor-i, jirpo atum jok-jak cherap cheto pen ‘Karbi A-dorbar’ seng lo. A-dorbar pen kejalin kapachunpon pameji aphan alangli methang amatsi Chunbang arpu ta cheparideng lo. Ahom a Governor Sir Robert Nail Reid, Shillong pen Mohendijua ahin kevang ahut Ingti asangho pen chepatebokhet long ji avarsai en lo. Lasi 1940, Phre a Chiklo, 28 arni ‘Karbi A-dorbar’ pen Karbi atum aphan salajong District kipiji aphan pinpur alo pajir dun lo. Governor pen Ingnar ardon pen kedamrap ni kre-hini, tovar ajak soding kedam ahut Karbi atum akiduk-kisung alam kethan pajirmi lo. Karbi atum kiluvok, habit-haram kedo, Khei kaprek atum ajutang, kedo-kethak, lam-temo’ heihui pen asapta kacherap ave pusi Governor akehai aphan aning parunhup alam than lo. Lasi Karbi atum aphan salajong District kenangji alam than lo. Delhi rongsopi, Governor General akengri ta alangli batai-batai chetong damsi Karbi atum aphan salajong District kipiji aphan sai keklem lo. alangli lahai asai keklem kejoike kali. Alangli kabor-i angthun pen ajoksi 1942 aningkan Khorsing Terang ‘A-dorbar’ i-nut ardi kedo abangphu aphan ‘Constituent Assembly’ anghoi arpu ingvai lo. Aphithu, laso anghoi apharman rat pen kangvai ahut Terang lapen Ingti asangho angbongsi chedan lo. Bonta Semsonsing Ingti ke Kristan,Sikur aso pu ajok si Ingti asangho aphan paremdet lo. Ingti asangho remdet pusita ning ke-oi rat aphan chepaklangkle si Karbi apharman, A-dorbar pen asontin asai angdeng ta pachun pon pame .Karbi angbong ‘Sikur-Honghari’ pu pen kachethak alamthe halaso arni pen nonputa angthun dokok lo. Lapuson ning isipet kalidet ajoksi Ahom atum ari-chikip pen Karbi atum chepajok un-e si pini anta dodun nangver lo.
Ajir dingklui aphi puthot, Governor  Sir Andrew Goulay Claw lapen alangli chor, Lanka ahin kevang ahut, Therepo, 1, 1947 arni lethot ta Karbi atum amethang akhei kacherai komji aphan salajong District kenangsot alam ‘Pinpur’ alo pen pajirmidun pamesi pajir dun thulo. Lapuson si varsai kelong aling si Karbi atum aputhak pajirmi pen ningri dunvoi lo. Puthot, There, 20,1947 lethot ta Semsonsing Ingti pen Delhi rongsopi jalin ponsi Prime Minister, Pandit Jowaharlal Nehru akengri ‘Sixth Schedule’ aron ateng pen District kipiji aphan ‘Pinpur’ alo pajir dam thu lo.
Reng-kelok arideng pen Detpi kejok aphijong, Ahom a Prime Minister, Gopinath Bordoloi, Inglong aso atum aphan District kipi ponji asai along Karbi Anglong lapen N.C Hills pangrum si District kesengji asai deng pon lo. Lasi, adui-ahoi kephar ponji aphan ‘Boundary Determination Committee’ pu Semsonsing Ingti pen ajok 1948 aningkan seng pon lo. Laso along Khorsing Terang,Song Be,Sarsing Teron lapen ari asangho atum cherap-cheto dun lo. 1948 aningkan amat Duar-Amla ‘Katumari’ along ningkan i-sek amaipi kapachunji apharman keklemvoi ahut ‘Boundary Determination Committee’ pen kachingvai ji aphan Sorkar pen kido nang palerok lo. Laso ajoksi Semsonsing puthot Delhi damthu jokjedet lo. Delhi pen hem kachevoi ahut ,kelak-keleng pen alangli ok-pran meme si keso long lo. Karbi A-dor ningkan i-sek amei along ta pajut tekang un-e si alangli Nowgong ahupo ahem chedam jui lo. Keso keran-redet ajok amethang mek kejang akandit pen thur un-e si Thang-thang 28, 1948 aningkan pirthe pen chevoi jui lo. Chom kachevoi ahut alangli arta ningkan 38. Alangli kapamo tekang achor lapen asomar bang throk. Alangli chom chevoidet aphi alangli keklem kachepaduk pon angthun ajoksi 1951 aningkan District lapen 1952 aningkan District Council long lo. Bonta alangli Karbi akhei ning kacheparong amohor thek tekang longle-det lo.

Leave a Reply

Your email address will not be published. Required fields are marked *

March 2019
M T W T F S S
« Feb    
 123
45678910
11121314151617
18192021222324
25262728293031
Archives