ADVERTISEMENT

This area is available for advertisement. Please contact for details.

Arnivang
Get Adobe Flash player

Semsonsing Ingti aphan pipot chikimo nangji?

Ramsing Ronghang, Donkamukam:
Pini arnithot, pini pen ningkan trok sikep aphrang, Thangthang 28, 1948 arni Semsonsing Ingti Karbi akhei aphan o-tekangsi chom chevoi lo. Pini Karbi Anglong lapen Karbi arat alangli phan pipot chikimo cheto nangkok? Pirthe achotai along Karbi akhei man-peng pen kereng dun longji, khei kaprek atum kachingthur ason thakthaksi Karbi akhei ta jokvan avarsai pen kachingthur lapen kapa-prangji aphan kamatha cheng abangphu helo Semsonsing Ingti lo. Alangli kamatha lapen keklem kachepaduk ale ajoinesi pini Karbi khei aman chelongsi ili chepindak dun avarsai chelong lo. Lasi alangli phan Karbi akhei bangphutin ta katengne det ke kartang. Alangli phan ili chini nangji lapen khei aphan keklem aphurkimo aphuthak ta chini nangji akenangsot. Lahai kado kave aphurkimo chini aphi ansi khei aphan kamatha nangji arpu ili chematha thekji.
Nihang-nirep ahavar, thoi-inglong angbong, kachingri thek-the, kache-hijikjam Karbi akhei aphan kapangrum . Toklang ahin tovar kethan, tukong-ingnam ajok kedo a Karbi aphan kachingthur atovar kethan, keso ke-un eh pen kachepajok ji abidi pen chenglok Karbi akhei aphan ratchari atovar kejalin cheng abangphu Semsonsing Ingti. Alangli ning klar-et pen keklem kachopiduk ajoinesi pini ‘Mikir’ adim Karbi pu  ili chepindak dun longlo. Alangli kejapon
atovar pensi Karbi Anglong ‘District’ lapen ‘District Council’ longlo. Tovar kethopon jokvan ajoksi pini Autonomous Council lapen non Autonomous Territorial Council ajakong ta cheparideng longsi khei kapachingjokji avarsai chelong i-lo. Bonta alangli phan Karbi arat atum chinine lapen chini ingtungte. Karbi akhei ke ‘A-ok chodet, ahi langselet’ abisar saide, kachepaduk abangphu aphan manpi ingtung te. Semson sing Ingti Karbi khei apharman keklempon kejoike asai pen lok le Karbi Anglong District lapen District Council kapalong kali. Alangli keklempon kiduk-kisung aputhak chethan lote phurkimo dinglenji. Phurkimo jongsi chini nedet pulote Semsonsing Ingti aphan akenangsot puta matha dam thek-thedet ji. Bonta pini Karbi atum alangli-lam chikimoji ninghanghe. Lapuson ajoksi pini ke-ongdung a Karbi atum alangliphan chinine. Semson Sing Ingti, Karbi akhei aphan kapangrum, khei kapachingthur, District lapen District Council kapalong asai ke mesen lo pusi puhur seta, karlitang abangphu aphan lapu-an kachikimo aret nangji akenangsot ave pusi pini kaningje atum ke-ong lo. Lapuson ajoksi alangli phurkimo Karbi atum rimredet ajoksi khei pen amatsi tenedet lo. Ajoksi karlitang Ingti asangho apiso, aso-asu lapen don-rap aphan anta ahut-isi kahumri abang avedet lo. Bonta, Karbi ove kimi atum 1986 aningkan, ASDC asong pen kachesong, riso-ejang kachingrum aphurun ahut si katene tang aphurkimo humri si man-peng pen chikimo thulo. Laso penke Karbi akhei angbong isi akimi aphurkimo ason nangman lo. Halaso arni pen pini an, pijo-pijo pen Semson Sing Ingti aputhak Karbi angbong kachini nangji lapen kachikimo nangji akenangsot alam ardi nangbat bom lo. Bonta pini arni anta Semson Sing Ingti abinong arong, apai-apo, aso-asu alamjir anta kachinine atum ongdung lang. Lahai alam jong si asap bak anta chinine det pulote ili khei alam kaningje dun ke ale avedet po.
Semsonsing Ingti apo ke Thengkursing Ingti ahem ke Nihang Karbi Anglong, Nilip ahavar Chekso pu arong. Thengkursing Ingti Nowgong si toklang charlidun. Alangli throksi pen nerkep angdeng satlang undet aphijong pen ‘Reng kelok’ a sorkar arum, Nowgong Court along amatsi ‘Enterprater’ voreng asai klemdun. Laso ajoksi alangli kacharli ington kok lo. Nowgong Court along sai klemvoi ahut si alangli-phan puthot Sibsagar District along terek thulo. Laso aphi puthot Golaghat District along si asai klemdun. Halabangso ahut alangliphan ke-ongdung atum ning kangsam atum do-o. Ason-ason ketok-kelang lapen kaningje thekser ajoine alangliphan “Pandit” puta chethang. Golaghat kedobom ahut si inut ahompi Madhuri Ruth Bezbaruapi pen chepachor lo. Penang an arni aphi, 1897 aningkan alangli-chor pen-pen, Kristan (Christian) a dhorom rim dun si dhorom kapa-chethang asai si klem thu lo. Dhorom kapachethang apharman si alangli Nichi Karbi Anglong, Vothatlangso adunghet, Tika Inglong aphuchong si nangdo lo. Reng kelok (Christian Baptist Missionary) atum Kristan adhorom kapachethang apharman ‘Krunjeng’ vang nangdo lo. Bonta ladak sai keklempon asai-sedet ajoine cheterek thusi ‘Lobong kengtong’ lapen aphithu ‘Tika’ along si pathirlo. Tika along amatsi ‘Kirja’ (Church) ahem kim si Kristan adhorom kapachethang apharman klem cheng pon lo. Karbi atum angbong dhorom kapachethang kejoike ji apharman, P.E More kabor-i asai along Ingti asangho cherap-cheto dunsi 1903 aningkan ‘Arleng alam akitap’ paklang pon lo. Adunthu, Tika Baptist Missionary atum pen “Pli-pli’, Roman adak Karbi alam pen loh kethan ponji aphan peklang lo. Inut J.M Curwell, dhorom kapachethang abangphu lapen Ingti asangho kabor-i pen puthot 1904 aningkan ‘Arleng Alam Abang akitap’ ta paklang pon. Kirja ahem pen amatsi Karbi alam pen lo’ kethan pon asai ta chengpon lo. Tika along dhorom kapachethang asai keklembom ahut si Thangthang 8, 1910  arni Semson Sing Ingti amahang thek lo. Semsonsing Ingti ningkan hini arta ahut ani Junaki Ingtipi pen-pen 1911 aningkan Rev J.M Curwell along Golaghat District puthot cherui thulo. Golaghat along amatsi aphithu akai anke kedo pathir lo. Thengkursing Ingti ningkan pharo kepleng arta ahut keso kelong ajok Guwahati Satribari Hospital along seh chelangbom ahut alangli achor bang hini lapen asomar bang nerkep pamo’ tekang si alangli pran chevoi lo.
Thengkursing Ingti kapamo kang asomar, 1. Junaki Salyakala Ingtipi, ahem Shillong, Mehalaya. Karbi angbong Matriculation ki-uncheng abangphi anparta Kolkata pen Mathematics distinction kelong abangphi, 2. Semsonsing Ingti, Sylhet District, Murarichand College pen B.A ke-un cheng abangphu lapen achor Labagalata Baruah. Alangli somar Rani, Beauty, Pawan, Tapan, Nakul lapen Ajoy Rani Ingtipi, Delhi along khei kaprek pen chepachor si hadak amat pathir lo. Beauty Ingtipi, inut Kurjapo, Md. Husain, Judge pen si chepachor. Pawansing Ingti, (IAS, BA (Hons), MA, MBA, Leeds University (UK Visiting fellow, oxford University) Addl. Chief Secretary, West Bengal lapen hadak si kedo pathir lo. Tapansing Ingti, MBBS, Doctor ahem Diphu. Nakul, Superintendent of Police lapen Ajoysing Ingti, inut Leed Bank Officer. 3. Lowrence Ingti, ICS Officer, asomar Frencis Ingti, lapen Dr. K.K Ingti, Valour Christian Paul College pen nong-e kelong abangphu. 4. Roland Ingti, RAF, Radio Officer, asomar Parcy Ingti, Donald Ingti, Dewera Ingti lapen Patrick Ingti. 5. Protap Ingti, Chief Conservator, Meghalaya. 6. Maya Ingtipi, M.Ed, Social Welfare Officer, 2005 aningkan Nobel Prize aphan amen kelongdun abangphi lo. Barapani College a Principal pen chepachorsi hadak si kedo pathirlo. Asomar John T. Ingti, Ashish J.Ingti, Comboodia, Marat api aphuthak kelang inut Project Officer Anup Sekhuel John, Meghalaya Tourist Officer Thengkursing Ingti adunthu achor, Kareng Timungpi pen asomar 7. Sarmen Philip Ingti lapen 8. Basapi Ingtipi, Duliojan Oil Hospital along inut Executive Nurse, Semsonsing Ingti, amahang kethek, Thangthang 8, 1910 aningkan Tika Anglong. Bonta alangli kai kethe-kiding ke Golaghat, Sibsagar District. Alangli ningkan hini arta kepleng aphijong pen dhorom kapachethang apharman apo-apai along Golaghat vangjui lo. Golaghat Missionary School along si alangli toklang charli duncheng lo. 1920 aningkan alangli L.P School angdeng asatlang aprangsi angdeng ki-un anparata scholarship anong-e pen-pen chepalong dun. High School angdeng aphan Golaghat Bez Barua High School along charli dunsi 1928 aningkan kep angdeng toklang asatlang alongta aprang angdeng chepa-un dun. Akangtui angdeng kacharli dun thuji aphan alangli Guwahati Cotton College along Intermediate Arts aphan charlidun. Bonta alangli hem chokam ahin kadure lapen Reng-kelok arideng pen Detpi kejokji apharman kachesong atomon pen ajok kacharli tikukrok lo. Aphithu alangli Sylhet District, Murarichand College, Bangladesh pen 1933 aningkan nongnam mesen pen B.A angdeng hepa-un si chevang lo. Karbi angbong halaso ahut alangli helo B.A. angdeng ki-uncheng abangphu lo. Chokam ahin katorapik ajoine Barua High School along ta lomso apor loh than dun. High School loh thanbom ahut, 1934 aningkan rengkelok a sorkar arum Deputy Inspector of School arpu Nowgong District apharman voreng avarsai cho-en dun.
Deputy Inspector of School arpu sai keklem ahut Nowgong District atok-ano a school kelang avarsai kelong ahut si Karbi atum Thoi-Inglong, atok-ano kedo adim kahumri dam avarsai longlo. Karbi atum kedo, Nihang-Nirep ahavar, Chomang Anglong pen danglok Bangladesh, Silchar, Darrang, Kamrup, Nowgong an keng pen damsi Karbi atum kedo-kethak arjan thek long pame lo. Karbi akhei armu ke-ong-e aputhak ta thoi-ing kedo chehijik-jam. Khei kaprek atum toklang ahin kapaphrang ateng ke Karbi atum helo aphisi ingthir-jir pen kedo-kethak avarsai kelong le, mesen kijun alang avarsai kave. Karbi atum akiduk-kisung kachini pameji aphan tukong-ingnam ajo Karbi kedo adim an damsi rat pen mai dolin-rap lo. Nahok ahin penle lang pangbar dam seta Karbi atum helo paphinai lo. Karbi atum akiduk-kisung aputhak mek-hini pen kethek long ajoine alangli mekri buprup lo. Seh kachelang avarsai penta katikuk, chokam ahin ta paphihup ajok chethe kachirim asai pen anpara ke kaprek alam Karbi atum matha dam un-e. Toklang ahin paprang phre-te khei chingjok un-e, lasi kechengsi ke toklang asai kacharli ji aphan along-along school kangpu asai klem pon lo. Halaso ahut Karbi atum toklang kacharliji aphan aning hanghe lapen akenangsot kali pusi ke-ongdung atum kamunthi dam. Kani lapen Hor ason araki si Karbi atum kirim abang ke-ong. Lasi inut bang hini thek muchot atum ke, kiduk lapen kapaphihup a Karbi atum aphan ‘Kani’ lapen ‘Hor’ parim si amethang ale aphan keklemdun. Lasi toklang kacharli ke school aso atum si charli dun nangji asai pusi Ingti asangho aphan patikuk dun asai klem lo. Kristan-Honghari adhorom alam pen amo kevangve alam ta pachethang dun lo. Loh kacharli asai ke Kristan atum asai, Honghari atum asai kali. Ingti asangho along kacherap-dun atum anke Kristan a dhorom rimdun nang po pu kapinchat pen rat aphan paphere si jakong thak dun lo. Ingti asangho aputhak lapuson nongno kejo pen ajok rat pen chepa-tebokhet ji aphan penang kisung pho pon lo. Bonta ning cherui-resi thirthip pen klem pon bom lo. Toklang ahin akar-i pado pen kapacharli joike aphan Ahom adak pen loh kethan pon asai klem pon lo. Bonta Ahom adak pen loh kethan asai-sedet, katora dokok ajok si Karbi, Roman adak pen kethan ponji aphan matha lo. Lasi alangli jirpo-jirpi atum pen loh athui ketok asai klemsi, ‘Kalakh a Kitap’, ‘Tomo Puru’ ‘Vopi’ ‘Bituso’ hei-hui paklang pon lo. Lapuson asai Ingti asangho keklempon along kapatikuk dunji aphan ajahak atum aphi-ong nongno kejodun asai klem dun ong ong-lo. Karbi angbong amatsi halaso ahut kemesen asai keklem pon abangphu aphan nongno kejo lapen khei kethak asai klem dun lo. Bonta alangli kamatha thirthip, aphi chiruire si an sose bor-i pon thulo. Voreng avarsai cho-en dunbom pen ke khei kejokji aphan keklem jokvan kalidet. Methang kerengchot ke Khei rengre pu matha si keklembom voreng avarsai, Deputy Inspector of School arpu pen kache-oji aphan matha si 1946 aningkan arpu pen che-o bup lo. Laso aphi penke Karbi akhei kapachingjok ji lapen asitin ahin kapaprangji aphan loksi apor chipi pen klem lo.
1940, Semsonsing Ingti ningkan 30, arta ahut Nowgong Mission Pati along kedo Labangalata Baruapi pen chepachor si ahupo ahem amat dodun kok lo. Voreng avarsai arpu pen kache-o pen ke alangli chokam ahin torapik lo. Kedam-kevang avarsai ave, Nowgong pen ‘Cycle’ kevek pensi alangli Karbi Anglong atok-ano adim vang pen Karbi arat apharman sai klem lo. Alangli mathalo, khei kejokvanji apharman keklemji aphan isi asong keseng nangji akenangsot. Lasi alangli kabor-i, jirpo atum jokjak cherap cheto pen ‘Karbi Adorbar’ seng lo. A-dorbar pen kejalin kapachun pameji aphan alangli methang amatsi Chunbang arpu ta cheparideng lo. Ahom a Governor, Sir Robert Nail Reid, Shillong pen Mohendijuwa ahin kevang ahut Ingti asangho pen chepatebo-het longji avarsai en lo. Lasi 1940, Pre a Chiklo, 28 arni ‘Karbi Adorbar’ pen Karbi atum aphan salajong District kipiji aphan pinpur alo pajir dun lo. Governor akehai pen Ingnar ardon pen kedamrap ni kre-hini, tovar ajak soding kedam ahut Karbi atum akiduk-kisung alam kethan pajirmi lo. Karbi atum kiluvok, habit-haram kedo, Khei kaprek atum ajutang, kedo-kethak, lam-tomo’ hei-hui pen asapta kacherap ave pusi Governor akehai aphan aning parunhup alam than lo. Lasi Karbi atum aphan salajong District kenangji alam than lo. Delhi rongsopi, Governor General akengri ta alangli batai-batai chetong dam si Karbi atum aphan salajong District kipiji aphan sai keklem ponke kejoike kali. Alangli kabor-i angthun pen ajoksi 1942 aningkan Khorsing Terang ‘A-dorbar’ inut ardi kedo abangphu aphan ‘Constituent Assembly’ anghoi arpu ingvai pon lo. Aphithu, laso anghoi apharman rat pen kangvai ahut Terang lapen Ingti asangho angbong si chepate lo. Bonta Semsonsing Ingti ke Kristan, Sikur aso pu ajok si Ingti asangho aphan paremdet lo. Ingti asangho remdet pusita ning ke-oi rat aphan chepaklang-kle si Karbi apharman, Adorbar pen asontin asai angdeng ta pachun pon pame.
Karbi angbong ‘Sikur-Honghari’ pu pen kachethak alamthe halaso arni pen nonputa angthun dokok lo. Lapuson ning isipet kalidet ajok si Ahom atum ari-chikip pen Karbi atum chepajok un-e si pini anta dodun nangver lo.
Ajir dingklui aphi puthot, Governor Sir Andrew Goulay Claw lapen alangli chor, Lanka ahin kevang ahut, Therepo, 1, 1947 arni lethot ta Karbi atum amethang akhei kacherai komji aphan salajong District kenangsot alam ‘Pinpur’ alo pen pajirmidun pamesi pajir dun thulo. Lapuson si varsai kelong aling si Karbi atum aputhak pajirmi pen ningri dunvoi lo. Puthot, Therepo, 20, 1947 lethot ta Semson Sing Ingti pen Delhi rongsopi jalin ponsi Prime Minister, pandit Jowaharlal Nehru akengri ‘Sixth Schedule’ aron ateng pen District kipiji aphan ‘Pinpur’ alo pajir dam thu lo.
Reng-kelok arideng pen Detpi kejok aphijong, Ahom a Prime Minister, Gopinath Bordoloi, Inglong aso atum aphan District kipi ponji asai along Karbi Anglong lapen N.C Hills pangrum si District kesengji asai deng pon lo. Lasi, adui-ahoi kephar ponji aphan ‘Boundary Determination Committee’ pu Semsonsing Ingti pen ajok 1948 aningkan seng lo. Laso along Khorsing Terang, Song Be, Sarsing Teron lapen ari asangho atum cherap-cheto dun lo. 1948 aningkan amat Duar-Amla ‘Katumari’ along ningkan i-sek amaipi kapachunji apharman keklemvoi ahut ‘Boundary Determination Committee’ pen kachingvai ji aphan Sorkar pen kido nang palerok lo. Laso ajoksi Semsonsing puthot Delhi damthu jokjedet lo. Delhi pen hem kachevoi ahut, kelak-keleng pen alangli ok-pran meme si keso long lo. Karbi A-dor ningkan esek amai along ta pajut tekang un-e si alangli Nowgong ahupo ahem chedam jui lo. Keso keran-redet ajok amethang mek kejang akandit pen thur un-e si Thangthang 28, 1948 aningkan pirthe pen chevoi jui lo. Chom kachevoi ahut alangli arta ningkan 38. Alangli kapamo tekang achor lapen asomar bang throk. Alangli chom chevoidet aphi alangli keklem kachepaduk pon angthun ajok si 1950 aningkan District lapen 1951 aningkan District Council long lo. Bonta alangli Karbi akhei ning kacheparong amohor thek tekang longle-det lo.
Semsonsing Ingti Karbi akhei aphan keklem kachepaduk ahut kepho pon kiduk-kisung aputhak rat aphan asap ta pachinine lapen aning kapabi pon asai klemkle. Alangli kiduk-kisung asitin along ta alanglichor si parpu dun. Rat aphan sai keklem pipon asitin alongta alangli hupo ta ning kapibidun asai klem-kle si aning pathe lapen kisung pen parjang dun. Bonta Semson Sing Ingti rat aphan kachopiduk pi ateng pen Karbi arat akerap kelong nangji ateng pen longle. Alangli chom chevoidet aphi pen ke alangli chor lapen asomar aphan Karbi Anglong pen kahumri dam abang baduta ave. Lapuson ajok si ajir dingklui ajak kachehumri seroi kavedet ajoksi Karbi Anglong arat Semsonsing Ingti aphan tenebup lo. Lasi alangli kachepaduk alammo lapen alangliphan chini nedet ajok Semson Sing komat ma lata chini abang avedet lo, laso ajok si akenangsot pu kamatha abang avedet lo. Bonta, pini Phurkimo katarlip atum ateng ke, khei trict do kachingthur apharman Karbi o’ve kimi aphan jakong arisim kikim pi tekang abangphu ke Semsonsing Ingti helo. Karbi akhei kachingthur aphan chingrum nangji, chokam ahin paphrang nangji, ok-pran mesen nangji, tok-lang thek nangji, jutang-jubat chan nangji,lun-tomo pangcho nangji, methang a District nangji lapen Rat-chari ajakong cheparideng long nangji pu kamatha-cheng abangphu Semsonsing Ingti helo. Lapuson abangphu aphan katenedet ke aker lo!  Lasi pini Thangthang 28, 2019, Semsonsing Ingti chom kachevoi ningkan 71 kepleng arni, khei aphan chethe kipi abang, tovar keja lapen khei kikim abangphu aphan ning kangthir pen bangphutin ta man-peng pen chekimo hurji aphan ili chetohur lonang!

Leave a Reply

Your email address will not be published. Required fields are marked *

February 2019
M T W T F S S
« Jan   Mar »
 123
45678910
11121314151617
18192021222324
25262728  
Archives