ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi Anglong jabang atum ke anuttin ta kechokche ave, seta sung nangkok

1952 aningkan ili methang a district chelong det pen aphi ke Karbi Anglong pachingthurji aphan pu akemang pen karjap atum dopik lo. Bangso angbong pen kapachingthur aphan pu kamatha pen hala amethang arleng kethe kar-i pen jabang kacheman aphai ke-ong munak ajok kaike jakong aphansi matha rinti rong. Lapuson amat inut bak lapen komatne isi bak asong atum esonbak akeme le klem seta hala inut abang ta kahili mate kakhinde dun an amat isinat ta pachun pame puke ave det asonsi mandet lo. District long det aphi ASDC atum 1995 aningkan MoU chetok lo. Laso MoU kacheton pen jakong ta bat lo lapen District Council pen Autonomous Council pu amen ta chelar lo. Laso kachelar pen saikam ta bat lo lapen tangka mate financial ajakong ta bat lo lapen ajahak ke methang kacheklem un ajakong van lo. Seta halaso ahut Congress pen danglok ke heno lapen chokche pusi pudun lo, bonta kebat ajakong ke cheharjak ilonglo lapen alangtum ahut sai klem nai lo lapen chun nai lo pu chepindak longlo. Bonta laso along ta jakong kapchirui thu ta dolo. Laso pen aphi BJP ta jakong vang lo lapen BJP klemnai lo pu chepindak ilo. Lasonsi ha district nang kelong kecheng penta District Council Rules kapaselam ta bang kona aso aphan arpu pek det pen aphi sixth schedule avaikang arlo schedule tribe kali atum aphan vote kapajok long pen kilik along kaparjap long ke kethenai akechokche lo lapen ke Congress kachari ahut kedotang longle aron ateng pen Longki Phangcho, IAS Karbi Anglong Autonomous Council a principal secretary kekhi ahut kapangdak ta abe kidunji kalisi plung thu rong. Laso along ASDC atum ta kechoknai lapen khei aphan kachinghonai ajok khei apharman karjap pu atum ta hilisi kona aso atum abe dun lo. Laso ajok longle aron ta methang aphan kacheraiji aphan keklem ta khinde dun lo. Lasonsi ha kecheng penta akeme keklem tin along ta khinde dun et amat isibak akeme ta chun det puke thek longle athe kedamtang apor ahut anta to van lo me lo, mo hangbom lonang seta lata long lo apot kelong an pachun lonang pu matha vangve det ajok lapusi chithukung dokok lo. Laso kachehili kitir, la MoU aphuthak ta non malom APHLC pen JI Kathar apai puthot sorsar dun lo. Lason kahili dun ke nonhet ateng lang UPDS atum MoS kachetok aphuthak ta khindepik an lang. Ladak ta 24+ asong atum akeja JI Kathar ta kasorsar thektik. Lapuson kachesorsar abang kapathepik ajok non ke rat pen ta komat abang lo ente kechok ke pu arju meme lo.
Non lasi komatma bang isi thetan kapachok, pulonang MoU, MoS lapen ason-ason ajakong kevan atum aphan lapen kachingthur lapen akeme aphan ahukum (Order) kevan atum aphan kasorsar mute kapachun pame along kacherap dunji aphansi klem nangji lapen hala kasorsar lapen kahili dun abang isi alam chematha nangji, ne kahili, kekroikre lapen kakhinde dun abang ko an klem pachun thek lo? Kopi lo kapachun thek? Isibak lapen esonbak ne pachok thek loma pu kacharju kenangsot. Laso charju lo pulote kipu dun ke joike seta keklem kapachun ke sungkrung pu chini po. Lasi kachipu lapen kipudun tot abang ington ra kapachun along thurpak dun pak nang po. Laso pen abat alongsi akimi kapachunji aphan ta hangbom lapen chesongbom nangpo.

Leave a Reply

Your email address will not be published. Required fields are marked *

February 2019
M T W T F S S
« Jan   Mar »
 123
45678910
11121314151617
18192021222324
25262728  
Archives