ADVERTISEMENT

This area is available for advertisement. Please contact for details.

Arnivang
Get Adobe Flash player

DGC aphan kapanong a gari Dr. N.K Sharma cherai det: KSA

imageStaff Reporter,
Diphu, Thekar, Thangthang 27:
Diphu Government College a principal Nirab Kumar Sharma kachokche aphuthak Diphu police station along lamhoi kipitang ateng kapanepji aphan pusi Karbi Students Association, Students & Youth for Justice, Karbi Nimso Chingthur Asong, Karbi Anglong Women Justice Forum, United Karbi Youth Association lapen Hills Progressive Youth Association atum chelangpet Karbi Anglong Autonomous Council a CEM aphan kapanong apinpur aloh EM Lunsing Teron arideng pajir dam pusi District Press Club along pherangke amai kangni ahut KSA ameiphu Simeon Rongphar jai.
Kedamtang 2015 aningkan Karbi Anglong
Autonomous Council non-plan pen sika 9,85,469 atangka Diphu Government College principal a gari kenamji aphan KAAC pen pilo, seta kamanghu meme alam ke Diphu Government College a principal N.K Sharma laso a gari kenam amethang jongjung aphansi cheselam det. Athe garialoh along kaselam along Diphu Government College principal pule ketok kali, N.K Sharma pusi tok lo. Aron ateng pulote laso a gari principal, DGC pusi amen thap (registration) nangji, seta non ke NK Sharma pu kethap rong ajoine Dr. N.K Sharma jongjung a gari pinak lo. Laso kechokche aphuthak Karbi Students Association pen-pen hamphang asong trok atum Diphu police station along Matijong 1, 2018 arni lamhoi pidam lo.
Laso ahut DGC principal kachepaklang ke nele kechokche kali, Kamrup Metro a DTO atumsi kechokche pusi akoi van lo. Laso kapachokji aphanta neli kido lo etlo puta alangli chepaklang puta pherangke amai KSA ameiphu Simeon Rongphar jai.
Principal N.K Sharma abang men kethap kechokche apot kapachokji aphan kido lo etlo pu alam kapatiniji aphan KSA ameiphu Simeon Rongphar amen pen DTO along RTI joksi kado kave kachiniji aphan hang lo. RTI pen kelong atengke Dr. N.K Sharma lapuson alo DTO along kelo ave pusi klangdak lo.
DGC principal lapuson keklem ke KSA lapen hamphang asong aphan chot le kachongthui kali KAAC lapen police atum aphanta kachongthui lo. Lasi prapjin pen kapanepji aphan pini Karbi Anglong Autonomous Council a CEM Tuliram Ronghang aphan kapanong apinpur aloh EM Lunsing Teron arideng pajir dam lo.
Education asaikam higher education an kelangchariji ajakong Karbi Anglong Autonomous Council alongsi dolo, lasi lapuson kechokche abangphu aphan non ason apor ahutsi sodak adai en nangpo lapen Diphu Government College pen arplung vek nangpo puta Karbi Students Association ameiphu Simeion Rongphar jai.
Lahai kado kave alam jongdunsi pini pinpur aloh pajir dam lo. Jongsi pinpur aloh pajir det pen ni troksi angbong jongsi KAAC lapen Assam police atum Dr. N.K Sharma aphuthak thangnat asai kedeng thek longle pulote Karbi Students Association, Students & Youth for Justice, Karbi Nimso Chingthur Asong, Karbi Anglong Women Justice Forum, United Karbi Youth Association lapen Hills Progressive Youth Association atum Diphu Government College along amat arni hot-he pin choche junje kachesong asai dengji lapen laso ahut kopene kaheno dak angthek dokok puseta alanglitumsi adai che-en nangji puta KSA ameiphu Simeon Rongphar jai. Pini District Press Club of Karbi Anglong along pherangke amai kangni ahut KSA sankur chunbang Thomson Rongpi, KAWJF ameiphu Beaulet Beypi, SYJ ameiphu atum pen chenglok kaprek-kaprek song klembangphu-phi atum chetong dun.

Leave a Reply

Your email address will not be published. Required fields are marked *

February 2019
M T W T F S S
« Jan   Mar »
 123
45678910
11121314151617
18192021222324
25262728  
Archives