ADVERTISEMENT

This area is available for advertisement. Please contact for details.

Arnivang
Get Adobe Flash player

20 angdeng kapangreng api kalakha kapangcheng

Staff Reporter,
Diphu, Thekar, Thangthang 27:
Non ingdeng 20 kapangreng api kalakha asai online si klemji. Lasi ladak komatne kachongthui det lapen komatne pine keklem detji adim ave pusi ingdeng 20 kapangreng api kalakha pangpu amai along Karbi Anglong Autonomous Council Veterinary a EM Tarendra Brahma jai.
Aprang-prang ke loh apak lapen kolom pensi klem bom lo. Laso ajoine ratpangri along lele aprang penang an kapavur nang do. Along-along kivur kedo-oh ajoine ajahak ke kele nangji adim lele det ta do, seta non ke pi kapangreng atum ahem along pen amatsi lophitpo. Laso ajoine nahok ta kivur nangji ave lo. Lahai kalakha asai patang det aphi lote ratpangri atum pen kaprek-kaprek kapangreng api aphuthak saimo deng po.
Kangpu amai along lamthe kejai ahut EM Tarendra Brahma ‘inut Bihar a MP Yadav parliament along ardi kedoklong alamthe kejai apotta pinpur. Alangli halaso alamthe kejai ahut sarpimar atum akisung alam kapaklang ajoksi pini PM Narendra Modi kachari BJP ratpangri atum pen Ujjwala Yojana deng lo’.
Inglong aso atum chainong, bi heihui pangreng thekthe det tahai, seta longhong kapangreng ke thek pusi jai. Lasi chainong bi kapangreng thek atum aphan lapen longhong kapangreng atum aphan ta ratpangri pen kerap piji puta alangli jai.
Longhong kapareng ke terpik pusi ongdung atum kamatha, seta longhong atum asonthot a gyan kedo api ke avelo pudam un athe longhong atum amethang amek kejang lapen kecho adim along mentune ta barpi dode.
Laso hokpet pi kapangreng atum jongsi do pulote netum Veterinary asaikam penta cherap dun thekji. La-an chot kali methang jongjung pen aroi kachekim pen ongdung kapangreng atum aphan akerap pi dun longlo pulote kapangreng lapen netum kipi dun atum aphanta ale longpo puta census kecheng amai along EM Tarendra Brahma jai. Laso aphi alangli census aloh pharchap ingpu tekang lo.
Veterinary a doctor Dr. B.N Bora penta kaprek-kaprek api kapangreng alam pen pangchengsi rong asor atum kalakha atum kevang ahut ahok alam kethan dunji aphan pachini lapen Veterinary atum kalakha asai kedeng along kacheto dunji aphan choningri.
Saraswati Mondir Nepali arong asar pen Veterinary atum pen lapuson kemesen asai kedeng aphuthak kachoro pajir. DVO Dr. Dilip Mahanta meiphu alamthe kejai ahut kado kave aphan kachoro pajir lapen kalakha asai kedeng along rong asor adontin atum kacheto dunji anparta apor kachipi dunji aphan choningri. La-an chot kali kado kave atum ahokpet alam chethan dun nangji, athe online pinak. Lasi kechokche jongsi ephong pen lo plot lote kapachok thuji aphan apor longle det tahai po puta alangli pachini.
DVO Dr. Dilip Mahanta kachepahemphu amai along David Bordoloi mai kepha alamthe jai. Mai along Veterinary asaikam  a doctor, saiphu atum pen chenglok Sarkari Gaonbura Ramesh Teron anparta kaprek-kaprek man kedo atum chetong dun.

Leave a Reply

Your email address will not be published. Required fields are marked *

February 2019
M T W T F S S
« Jan   Mar »
 123
45678910
11121314151617
18192021222324
25262728  
Archives