ADVERTISEMENT

This area is available for advertisement. Please contact for details.

Arnivang
Get Adobe Flash player

Compensation pipesi Myntreng (Terenglangso) pen 9MW rihing ame kangpuji kabor-i

Ramsing Ronghang, Dongkamukam:
Nichi Karbi Anglong District Vothatlangso adunghet Karbi Langpi pen 100 MW rihing ameh ajakong palongdet aphi non puthot Myntreng (Terenglangso) penta 9MW rihing ameh ajakong kapalong asai pachun tang lo. Kedamtang Arkoi 27 arni Assam a Minister Tapan Gogoi lapen MLA Dr. Mansing Rongpi Vothatlangso vangsi rat athengno, Myntreng (Terenglangso) pen rihing ame 9 MW ajakong kapaphirji alam pangdak tekang. Kevangji Thangthang 24, 2019 arni Assam a Chief Minister pensi rihing ameh ingpu ponpo puta rat athengno pangdak tekang lo. Minister akehai kaningje ateng ke Myntreng (Terenglangso) apharman KAAC aphan lapen ‘Land Compensation’ kipi nangji atangka anta pi-et aphisi kangpu asai deng lo pusi rat aphan pachini lo. Bonta, lapuson alam minister kaningje ke kapinchat alam pen rat aphan kapamanghuji aphan chot. Atheke rihing ameh apharman rat kachotiki ahavar chiri 233 sose alongle Compensation pipesi APGCL pen parlo det. Lasi kecheng sai ke-ot 2006 penta rat atum ‘Compensation’ pi  nangji pusi chehang dun rinti lo. Bonta laso apharman pini Thangthang 2019 anta sika isi atangka rat aphan pipepin lang.
Myntreng (Terenglangso) 9MW rihing ameh ajakong kapalongji apharman KAAC pen kachotiki ahavar alongle chiri 233 sose APGCL aphan allotment (No.KAAC/Rev/Allotment/418/2005-6/ 584 dt. 21/09/2006) pilo. Seta allotment kipi alo alongta “The APGCL shall be liable to pay compensation to the affected people if any” puta klardak pen ketok do. KAAC pen APGCL aphan allotment kipipon alongle angbong amatsi bang 62 sose abangphu aphan allotment pipe aphrang si Executive Member, i/c, Rev. tokjir alamthe ateng si ‘Annual Revenue Patta’ kipi pon. Lasi APGCL pen Myntreng (Terenglangso) along sai ke-ot, Jangmipo, 1, 2007 arni penta rat alongle kaparlo pondet apharman “Compensation’ kelongji aphan APGCL aphan choningri dun lo. Aphithu KAAC lapen Deputy Commissioner akengri anta patebok damlo. Bonta APGCL pen rat aphan ‘Compensation’ kipiji aphan kamatha pave det lo. Laso ajoksi  Myntreng along rihing ameh aphan kikim-kerang asai rat pen patikuk dunji aphan ason-ason kachesong asai angdeng deng jokje-det lo. Bonta rat alamthe aphuthak panungsi APGCL pen kikim-kerang asai ington-tesi klembom lo. Rat ahin penta APGCL aphan patikuk asai klembom, pasiksak abatai ke-ong ajoksi rat aphan ‘Compensation’ pipo pu ketok pen kachesong kejalin pon, ‘Myntreng (Terenglangso) Development Committee’ aphan kido nanglo nangkok lo. Seta kikim-kerang asai ingtontesi lapu-laben pen Stage-I, 6 MW (2×3.0=6) asai 2014 aningkan Thangthang angbong pachundet lo. Therepo, 3, 2014, Assam a Minister Pradyut Bordoloi pen ajok rat aphan panung si ingpu lo. Longle-phelang kanahok ahemphu atum aphan ke ‘Compensation’ kipiji alamjir anta pavedet lo. Laso aphuthak rat pen APGCL angbong ongdung abatai kachingvai padolo.  Asstt. Rev. Officer, Dongkamukam Circle penta lasi Chiri 233 sose alongle adang aphan ‘Land Aquisation’ a bill semarsi Deputy Commissioner aphan sot lo. Deputy Commissioner ke Land aquisition aron ateng klem un-e, atheke allotment kipipon adimthotsi rat aphanta Annual Patta pidet. Ahemphu banghini dokok ke aron kalidet pusi Annual Patta kangthanji aphansi puthurong lo. Bonta LAAR 2013 aron ateng ke Annual Patta/Periodical Patta avedet seta halabangso adim jongsi kacherai ahemphu do pulote ‘Compensation’ kipiji aron do. Abidi kaprek ribomta thek longle det ajoinesi kedamtang Paipai 7, 2015 arni Guwahati High Court akengri longle ahemphu bang 62 atum ‘Compensation’ kachehang apharman lamhoi pidet lo (W.P(C) No.5131/2015). Laso aphi anta Myntreng (Terenglangsoi) along rihing ameh ajakong Stage-II,3 M.W (2×1.5=3) kapachunji aphan ingtontesi  klemvoi lo. Guwahati High Court akengri laso aphuthak kangsai kedobom ahutsi Chief General Manager, APGCL pen Karbi Anglong Autonomous Council aphan puthot, ‘Patta’ kipi ke aron karkan lasi rat aphan kipitang a Annual Revenue Patta do-an ta ingthan nangji pusi Joint Secretary aphan (No. APGCL/CGM (H&C)/2018-19/692/08 dt. 27/07/2018) pachini thu lo, lake manghu meme alam lo. Laso aphuthak  KAAC pen Joint Secretary, tokjir lamvoi (KAAC/Rev-1045/2015/429 dt 29/11/2019) pen APGCL aphan Annual Patta ingthan un-e atheke hako’ penta rat atum kachotiki ‘havar’ alongle anparta ahin kaprek alongle si APGCL pen parlo pondet pusi ‘Compensation’ pivek nangji pu klardak pen lamvoi pi thulo. Lasi APGCL ahin pen rat aphan longle-phelang kanahok apharman ‘Compensation’ ke pivek nangpo. LAAR 2013 aron ateng pen seta longvekji aron lo. Kedamtang Arkoi 27 arni Vothatlangso along Assam a Minister, Tapon Gogoi, rat aphan kethan, Land Compensation lapen Council aphan kipi nangji atangka an APGCL pen pi-et lo, rihing ameh Stage-II, 3MW(1.5×1.5) asaita tang-et lo. Lasi kevangji Thangthang 24 arni Assam a Chief Minister pen kangpuji alam kaningje. Bonta Land ‘Compensation’ nonputa APGCL pen pipelang lapen baduta longle lang. Laso aphuthak Guwahati High Court pen kevangji Therepo 1, 2019 arnisi puthot kelang kangchap asai dengthuji. Lasi lapuson kapinchat alam rat athengno kaningje ke pinremhur meme alam lo. Council aphan kipi ke allotment fee sika 58,313 anchot Allotment fee lapen Compensation ke thangnat kacherap ave. Allotment ke Council aninghang pulote jat apor seta ingthan-un bonta, Patta ke men-men ingthan un-e. Lasi High Court pen angdung kiti akangsai klangdet aphisi Myntreng (Terenglangso) 9MW rihing ameh ingpu nangji. Rat aphan panungphaksi jakong-horang pen kangpu kabor-i asai keklem ke BJP a Sorkar rat aphan ardi kipipesi chepaklang po. Cong-I kachari ahut, Therepo 3, 2014 arni Assam a Minister Pradyut Bordoloi  pen ajok Myntreng (Terenglangso) rihing ameh 6MW kangpu asai lapen BJP pen kangpu bor-iji asai angbong kacheprek avedet po.
Pini ilitum thek longhur lo, pokpi pen nangbersi  rat aphan tangka-maha pijopkphlotji aphan ason-ason abidi Assam ratpangri pen Karbi Anglong arat aphan nang keklem .‘A-ok chodet, ahi lang selet’ abisar Karbi Anglong arat aphan keklem saide. Asitinta akejoisi ilitum pen keponji kabor-i, lapuson aphuthak ove kimi atum kacherok-tok thek-thedet ke khei katikukji angring. Karbi kethekkere atum ta “Good Boy” pu anong aphan ansi kar-i chot. Karbi Langpi 100 M.W Hydro-Electric Project, rihing ameh ajakong aphan chiri suri 4233, 1K-1L adang alongle ta KAAC pen 1981 aningkan akejoi si ‘Periodical Patta’ pidet ajoine pini anta lapusonsi matha bom lo. Bonta 100 MW rihing ameh Karbi Anglong arat aphan pipepin anchot kalisi Karbi Langpi apharman Patta kipitang alongle pen nonputa land revenue, medu chiri-isi Sika 72.00 (Commercial/Urban) ateng ningkan-isi pen sika lak 304,7766 atangka anta 1981 pen longle pin lang. Seta ladak pen achik ajontinsi sika kuti 54 sose atangka APDCL pen ale chepalong-i lo. Lasonthotsi non Myntreng (Terenglangso) pen kelongji 9MW rihing ameh ajakong ta Karbi Anglong arat aphan le kapanong kalidet lelo. Lapusonsi Karbi Anglong arlo non long 44 adim akejoi alongle cheparideng pen rihing ameh aphan asai ke-ot ponji aphan APGCL pen chesik-et lo.

Leave a Reply

Your email address will not be published. Required fields are marked *

February 2019
M T W T F S S
« Jan   Mar »
 123
45678910
11121314151617
18192021222324
25262728  
Archives