ADVERTISEMENT

This area is available for advertisement. Please contact for details.

Arnivang
Get Adobe Flash player

Thangthang 24 arni CM arideng pen 13 MW Mintreng project ingpupo

A CORRESPONDENT
VOTHATLANGSO, Thekar Thangthang 14:
West Karbi Anglong district Vothatlangso pen kahelo km 12 Mintreng anglong mate Karbi Langpi electricity project kachekoinot along kedamtang 2008 aningkan Sarada Ik Power Corporation a company atum kechengsi ahut 9 MW asai longlo setame electricity asaikam pen puthot 4 MW pabat thusi pangrum pet 13 MW kivungji aphan sika 78 kuti adim 200 kuti an pale rok lo. Sai keklem apor ningkan pho an pilo setame ningkan sirkep an pale rok lo. Ratpangri pen akimi aron kapangdang atengke apor ateng pen contractor atum keklem patangte pulote kangsai doji pusi pulo setame kangsaiji kalisi show cause notice anta pipe det lo. Laso a project kechengsi Ashok Jajia pu inut Calcutta asor a contractor si longlo, setame alangli commission cho-ensi aphike Sarada Ik Power Corporation atum aphansi hodai kok lo. Laso a company atum kedamtang apor ahut lapuson asai klem lone klemkle lone lang pangthek nangji apotlo, bonta lason klemkle det lo. 3 MW ajakong kelobom laso a project aphan inglong alongle ingrai thip lo. Halaso a company along inut pangthek thekthe kethekser Engineer ateng pen pulote laso a project kasa-oi det kali hadak ke-en ahurmu ta ador kijum saide. Lasi laso a project ningkan kep ta ingthang jine ingthangthe lone honthe meme lo. Laso a project kaselamji aphan KAAC pen Mintreng anglong along isi atalom parlosi kedamtang 2006 aningkan chiri 233 sose alongle pajir lo. Company atum keklem nangji adim along klemklesi rong trok arat atum katiki arit alongsi company atum sai klem ronglo. Maine Teron arong, Amtreng Ingti arong, Choplar Hanse arong, Long-ang Senar arong, Amtreng Tokbi arong lapen Sadar Bey arong arat atum thurpaksi chesonglo setame company atum longle kacherai pidet amat anam abang ke pipe detlo. Laso ajoine laso a company aphan sika 8,58,615,000 atangka rong arat atum aphan pi nangji pusi KAAC pen loh palelo, bonta pini arni anta laso atangka company atum rong arat atum aphan pipe detlo. Company atum lapuson kachomatha ajoine halaso ahut Project Development Committee atum laso aphuthak court along anta alam pale dam lo. Laso alam non anta high court along dovoi lang.
Laso a project lamki dovoi angbong setame rat apharman non kevangji Thangthang 24 arni Assam chief minister Sarbananda Sonowal ingpu po. Keton-kelang asai pangchingsi Lengri pathu aklam pen Serdihun pathu aklam along helipad selamlo. Kachini dun atengke halabangso arni adap porphai kep apor ratpangri arot ahem pensi chief minister Sonowal Lengri nangsun po. Laso aphi Serdihum pathu aklam along laso arot ahem thot pensi sun dam po lapen rat amai thepi alongta chetong dun po. Setame isi kejong meme alam abangke rong trok arat atum aphan kipi nangji atangka pipo ne pipe lone ke apor ahutsi chini dun po.

Leave a Reply

Your email address will not be published. Required fields are marked *

February 2019
M T W T F S S
« Jan   Mar »
 123
45678910
11121314151617
18192021222324
25262728  
Archives