ADVERTISEMENT

This area is available for advertisement. Please contact for details.

Arnivang
Get Adobe Flash player

Methang keng kacharjap thekji aphan chiklo ejon apharman seke kipi kecheng

imageStaff Reporter,
Diphu, Thekar, Thangthang 11:
Karbi Anglong district hini arlo voreng kave ariso okorjang atum aphan voreng avarsai kipiji aphan pu Karbi Anglong Autonomous Council atum kapatirpi along Emulate Educational Service atum aphan chelang ponsi pini Diphu Agriculture Farmer’s Growth Centre along EM Prodip Rongpi arideng pen Skill Development Training Centre kapangpu.
Secretary Si-im Taro kachari kangpu amai along alohi sarpo aman pen Karbi Anglong Autonomous Council a EM Prodip Rongpi alohi aman pen chetong dunsi Skill Development Training Centre ingpu dun lo. Laso ahut alangli kejai ke, ladak chiklo ejon a seke along seke ke-en dun abangphutin atumta charli dun pame nangji. Thekser lote rong arlo seke ke-en dun longle lang ariso okorjang atum aphan than pachini dam nangpo. La-an chot kali seke ke-en tang atum chokomar ta longji lapen bank pen tame loan longji, lasi lahai pen choklemsi methang aphan ale chepalong nangpo pusi alangli jai.
Laso aphi alangli Emulate Educational Service atum pen mesen seke kipi ponji anparta Emulate Educational Service atum Karbi Anglong Autonomous Council atum kehang ateng pen kacherap dun apot alangli kachoro pajirsi Skill Development Training Centre tame ingpu lo.
EM Amarsing Tisso pen Emulate Educational Service atum aphan choro lapen seke kethan pameji aphan choningri. Laso seke ke-en dun atum aphan subsidy a loan kipi along lapen chokomar anghoi kipi along Emulate Educational service atum pen seke ke-en dun atum aphan cherap dunpo puta EM Amarsing Tisso jai.
Lasi bangso a seke ke-en dun ariso okorjang atum aphan thedung ale doji pusi heihui alamta alangli jai.
La-an chot kali seke ke-en dung atum chepaningdingsi mesen pen seke pajut dun nangji la-an aphisi ajat ale tame longji puta alangli jai.
EM Roton Teron pen Karbi Anglong arlo non amat keklem bom hem kikim amistri pen chenglok kaprek kaprek asai keklem a mistri atum seke ke-en eh atumsi ke ong, lahai atum bang along kacholangdun lapen amethang jongjung kamatha pensi sai keklem laso ajoine ahut pen ke chokche det ahutta do. Lasi non ladak seke en dun lote ajatta asai ta arong ateng klem thekpo puta alangli jai.
Lason than EM Raju Tisso, MAC Richard Tokbi lapen KAAC Principal Secretary Mahadananda Hazarika (IAS) atum pen seke kipi pameji aphan Emulate Educational Service atum aphan choningri lapen seke ke-en atum tame kachepaningding pen seke ke-en dunji aphan pare tekang. La-an chot kali alangli tum seke ke-en dun ongdung ale kelongji aphuthak ta pini kangpu amai along jai.
Karbi Anglong district hini arlo kado kave longpli adim Skill Development Training Centre ingpuji, Karbi Anglong arongsopi Diphu along isi ingpu lo, lason thakthak Bokolia, Tumpreng lapen Bokajan alongta isi-si ingpuji lapen kado bang 900 atum aphan longpli a centre along seke piji puta PS M. Hazarika IAS than.
Chiklo ejon a seke along Asst. Electrician, Asst. Carpenter, Horticulture, Handicraft heihui thanji pusi Emulate Educational Service a director than, la-an chot kali seke ke-en dunji atum akijumnat tame phant 80 an chetong dun nangji, kali pulote certificate pipe puta alangli than.
Kangpu amai pajut det aphi Karbi Anglong Autonomous Council a EM Amarsing Tiso arideng pen seke kethanji adim pangpu lo. Laso aphi penap seke kethan pangcheng po lapen Bhomkuru arni seke than pu pachini dunsi pachekak lo. 

Leave a Reply

Your email address will not be published. Required fields are marked *

February 2019
M T W T F S S
« Jan   Mar »
 123
45678910
11121314151617
18192021222324
25262728  
Archives