ADVERTISEMENT

This area is available for advertisement. Please contact for details.

Arnivang
Get Adobe Flash player

Dillai IS sai keklem kechokche aphuthak ASDC Youth Front pen KSA atum chelangpet kachesong

imageA Correspondent,
Diphu, Thekar, Thangthang 11:
ASDC Youth Front lapen Karbi Students Association atum chelangsi KAAC kaparlo Irrigation asaikam along kethedung kachopanglim aphuthak Johar Singnar arong along kekhamkhe kachepaklang.
Irrigation asaikam pen AIBP saideng (scheme) sika crore 12 atangka pen Dillai I.S (Phase II) deng lo. Laso atangka kedamtang 2015 aningkan Vosik achiklo niphai 29 arni anke kado kave achitim atangka en- etlo seta asai ke 120 meter kaselam nangji adim anta metre 100 ansi theklong chot. Lahai asai contractor Royelson Teron pen Ranjit Hanse atumsi keklem puta ASDC Youth Front pen KSA atum kachesong ahut jong.
Head work lapen kaprek-kaprek asai keklem M/s Eastern Enterprise atumsi klem lo. Ladak ta asai ketang thek longle seta atangka ke sika crore 4.20 an en etlo. M/s Progressive Engineeers atum construction of temporary diversion lapen communication asai ta selam lo lapen kaselam anam ta sika lakh 81.50 an en etlo. Pronoy Das si construction of river trimming work amen sika lakh 71.85 atangka en lo.
Laso ateng asai tangte pinpen 2015 Vosik achiklo niphai 29 arni an sika crore 6.54 atangka en etlo. La-an atangka padamdet aphita pini arni rat atum sai kachotiki alongle along lang imu natta nanglele. Sai katiki alongle along lang nang keleji kalisi kaprek ahinsi lang li rong puta pini ASDC Youth Front pen KSA atum kekhamkhe asai kedeng ahut jong.
Pinpurme, laso Irrigation saideng kedeng adim alongle ahemphu Sarsing Timung aphanta Irrigation saideng  kedengji pu alamta thangnat kachingvai ave lapen haladak saideng dengdet aphita longle ahemphu aphan sika isi atangka ta pipe pu alam ta klang.
Laso aphuthak longle ahemphu Sarsing Timung penta pini ASDC Youth Front pen KSA atum kekhamkhe asai kedeng ahut ningduk alam chepalang dun.
Laso asai langno keklem along kacherap dun atum aphan tarlipsi nep ingnang serak nangji pusi pini ASDC Youth Front pen KSA atum kehang paso.
Kachesong asai ASDC Youth Front tiri ameiphu Premson Bey, dun meiphu Peterson Rongphar, sankur chunbang Rajib Tokbi, dihin chunbang Gulson Bey, KSA tiri amei asankur chunbang Jemson Timung, rap sankur chunbang Anderson Kro lapen kaprek-kaprek ajabang atum pen kekhamkhe asai jalin lo.

Leave a Reply

Your email address will not be published. Required fields are marked *

February 2019
M T W T F S S
« Jan   Mar »
 123
45678910
11121314151617
18192021222324
25262728  
Archives