ADVERTISEMENT

This area is available for advertisement. Please contact for details.

Arnivang
Get Adobe Flash player

Ingdeng X AUDC Varsity Week-2019 alir-alon pen kapajut

Keplenglim AUDC aphan chiri 20 alongle piji pu Johny Timung kachechak

CORRESPONDENT
Diphu, Thekar, Thangthang 10:
AUDCSU atum patirpisi kedamtang Thangthang 2 pen 8 an Assam University Diphu Campus atum Diphu Govt. Boys HS School along ingdeng 10 varsity week-2019 kapaman.
Kapangcheng arni Masters Games along ser alem kelong dun abangphi Poikhila Ingtipi aphansi alohi aman pen chophasi kapathu pen ale kelong anparta kachepaduk nangji anparta ok pran aphan akenangsot alamthe heihui pajai tekang lo.
Laso aphi Thangthang 2 pen 8 angbong ason-ason kapathu charli osomar atum angbong chepate lo. Ingdeng 10 Varsity Week-2019 kapajut arni anerlo porphai 11 apor pen Varsity Week kapajut amai ingni. Laso amai along alohi sarpo aman pen Karbi Anglong Autonomous Council a EM Roton Teron chetong dun. Mai along AUDC social advisory committee a member secretary, Dibrugarh university EC member lapen Thekar chapbang Longsing Teron, SPKL sankur chunbang Johny Timung, anparta AUDC vice chancellor i/c Ratan Barman pen chenglok AUDC thanbang atum ongdung chetong dun.
Mai along kachetong dun alohi atum aphan archo det aphi alohi atum pen ardi kedo klong alamthe jai tekang.
Laso ahut EM Roton Teron kejai ke, ‘ne ke AUDC kapachingthurji aphan asai along ke kaike ta kacherap dunji aphan chisik ding lo’. La-an chot kali charli osomar atum aphan kangthurji lapen aprang keponji aphan ta alangli chechak tekang.
Thekar chapbang Longsing Teron pen charli osomar atum aphan aning pathe tekang. Assam University Diphu Campus kechoklim a university kichunji aphuthak ta jai. Laso angthek prapjin pen nangtum thek longpo puta alangli jai.
Johny Timung ta charli a osomar atum aphan aning pathe tekang, anparta keplenglim a university aphan longle chiri 40 kipiji aphan alangli chechak tekang.
Alohi atum pen lamthe jai det aphi Mukak (Rainbow) 5th edition 2018 ningkan esek alokimo ta ingpu lo. Laso aphijong Miss pen Mr AUDC kachepate, lamkan, kilun kekan heihui kaparek-kaprek AUDC along kacharli bom kaprek-kaprek asaikam a osomar atum pen paklangsi ning arong chipisi ingdeng kep Varsity Week-2019 pajut lo.

Leave a Reply

Your email address will not be published. Required fields are marked *

February 2019
M T W T F S S
« Jan   Mar »
 123
45678910
11121314151617
18192021222324
25262728  
Archives