ADVERTISEMENT

This area is available for advertisement. Please contact for details.

Arnivang
Get Adobe Flash player

KANCH Resort Commissioner Anwar Uddin Choudhory arideng pen kapangpu

imageOUR STAFF REPORTER
Diphu, Thekar Thangthang 9:
Diphu-Manja atovar 4 mile, Dillaji along kedo Assam Hills Small Industries Development Corporation kelangchari KANCH asaihem barim along KANCH Hotel & Resort pini ingpu etlo. HAD Minsiter Sum Ronghang adular Assam ratpangri HAD Commissioner & Secretary Anwar Uddin Choudhory, IAS arideng pensi pangpu lo. Bangso asai along Karbi Anglong Deputy Commissioner Mukul Kr. Saikia – ACS, Principal Secretary Mahananda Hazarika – IAS, KANCH MD Dhonsing Lekthe, Jai Lakshmi Enterprise ahemphu Ashok Gupta atum pen chenglok kaprek-kaprek man kedo chetong dun.
KANCH Hotel & Resort kangpu ahut KANCH MD Dhonsing Lekthe pherangke angno kethan ke “Bangso ahem aprang ke KANCH asaihemlo, setame along kaprek-katerek pon det ajoine dihin kapavangji aphan matha ponsi Hotel & Resort ahem selam detlo. AHSIDC Ltd. lapen Jai Lakshmi Enterprise angbong ningkan 10 apharman 65:35 ale kachethak alamdon chetoksi bangso KANCH Hotel & Resort selam lo. Ladak ratpangri pen sika isi ta kerap ave. Hotel & Resort ahem kapamat aphan Jai Lakshmi Enterprise atum non an sika Lakh 80 an atangka padam etlo.”
Assam angkangpi along Govt. undertaking Public Sector amokha sangkraisi ke-onglo, isi ahormu kesangkrai pen kangthur thu ke penang an akisung do, setame non ladak KANCH along ke MD Dhonsing Lekthe ke-ot thip ajoine ingthur thu lo. Alangli kachepaduk krup ajoinesi penang an angdeng an reng thu lo. Sorkar ahin penke kaike ta public sector along kacherap dun do lo lapen dihin ta nanglo bomlo, seta keklem-kedam atum kangthurji aphan kabor-ih kenangsot pusi Assam HAD Commissioner & Secretary Anwar Uddin Choudhory, IAS jai.
Karbi Anglong arlo voreng kachetangte akisung kapajokji aphan Skill Development aphan Karbi Anglong Autonomous Council pen kaprek-kaprek aseke kipi asai deng bom lo pu heihui alam Karbi Anglong Autonomous Council a Principal Secretary Mahadananda Hazarika pherangke atum athengno ningje.

Leave a Reply

Your email address will not be published. Required fields are marked *

February 2019
M T W T F S S
« Jan   Mar »
 123
45678910
11121314151617
18192021222324
25262728  
Archives