ADVERTISEMENT

This area is available for advertisement. Please contact for details.

Arnivang
Get Adobe Flash player

Det kachekak ahut kisung kepho atum aphansi Citizenship Amendment Bill piji: PM Modi

Ni ni apharman PM Modi nihang-nirep ahavar nangsunsi ongdung a project along-eh som tekang

imageOUR STAFF REPORTER
GUWAHATI, Thekar, Thangthang 9:
Citizenship Amendment Bill aphuthak khamkhesi Assam angkangpi kachesong ame kithurbom apor ahut pini Assam mate nihang-nirep ahavar ni ni apharman panongsi India prime minister Narendra Modi nangkisun. Alangli nihang-nirep ahavar nangsundet aphi kechengsi adap apor Arunachal Pradesh alongsi hirdamlo lapen hadak ongdung kachingthur a project kangpu lapen long-eh som tekang. Laso aphi anarlo porphai isi apor South Guwahati Changsari alongsi alangli nangsun lo. Prime Minister Modi nangkisun ahut state BJP akangtui jabang atum poho, seleng lapen sador pensi alangliphan deng lo. Changsari along thedung rat kacheto amaipi along alangli Assamese alam pensi lam kethan pangcheng. Dr. Bhupen Hazarika alunjir masapso lunsi kapadobom Sankardev Sangha mesen pen kapachun thekji aphan hirjume hang. Laso aphi alangli mai along Bhupen Hazarika kereng-et ahut kopi apotsi Bhrata Ratna anong-eh longle detlo pusi arju. Gopinath Bordoloi aphanke kedamtang Vajpayee aratpangri ahut Bharat Ratna anong-eh pilo, setame Congress atum kopi apotsi Assam along Ratna atum aphan pangthek thekthe detlo pusi prime minister Narendra Modi Congress aphan pano. Citizenship Amendment Bill aphuthak Congress atum kapachethang thap aphuthak mai along prime minister Narednra Modi pinrem. Det kachekak ahut kisung kepho atum aphansi Citizenship Amendment Bill piji puta alangli ningjesi detpi arlo khi-dat ke-enji aphan kevang lapen methang adet along amat kachenek pen kisung kepho kevang atum angbong kacheprek chini dun nangji. Laso a Bill north-east angkang aphan det kali detpi angkang aphanlo pusi ningje.
Assam Budget aphanta chorosi BJP aratpangri ahin pen Assam Accord pachunpo pusi prime minister Narendra Modi chechaksi Congress atum Assam Accord amen pen ratchari keklemlok pusi akoi pi. Assam along elam-ki- jutang- jubat BJP atumsi raikomji puta mai along Modi ningje.
Pini prime minister Narendra Modi Assam nangkihir ahut ongdung a project ingpu. Guwahati pen South Guwahati adak kachelengji Brahmaputra alangroi athak krong trok adolong kaselamji aphan prime minister Narednra Modi long-eh somdet aphi Changsari along All India Medical Institute kikimji aphanta ingpu. Lasonsi alangli rideng pen Numuligar Refinery diesel a project pen Barauni –Guwahati adak gas alangpong ingpu.
Pini prime minister Narendra Modi kachetong rat amaipi along Governor Jagadish Mukhi, chief minister Sarbananda Sonowal, finance minister Dr. Himanta Biswa Sarma, state BJP ameiphu Ranjit Kumar Das, KAAC CEM Tuliram Ronghang pen danglok minister, MLA anparta BJP state jabang atum chetong dun.

Leave a Reply

Your email address will not be published. Required fields are marked *

February 2019
M T W T F S S
« Jan   Mar »
 123
45678910
11121314151617
18192021222324
25262728  
Archives