ADVERTISEMENT

This area is available for advertisement. Please contact for details.

Arnivang
Get Adobe Flash player

Ingdeng 45 KYF kachisik phant 70 an chunlo: CS Kro

imageREPORTER
DIPHU, Thekar Thangthang 7:
Ningkan esek pen ephong rong aje Karbi riso-nimso rong aje mate Karbi Youth Festival (KYF) non nangkelejii Thangthang 14 arni pen chengpo. Non adihu ingdeng 45 KFY katalon ahut kedamtang aningkan aphante pining abang abolon kipi muchotji aphansi patirpi atumta kachiting thek dun long. Lasonsi KCS tiri ameiphu Chandrasing Kro aphan pherangke karju ahut kaningje ke, non adihu ingdeng 45 Karbi riso-nimso rong aje katalon alir alon pen kapachun thekji aphansi patirpi atum do-an ajo-anarlo keklem-kedam sangse pinlo. Laso ajoine non amatke phant 70 an asai keklem pachun longlo pusi ningje. Alangli kaningje thuke Karbi People Hall pineng an arta ningkan 25 an pleng tanglo lasi ruptalin karcho ponji aphanta chisik bomlo. Karbi People Hall apharman longle nangkepek anutin atum aphan mang peng pen archoji lapen dak Taralangso Karbi jutang ahemtunpi kaparjap kecheng ahut kachepaduk atum aphanta karchoji aphansi chisik bomlo pusi ningje. Alangli kaningje thuke pining ingdeng 45 alir alon pen katalonji rong aje along thangnat katikuk lapen kebeng-kephan ave pulote KCS aro arim do-an kachetong etji aphan ning chethe do. KCS aro arim pangrum pet 25 do lapen alanglitum nangkacheto dunji aphansi kachisik lok lo pusi birta nangpale bomlo anparta non Karbi Anglong pen angtan Barak valley, Meghalaya lapen kaprek-kaprek alongri arlo kedo Karbi ahkei atumta jutang kachinghon angthek chepaklangsi non amatke alanglitum aro-arim seng un-eh lang bonta nangkacheto dunji aphansi alanglitumta chisik bomlo lasi non ephongke pangrum pet bang suri pho sose kilun-kekan kethek atum lapen kaprek-kaprek kethek atum kacheto dunji angring do puta KCS ameiphu Chandrasing Kro ningje. Alangli kaningje thuke, non ephong abangke Karbi akhei atum ajutang pirthe adang kapachethang dun thekji aphan Sangit Academy natok along inut abidisar aphanta nelitum chophalo. Lason thak thaksi International level penta kachopha dolo. Ajat pen noi methang Karbi akhei, methang jutang jubat lapen methang pindeng sumpot chehok ra rong aje esek klar-et pen kapachun thekji aphansi neli do-an Karbi arat atum aphan choningri iklo pusi alangli kachoningri alamthe ningje. Ingdeng isi pen pining an ingdeng 45 nangle tanglo lasi non adihu KYF katalon kachelar angthek doma pu pherangke karju ahut alangli kaningje thuke, kachelar abangke thetan asonsi dolo, athe kedamtangtang apor ahut kado kave atumta chini hurlo Taralangso Karbi People Hall pulote party alam pondet titi. Party alam pathe pen kacherap -kacheto kave ningduk meme ason do. Setame non an mate pining an kethek damlong abangke KYA ke Karbi akhei akhi adat lo pu kamtha patirpi thipsi KAAC CEM Tuliram Ronghang keklem kedam kapangtang ajok alangliphan choro nangkokji. Alangli hin pen jutang ahemtum kapachingthurji aphan penang akerap pilo. Pining kachelar abangke Zonal atum kedo aboha kithirthip kimpilo, lason thakthaksi saikam pen kelan dun mate exhibition ahemta kithirthip kimlo anparta Sing Mirjeng achetai, Long Mirjeng achetai, Semsonsing Ingti achetai ta kithirthip mate keklem pachingthur pnolo halapu No thengpi pen danglok penang an dim aklong ta keklem abolon padolo. Non abangke KYF pulote khei dhorom lapen party alam vanve pin lo labang henlo kacheprek ke pusi alangli ningje.

Leave a Reply

Your email address will not be published. Required fields are marked *

BREAKING NEWS
February 2019
M T W T F S S
« Jan    
 123
45678910
11121314151617
18192021222324
25262728  
Archives