ADVERTISEMENT

This area is available for advertisement. Please contact for details.

Arnivang
Get Adobe Flash player

Ranjan Daimary pen-pen bang 10 aphan akai isi jail kebeng alamrai kipi

imageREPORTER
GUWAHATI, Thekar Arkoi 30:
Kedamtang 2008 aningkan Pre achiklo 30 arni pardunron bomb kapangbop ahut pangrum pet bang 88 sankur arat atum apran dam nanglo lapen bang 470 atum areng sonang lo. Laso ajoine halabangso arni Assam angkangpi along hur chodut lo. Komane atumke apo-apei, komane atumke asomar-asumar, lapen komane atumke akorte ingjir chepangbo nanglo. Ajat noi halabangso arni abangke Assam angkangpi arlo ningduk mekri meklang palang bung lo. Lapu-an amonit aphan apran karmut, areng kapaso lapen ongdung khi adat kapanahok aphuthak keton kelang atum katarlip pasiksi NDFB ameiphu Ranjan Daimary pen pen bang 22 klembang atum aphan kechokche angthek longlo. Laso alamhoi CBI atum dengsi CBI fast track court along kangsaibom apor ahut mate ningkan kep aphi nonhetjong kedamtang Arkoi niphai 28 arni NDFB ameiphu Ranjan Daimary pen-pen bang 14 atum aphan adai kedo alamrai pilo lapen inut aphanke pajok lo. Setame halabangso arni bang 14 atum aphuthak kopi akangsaisi kipijima laso aphuthak pangdakde detsi pini puthot CBI fast track court ahin pen meiphu Ranjan Daimary pen-pen bang kep atum aphan akai isi jail kebeng alamrai pidet lo. Halapu bang 14 angbong pen bang kethom atum aphanke sika suri kethom thom adai areng ensi ningkan pho apharman jail kebeng alamrai pilo. Laso alamki along kacherap dun bang troksi atumke non anta kekat chepatu bomlang.
Pinpurme kedamtang 2008 aningkang Pre achiklo niphai 30 arni Guwahati Ganeshgori, Panbazar, Phasibazar, Barpeta Road, Bongaigaon lapen Kokrajhar alongsi isivet aporsi chepardun ron NDFB atum bomb pangboplo. Bomb kapangbop ningkan kep aphisi apran kedam mate areng keso ahem asor atum kachonghong akaingsai pini papleng pilo. Pini Court laso alamrai pidet aphi tiri ratpangri atum pen monsam kachingki bom NDFB asong atum non kopi atovar tong kedengji lone lake apor ahutsi chini dun po.

Leave a Reply

Your email address will not be published. Required fields are marked *

January 2019
M T W T F S S
« Dec   Feb »
 123456
78910111213
14151617181920
21222324252627
28293031  
Archives