ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi atum kaselet ajoinesi angtan amonit nang kebat

Danielson Bey, Hidisajir, Diphu:
Karbi Anglong arlo adontin a Karbi atum alongta the-oh kali puseta dorchit alongle do. Diphu along kedo chom atumta ladak Diphu along amat longle ave puseta rong along ongdung atum longle do. La-an chot kali Diphu ahithi adung kekom ren ongdung Karbi atum amethang abiri along dorep sai de. Seta Karbi atum sai katiki selet pik ajoine methang alongle thedung seta pasampri dang dung asonsi thek long.
Longle dopik seta keklem abang kave det ajoine bang akhei atum aphan longle chepeksi sai patiki lo. laso ajoine edon doni nang kedo bang akhei atumsi longle cherai pen sai kitiki lo. Karbi atum alongle along kedochot bang akhei atum alongsi ili Karbi atum ke han pen chenglok kaprek kaprel athesere seta chonam nang bom lo.
Diphu ahithi along sarpimar atum han kejor dopik seta laso angbong pen ongdung atum ke bang akhei atum katiki ahan si paikari cho-en dunsi kejor. Langdamme lahai a Karbi atum longle kave kali.
Bang akhei atum ke longle chiri isi-hini bak le kelong lote isi ahemtun kacheparengji aphan ke kedor lo. Athe laso alongle alongsi apor alin ahut han pen chenglok kaprek kaprek asai tiki dunji. Laso ahan kejor lapen chainong kapangreng, bi kapangreng pensi isi ahemtun chepangrengji. Karbi atum kaselet ajoine bang akhei atum Karbi alongle along akejoi pen kedo long bom lapen sai kachotiki pen chenglok kaprek kaprek beha kachoklem-i longbom ajoine inut pen banghini, banghini pen bangpli pusi bang akhei atum         arni nang bat lo.
Kechengsi konat akengsang aso ketersi vangpo sai kachoklemji aphan nang choriji, laso aphi elongbak kaselet a Karbi long pen sai katikiji aphan longle chohang pen sai tiki po anke sok tame kaprek kaprek akhiti tame achitim chitim chethak dunpo. Laso aphi apiso aso lapen adon arap aphan chevanpo ladaksi kedo pathirpo, lason pen ajok Karbi Anglong arlo ke bang akhei mate kengsang aso nang long bin lo.
Hithi alongta Karbi atum ke kethekthe lapen beha kachoklem aning kidingde det ajoine konatne akengsang aso vanpo kechengsi ke pharo 5-6 bak atangka pensi kulat chobi dunji aphi ke pathe chet sah a hotel ingpupo laso aphi an a hotel an ingpu po. Laso aphid et chenampo kam kapaklem aphan pupo komatne adon arap chevanpo. Laso nang kidun abangta ningkan isi hini ke kevangvek abangphu a hotel along chongdat dunji laso aphi lote laso akengsang ta kopine akulatso konatne atok atak adim along ingpu lok lipo. Laso aphi kulat chepathe lata ako konatne pen adon arap chevan lipo. Lapu laben amat Karbi Anglong arlo mate inglong aso atum kedo ahavar along kengsang inglong aso kalidet atumsi aphai nang ongmunak tang lo.
Karbi atum seletle det amat asontin asai ta klem et lo pulote bang akhei kengsang aso atum chongdat athai ave detpo, ladak kedotang atum anta kat et nangpo. Karbi atum jongsi amethang abiri along han pen chenglok kaprek kove lapen kaprek kaprek athesere tiki pulote itum methang kechoji aphan chonam jokplot lapen bang kengsang aso atumsi itum along pen nang nam nangpo. Lason bang kengsang aso atum itum along nang kachonam pensi kedo nang pulote ladak alang tum kerengji aphan sung po. Jongsi ladak kerengji aphan akisung dokok pulote adon arap aphanta chehang haihe lo mate chevang haihe lo.
Laso bang akhei kesang aso atum aphan kiplungji aphan hele Kaman nangne, choki chokam ahin ladak kedo Karbi atum cherai dun thek nangji. Laso along Karbi Anglong Autonomous Council atum tame arpu do. Ajahak Karbi atum beha keklem ahin asapso kachejar dun mate kapaprang dun atum aphan kangthur dunji aphan akerap pidun nangji. La-an chot kali bang akhei kengsang aso atum aphan trading licence joike pen pipe det nangji, ladak hako pen kedovek atum aphansi pichot nangji lapen Trading licence kipita arni pa-ong oh-eh det nangji.
La-an chot kali akhi adat kedo Karbi atum angtan pen kaprek kaprek ahormu kasalon kevanji aphanta bor-I dun nangji. Lahai asai jongsi Karbi atum cherai dun thek pulote kengsang aso atum ladak kachodatji, sai katikiji, beha keklemji aphan akisung dopo anke Karbi atum chingthur lapen kengsang aso atum ladak pen katpo.

Leave a Reply

Your email address will not be published. Required fields are marked *

January 2019
M T W T F S S
« Dec   Feb »
 123456
78910111213
14151617181920
21222324252627
28293031  
Archives