ADVERTISEMENT

This area is available for advertisement. Please contact for details.

Arnivang
Get Adobe Flash player

Bill aphuthak kachinine opposition jabang atum aphan mai phaji: Madhav

imageGuwahati, Pherangke Thekar, Arkoi 17: BJP chunbang in-charge northeast Ram Madhav pherangke amai along kejai ke, Citizenship (Amendment) Bill, 2016 aphuthak pensi song pen kachelangji alam cheklang dak lo.
Ahavar tin atum aphan kelang kalana asai aphan klemji puta pangdak.
“Choklim a Bill lo pusi ajahak atum alamthe kirip. Ratpangri pen akemang klardak alam kachinine a MLA pen akaprek song jabang atum aphan BJP pen mai ingni linji. Bill alam NEDA klembang atum pensi netum klardak alam paho po,” puta alangli ningje.
Citizenship Act, 1955 kapachunji aphan 2016 ahutsi Lok Sabha along Citizenship Bill ponlo. Jongsi laso Citizenship Act, 1955 a Bill pachun pulote Afghanistan, Bangladesh lapen Pakistan asor aronre pen kevang a Hindus, Sikhs, Buddhists, Jains, Parsis lapen Christians atum ladak aso pu hok po.
Alangli kaningje thuke, “hamphang kachethak do, anparta ULFA, ratchari ale kacho-enji aphan kithirbom amonsam kedobom ahut kapasung aphan kar-i atumta do.”
Assam Accord kachetok Clause 6 keklem kapachunji aphan BJP ratpangri pen ninghang puta Madhav ningje. “Bill aphuthak klardak alam chininesi sankur arat aphan kapamanghuji aphan klemsi paphere asai si keklem,” puta alangli ningje.
Bang pli klembang atum aphan alangli kachoningri alam kaningje ke, Assam Accord kachetok Clause 6 kapachunji aphan Ministry of Home Affairs pen akangtui angdeng ajakong kangtang mei keseng along kache-oh dun atum aphan puthot chevan thusi kapachunji aphan sai keklem abang aphansi ardipi nangpo.
State BJP ahempi Guwahati along BJP jabang pherangke amai along kejai ke, Gopinath Bordoloi asongja ason-ason ajoinesi pini arni Assam arlo kejokvan keman lo.
“Setame, ongdung atum kopai kelangno puji lapen kethak abidisi keklem puji bonta lahai atum konat lo kedam po, India along anvet lo,” puta Madhav ningje.
Opposition asong pen apeng kethe kerak asai keklemji aphan arlen bom puta Ram Madhav pangdak.
“Prime Minister Narendra Modi ke chopanglim bangphu kali. Det along alangli son-son jabang madu atumta chepho dunde. Alangtum (opposition asong) ke common agenda ave, principle mate ideals ave. Lasi chelangle pin pen karjap kechengsi keme,” puta pherangke amai along pangdak.

Leave a Reply

Your email address will not be published. Required fields are marked *

January 2019
M T W T F S S
« Dec   Feb »
 123456
78910111213
14151617181920
21222324252627
28293031  
Archives