ADVERTISEMENT

This area is available for advertisement. Please contact for details.

Arnivang
Get Adobe Flash player

Drama pen Domahi kekan asaikulat kecheng

imageDIPHU, Pherangke Thekar, Arkoi 16: Karbi Anglong Autonomous Council kaparlo Cultural Affairs asaikam, Karbi Cultural Society lapen Karbi Film Soceity atum chelangpet ni troksi apharman drama pen Domahi kekan a saikulat pini pen kapangcheng.
Todak apor KAAC Cultural a EM Rupsing Teron, KCS ameiphu Chandra Kro pen chenglok kaprek-kaprek man kedo atum chetong dunsi ingpu lo. Ingpu det aphi drama pen Dumahi akekan a saikulat pangcheng lo.
Ni troksi saikulat along anong kachethang klong lam arjan along kacheparjan anong kacheklong Rajiv Kro, NSD pen Pranami Bora atumsi than lo. Laso along kado kave pini kecheng arni penta bang 110 atum saikulat along seke en dun. Laso ahut Rajiv Kro si kosonsi drama along kacheparjan nangji lapen honjai along keklem nangji aphuthak than. La-an chot kali kacheparjan atum katherak kangring ave det nangji pu heihui ta than.
NSD Pranami Bora laso along cheto dun. Arnikangsam apor seke ke-en dun bang 110 atum aphan Dumahi kekan ta than bom lo pusi laso along kelang chari dun abangphu Wilson Timung than.
Karbi Anglong Autonomous Council atum pen lapuson drama pen Dumahi kekan kacharliji aphan varsai kipi kemesen asai lo, lasi alanglitum aphan choro vek nangji’pusi cheparjan bangphu Rajiv Kro ningje. Thoi kedo Karbi atum ajutang inglong kedo Karbi atum ajutang kethekji aphan kabor-i mepik lo. Lason thakthak inglong kedo Karbi atum ajutang ta thoi kedo Karbi atum thek nangji. Inglong kedo Karbi lapen thoi kedo Karbi seta isivet lo, lasi hin-hin ajutang ta thek rappet nangpo puta alangli ningje.
La-an chot kali pini kechengsi arni penta kacharli dun atum aning karongsoi aphuthak alangli ning karong chepaklang.
Lahai kacharli ke akijumnai ta ni 20 anbak nangji seta ni troksi ke asapso kechengsi asonsi dochotji puta alangli than. Lasi kevangji aningkan ke la-an sose ajir kapadingji aphan ta Rajiv Kro choningri.

Leave a Reply

Your email address will not be published. Required fields are marked *

January 2019
M T W T F S S
« Dec   Feb »
 123456
78910111213
14151617181920
21222324252627
28293031  
Archives