ADVERTISEMENT

This area is available for advertisement. Please contact for details.

Arnivang
Get Adobe Flash player

CAB 2016 ingthan lote puthot BJP along AGP pajirpo dun ta hai

GUWAHATI, Thekar Arkoi 12: BJP pajirpo pen kachekak alamrai puthot AGP atum che-en thudet ta thek athe AGP ameiphu Atul Bora pen isi angthek pitang lo. BJP pen kachekak dun ni pho plengdet aphi pini Jorhat along mai kangni ahutsi song klembang atum pen meiphu Atul Bora chethan-chimum. Kedamtang ni pho aprang BJP atum pen ningkan hini ra achitim pajirpo chekak dun det aphi AGP asong jabang atum BJP along puthot pajirpo dunji aphan angthek chipi lo. Laso alam pini pherangke athengno AGP ameiphu Atul Bora pen working president Keshop Mahanta atum ningje. Kedamtang Arkoi niphai 7 arni Citizenship Amendment Bill central cabinet along approval det aphi Delhi along AGP jabang atum BJP pen kachekakji alam ningje lo. BJP pen kachekak dun ajoine AGP klembang lapen Assam along bill kekhamkhe arat atum ning karong chipisi AGP jabang atum aphan kur vangthu pajirlo setame pini upper Assam kahumri dam ahut AGP klembang atum pen chethan-chimum det aphi pherangke athengno alanglitum kevangji arni alam aphuthak ningje lo. BJP pen puthot kapajirpo thuji aphan alanglitum eson akemang ke Citizenship Amendment Bill jongsi BJP patiripi tiri ratpangri atum ingthan pulote puthot AGP asong atum kapajirpo dunji aphan alam matha tahai pusi meiphu Atul Bora pen working president Keshop Mahanta atum ningje. Alanglitum kaningje thuke BJP atum keklem-kedam asai nelitum lang-chari bomlo lapen angton pen alam nelitum puthot chingvai thuji. Song angbong chingvai nangkok po, laso aphisi nelitum alam heihui munthi thekpo puta pherangke karju ahut ningje. Kevangji arni ratchari atemon along alanglitum jongsi chelar pulote nelitum matha thupo lapen song angbong chingvaipo puta Atul Bora ningjesi halapu working president Keshop Mahanta kaningje ke, BJP tiri ratpangri atum jongsi Citizenship Amendment Bill che-en thu pulote nelitum song angbong chingki-chethanji.
AGP jabang atum chepharlep-chepharlo aratchari keklem aphuthak song klembang atum lapen Assam arat atum kopi tong kamatha dunji lone ke apor ahutsi chini dun po.
Pinpurme, pajirpo along chekak dunde aprang Atul Bora pen Keshop Mahanta bang hini ta minister khidun lang lapen Phani Bhuchan Choudhori ta minister khi bom lang, bonta chekak dun det aphi bang kethom ta minister pen che-oh dun bup lo.

Leave a Reply

Your email address will not be published. Required fields are marked *

January 2019
M T W T F S S
« Dec   Feb »
 123456
78910111213
14151617181920
21222324252627
28293031  
Archives