ADVERTISEMENT

This area is available for advertisement. Please contact for details.

Arnivang
Get Adobe Flash player

BJP atum Bodo akhei aphan ST(H) pi-un seta constitution kedo article 244(A) pachun ingtungte: ASDC

Diphu, Thekar Arkoi 12: Kedamtang town committee kilik along ASDC pen kachetoi dun abangphu-phi atum aphan vote kipi arat aphan Autonomous State Demand Committee (ASDC) atum kachoro pajir pusi ASDC pachethang aro klembangphu Kamalsing Bey birta pachetak.
Kachari bom BJP atum tangka maha lapen kaprek-kaprek abidi klemsi rat aphan bai lo, seta ongdung arat atum lahai kebai alam kroikre, ASDC pen kachetoi dun bang hini bangphu atum aphan pahai lo. Laso ateng bang hini town committee kilik along kehai dun abangphu atum aphan ASDC asong pen kurvangthu pajir lo. TC kilik along athin theklong pherere pin pen kachedan dun atum aphanta ASDC kachoro pajir.
Pining aningkan town committee kilik ke democracy lapen tangka ajakong pen keklem BJP, Congress atum pensi kachedan. Congress lapen BJP ke isi a poisa apum anung angno pu chot lo. Lasi Article 244(A) along kedo hemprek apharman kachesong la-an sose pangtang po.
Diphu Town Committee kaparlo ward No. 10 along kechokche keklang ajoine puthot vote pajok thu nangji pusi hang lo, seta laso akehang Diphu Town Committee kilik a returning officer khinde det lo.
ASDC atum pen ghonta 24 kangkir kepha along Karbi Anglong pen West Karbi Anglong arat atum cheto dun pen ingsamjin kapachun apotta Autonomous State Demand Committee atum pen Karbi Anglong district hini arat atum aphan kachoro pajir lo. India home minister pen kapaprangpik akhei Bodo atum aphan Karbi Anglong pen Dima Hasao district along ST(H) kipiji aphan pangdak lo. Laso aphuthak khamkhesi atumi Arkoi 11 arni ghonta 24 kangkir pha lo.  Laso aphuthak ASDC lapen kachelang rappet asong atum kedamtang arni penta khamkhe lapen kevangji arni papraipre tik ke khamkhe bomji puta Kamalsing Bey pachetak.
La-an chot kali BJP ratpangri atum kapaprangpik akhei aphan ST(H) kipiji alam kroi seta constitution along ketok dak article 244(A) kapachunji aphan aning hanghe puta ASDC atum jong pusi ASDC pachethang aro klembangphu Kamalsing Bey birta pachetak.

Leave a Reply

Your email address will not be published. Required fields are marked *

January 2019
M T W T F S S
« Dec   Feb »
 123456
78910111213
14151617181920
21222324252627
28293031  
Archives