ADVERTISEMENT

This area is available for advertisement. Please contact for details.

Arnivang
Get Adobe Flash player

Ingdeng 45 KYF aphan sikdang bom lo

Ajahak ke tang un-eh detji asonsi angring do

imageDiphu, Thekar Arkoi 11: Non kevangji Thangthang achiklo niphai 15 pen kapangchengji ingdeng 45 Karbi Youth Festival aphan non penta Taralangso Karbi Peoples Hall along kisik-kedang asai klem bom lo.
Karbi Riso-Nimso Rong-Aje alon kipiji aphansi ason-ason kithirklong ahem kikim pen chenglok jo-parni sai keklem sangse pin asonsi thek long. Kaprek kaprek ahavar pen kevang KCS Zonal Committee atum aphan kapadoji ahem Zonal camp kikim non malomsi penang an kachiting asonsi thek long. Lason ahut ningduk meme alam ke zonal camp kikim kaparjap ahut ke-en sangti amokha kemesen kali pusi ajahak kacheroktok abangphu atum ningje.
La-an chot kali tongsekot pen kikim ahem kevangji arni kaheno dapprangji aphanta angring do. Laso ateng pherangke atum adim along damsi haladak sai keklem bom hem kikim a mistri atum pen chingki-chethan dam. Laso ahut mistri atum kethan atengke, jongsi kenangji ason do-an apor ateng nangpi dun pulote ihum ahem ni ingkoi angbong ta patang un pusi than, seta contractor atum pen kikim anam kipi ahokhe lapen hormu ta ahut pen ke apor ateng pale dunde det ahutta do puta than.
Kedamtang aningkan pen Karbi Anglong Autonomous Council CEM Tuliram Ronghang kapangdak ateng Nothengpi ahemta thirklongsi kim lo, seta pining aningkan arong-aje ahut ke laso a Nothengpi ahem ingpu longle detji asonsi thek long, athe ketang pame nangji aphan akijum naita chiklo jon pli-pho anbak nangji lang pusi haladak sai keklem bom atum than.
Kedamtang ingdeng 44 KYF aprang pen kaselam Rongjangphong kedongput National Highway pen Taralangso an kachetok atovar non anta ketangji angring thek longle lang. La-an chot kali saikam pen kelan kapaklang (departmental store) amokha kikim ta ajahak ahem ahum ke tanglo seta ajahak asaikam atum ke nonputa kachikim dam thek longle lang. Lasi ajahak ke kithirklong ahemsi dopo lapen ajahak ke kaike asonsi malomso aphan ahemsi pining arong-aje along thek long po.
Ingdeng 45 Karbi Youth Festival nang keleji aphan non chiklo ejon sose chot ansi dolo, laso ateng pulote ajahak ke ketang un-eh detji asonsi angring do.

Leave a Reply

Your email address will not be published. Required fields are marked *

January 2019
M T W T F S S
« Dec    
 123456
78910111213
14151617181920
21222324252627
28293031  
Archives