ADVERTISEMENT

This area is available for advertisement. Please contact for details.

Arnivang
Get Adobe Flash player

DTC kilik angthek, INC isi, Ind isi, kedolang an BJP hai et

Diphu, Thekar Arkoi 11: Karbi Anglong Autonomous Council kaparlo long sirkep town committee along kedamtang Arkoi 8 arni vote joksi atumi Arkoi 10 arni vote lakhasi angthek paklang lo. Kaprek-kaprek a town committee along ason thakthak Diphu Town Committee alongta tove derklui an vote kalakha patangsi angthek paklang lo.
Laso ahut Karbi Anglong arongsopi kelangchari Diphu Town Committee kaparlo Ward kre pli apharman vote lakhasi kilik angthek paklang lo. Atumi adap porphai 7 pen vote kalakha pangchengsi todap the-ang pringprele porphai 1:30 apor malom ansi vote kalakha patang lo.
Laso ateng DTC kilik along Bharatiya Janata Party atum inghoi 14 angbong inghoi 12 hai lo, Congress pen methang jongjung (Independent) atum inghoi isi-si chethak dun lo.
BJP pen kehai Ward No. 1 along Haradhan Ghosh, Ward No. 2 along Prativa Das Purkayastha, ward No. 3 along Diganta Gogoi, ward No. 4 along Sadhana Rongpipi, Ward No. 5 along Semson Terang, Ward No. 6 along Minu Teronpi, ward No. 7 along Mira Tissopi, Ward No. 9 along Chatra Sing Teron, ward No. 10 along Lunse Timung, Ward No. 12 along Rah Kro, ward No. 13 along Simon Phangcho lapen ward No. 14 along Dhiren Tokbi atum hai lo.
Ward No. 8 along methang jongjung (ind) pen karjap dun Rustom Tokbi lapen ward No. 11 along Sagar Chetry Indian National Congress (INC) pen hai dun lo. Laso along ASDC pen HSDC atum inghoi isi natta hai dunde det lo.
Pinpurme, tove vote kalakha ahut ward No. 1 pen ward No. 9 an kalakha ahut thangnat alamta klangklesi ingsamjin pen dam lo, bonta ward No. 10 kalakha ahut vote kejok aphai pen apar vote kelakha akele aphai keklang tan ajok hurchodutsi hangjo lo. Laso ajoine penang an apor aphan vote kalakha ta ingtong nangkok lo.
Laso ajoine kachari along kave asong ASDC pen chenglok Congress lapen kaprek asong atum ward No. 1 pen ward No. 14 an puthot kilik kapado thu nangji pusi hang lo seta kehang ateng dengde detsi vote kalakha puthot pangcheng thu lo. Laso ajoine ning kipung chepaklangsi BJP pen akaprek ratchari asong do-an atum vote kalakha adim oh tekangsi dam rup lo. Laso ajoine ward No. 11 pen 14 kalakha ahut anke BJP atumsi vote kalakha adim along dochot lo pusi birta long.

Leave a Reply

Your email address will not be published. Required fields are marked *

January 2019
M T W T F S S
« Dec    
 123456
78910111213
14151617181920
21222324252627
28293031  
Archives