ADVERTISEMENT

This area is available for advertisement. Please contact for details.

Arnivang
Get Adobe Flash player

Assam kangkir kepha atoi atum aphan Jagiroad along bang 30 kebeng

Jagiroad, Arkoi 11: Coordination Committee of the Tribal ahamphang atum ghonta 24 Assam adangpi kangkir kepha ahut pini National Highway, Jagiroad along tyre me kekai pen thengpi kaparpan pen tovar karangkha along bang 30 kapasik sak ajok police atum kenep.
State arlo khei trok atum aphan Scheduled Tribe (ST) status a Bill kedeng che-en nangji pu aphuthak khamkhesi kachesong atum tovar along gari pacheleng longle det si pharo pharo a gari chington pleng lo.
Soluk sodak atemon kapangsamji aphan police asaikhi atum adim pale si kekhamkhe abangphu atum aphan custody pon lap lo.
Lasonsi, soluk solak kedo meme adim abat police asaikhi abetung pasun damsi pangsam lo.
Pini Assam kangkir kepha ahut kangkir kepha atum Tamulpur, Nalbari along tyre me kekai pensi kachesong angthek chepaklang.
Hojai alongri National Highway 35 Dobaka along ta kangkir kepha atum tovar rangkha lo lapen kangkir kepha atum kacheto pak ajok gari kacheleng ing-ar veng lo anparta hithi kulat ta inghap et lo.
Lanka, Barabhaar along tovar karangkha pen soluk sodak atemon kapajapji meme ajok bang 20 atum aphan police atum beng chek lo.
Pinpur damme, BJP kejalin central ratpangri pen Constitution (Scheduled Tribes) Amendment Bill, 2019, kacherai kedeng ajok kaprek inglong akhei atum ning pung chepaklangsi chesong lo.
Laso along ST kedeng akhei atum aphan kaparlo ke Koch Rajbongshi, Tai Ahom, Chutia, Moran, Matak lapen Assam ahavar a tea tribes atum henlo.
Kheiso ahamphang atum akoi kevan atengke, Centre pen laso kedeng che-en nangpo lapen state along ahokpet kheiso atum aphan jakong le pi noi.
Lason thak thaksi Kokrajhar along ta ongdung kangkir kepha atum hong barsi tovar along tyre me kekai pen tovar rangkha si kachesong angthek chepaklang lo.
Ghonta 24 Assam kangkir ahut todap porphai 5 pen kecheng ahut penta Kokrajhar pen kacherap lok asanchom adim amokha ta gari, hithi kulat kanghap lap ajok prinpre le lo.
Kangkir ajok BTAD alongri kaparlo todap pen ta ingsamri lo. Kedo an kacheleng atovar pen chenglok hithi kulat, saihem amokha anta inghap et lo.
Lasonsi centre pen kedeng khei trok atum aphan ST aman kepek along prapjin pen che-en thu nangji pusi Tribal Sangha and CCTOA kehang paso.

Leave a Reply

Your email address will not be published. Required fields are marked *

January 2019
M T W T F S S
« Dec   Feb »
 123456
78910111213
14151617181920
21222324252627
28293031  
Archives