ADVERTISEMENT

This area is available for advertisement. Please contact for details.

Arnivang
Get Adobe Flash player

Bodo aphan ST kipiji pu alam Rajnath Singh kapangdak aphuthak ASDC kapinrem

Laso aphuthak kekhamkhe Arkoi 11 arni ghonta 24 kangkir kepha

Diphu, Thekar Arkoi 9: Assam inglong a district along kedo Bodo atum aphan Schedule Tribe kipi alam Arkoi 8 arni Lok Sabha along union home minister Rajnath Singh aphuthak Autonomous State Committee atum sodak kekroikre chepaklang.
BJP atum laso alam kapaklang ahut penta inglong aso atum sangse det kachesong asai deng lo. Autonomous Council atum pen chenglok inglong aso ahamphang asong do-an atum laso alam keklang ahut pensi sodak khamkhe lo.
La-an khamkhe det aphi home minister laso alam kapangdak det ke BJP atum inglong aso aphan kelangrem binong lo.
La-an chesong det aphita BJP atum kroikresi keklem det pen inglong akhei atum aphan kapatherak ke inglong aso akhei 15 atum chechak dingde pusi ASDC atum jong.
BJP atum jongsi asapso bak kamatha ajakong do lapen aning keme do pulote nonta Constitution kapachunji aphan kejong alam khangchek un lang.
BJP atum keklem-kedam aphuthak kekhamkheji lapen ning kangsam kachepaklangji aphan Autonomous State Demand Committee pen kado kave inglong aso akhei aphan choningri.
Union ratpangri atum jongsi laso apot khang dun thekthe det pen inglong aso atum aphan pasung pulote inglong ahavar along kedo BJP klembang atum aphan BJP along kedo dun bomji a ot kali si paman det lo. Autonomous District apharman member of parliament Biren Sing Ingti arpu aphuthakta ASDC atum jong athe lahai alam aphuthak MP keklem dun nangji ateng thangnat ta klemkle apot kado kave ta pinrem meme lo. BJP kachari tiri ratpangri atum pen inglong akhei atum aphan kapavirdetji pu kabor-i along arum dom dunjoi je. Laso apot BJP atum thedung adai chitu nangji pusi ASDC atum jong. Kachenek kaholo pen inglong aso atum aphan kapathi klipji aphan kabor-i aphuthak inglong aso atum pen apor ahutsi ingtangkring BJP aphan voipo pusi ASDC ameiphu Holiram Terang pangdak.
Constitution schedule tribe order amendment bill for Assam ta Rajya Sabha Supplimentary list of Business along palutchot lo. Laso a bill along ajahak Assam along kedo inglong aso akhei aphan pusi kejong do lapen laso a bill ke non ajo tame pachun lo. Lasi laso along clause 8 ta kapachun detji angring thetan.
Lasi lahai aphuthak khamkhesi non kevangji Arkoi 11 arni adap porphai 5 pen Arkoi 12 adap porphai 5 an ghonta 24 Karbi Anglong pen West Karbi Anglong anparta North Cachar Hills kangkir pha lo puta ASDC ameiphu Holiram Terang pachetak.

Leave a Reply

Your email address will not be published. Required fields are marked *

January 2019
M T W T F S S
« Dec   Feb »
 123456
78910111213
14151617181920
21222324252627
28293031  
Archives