ADVERTISEMENT

This area is available for advertisement. Please contact for details.

Arnivang
Get Adobe Flash player

Assam arat atum aphan langplotsi Citizenship Amendment Bill Parliament Lok Sabha along kedeng

Assam aphan lake thedung arni ki-ik aphurkimo asimbon lo

DIPHU, Thekar Arkoi 8: Assam along kedo khei barim mate boche barim atum aphan kapavirji aphan pura Citizenship Amendment Bill 2016 dengsi Hindu Bangladeshi aphan dim aklong kepekji aphan Tiri ratpangri atum kedeng laso a bill aphuthak chedon dunde angthek chepaklangsi Assam along All Assam Student Union, Krishak Mukti Sangram Samiti (KMSS) pen danglok song 70 sose khei hamphang asong atum lapen rat thurpaksi chesonglo. Tiri ratpangri atum lapuson Assam along kedo khei barim atum aphan cheneksi ajutang-jubat, alam eki pindeng sumpot, ning rokom heihui phurkimo along kedo ajutang kapavirji aphan kedeng laso asai langno aphuthak phurun phurun kachesong erset prungset lo lapen nonhetjong Delhi arongsopi Parliament House athengno along setame Krishak Mukti Sangram Samiti pen danglok ongdung hamphang asong jabang atum areng angse chesong lo. Setame tiri rat pangri atum lahai kachesong aphuthak langplotsi pini laso a Bill Parliament  Lok Sabha along dengdet (Pass) khang jang lo. Laso a Bill kedeng lake Assam aphan isi thedung arni ki-ik apurkimo ason dokok lo. Kedamtang penang an aningkan pen kachesong bom hamphang asong lapen rat atum aphan kachesong aleke lang palut pichok lo. Areng angse kachesong ta ale pipe detlo nonke apran kacharmut henlo kijutsi kachesong angdeng lo, Arkoi niphai 7 arni Citizenship Amendment Bill 2016 apharman keseng Joint Parliament Committee (JPC) atum Parliament Lok Sabha along laso a Bill aphuthak lamjaimek (report) pajir det aphi Assam angkangpi hur chodutlo. KMSS lapen kaprek-kaprek hamphang asong jabang atum Delhi arongsopi along reng angse kachesong lapen Nort-East Student Union atum ghonta 11 kangkir kepha anparta Assam angkangpi along amatsi kachesong hur pacho dut lo. Setame pini abangke madu alamta arjuje detsi tiri ratpangri atum aning kehang ateng pen Lok Sabha along laso a Bill deng detlo. Laso a Bill kedengji pu ahut Lok Sabha along opposition asong atum Congress, Shiv Sena lapen kaprek-kaprek ratchari asong atum kachedon dunde angthek chepaklangsi  hong nangbar etlo.
Pinpurme kedamtang ningkan 30 sose aprang Assam kachesong ahut bang 855 atum avi aphik chepabusi khei apharman apran chipilo. Laso apran kachipi apharman ke Assam Accord chetok lo. Laso a Accord ateng pen angtan asor atum aphan toi nangji lapen 1971 aphi kevang angtan asor atum aphan deng un-eh pusi AASU atum chesong thiplo. Setame angtan asor aphan kiplungji kalisi tiri along BJP aratpangri ingni det aphi penke angtan asor aphan kevanji aphansi klem ronglo. Laso ajoine AASU, KMSS pen danglok ongdung hamphang asong lapen ratchari asong pen AGP atum kachesong ot thip lo. Setame lapu-an kachesong aphita tiri ratpangri atum alanglitum aphan langplotsi aning kehang ateng pen pini laso a Bill tiri ratpangri atum deng bor-i detlo. Assam kachesong ahut bang 855 apran kedam atumke apran dam pakejoi ason mandet lo. Laso a Bill kedengdet ajoine halapu AGP atumta Arkoi niphai 7 arni mate Parliament Loksabha along Aproval det aphi penke pajirpo BJP atum pen chekak dun daklo.
Pini Parliament Loksabha along Citizenship Amendment Bill dengdet aphi central Home Minister Rajnath Singh kejaike Citizenship Amendment Bill 1955 a Act. ateng pen lake Afganisthan, Bangladesh lapen Pakistan adet along kedo Hindu, Sikh, Buddhist, Jain, Parsis lapen Christian atum aphan India a Citizenship kipiji aphansi kedamtang 2016 aningkan Loksabha along pangdaklo. Laso atengsi pini abangke cheraisi laso a Bill deng detlo pusi ningje.

Leave a Reply

Your email address will not be published. Required fields are marked *

January 2019
M T W T F S S
« Dec   Feb »
 123456
78910111213
14151617181920
21222324252627
28293031  
Archives