ADVERTISEMENT

This area is available for advertisement. Please contact for details.

Arnivang
Get Adobe Flash player

Town kilik: Ongdung a vote pen chepahaiji aphan ratchari pen chetoi bangphu apharman vote kerek amai

imageDIPHU, Thekar Arkoi 3: Diphu Town Committee kaparlo kaprek kaprek a ward along methang methang aratchari pen kachetoi dun abangphu apharman song jabang atum vote kehang amai pangni. BJP, Congress, ASDC, HSDC pen danglok kaprek kaprek ratchari asong kilik amongve Karbi Anglong ahempi Diphu rongsopi kaparlo ward no 1 pen 12 an temon kar-om pajap lo. Lasonsi anuttin aratchari pen kachetoi dun abangphu apharman alongtin a ward along vote kehangpi amai kapangni dode sangse lo. Hin-hin ratchari akeng arkong ajakong kapabopji aphan kilik kapachethang amai along jai rinti. Bonta sankur arat atum methang ning chethe abangphu aphan kevangji Arkoi 8 arni methang-methang a polling station along vote jok po. Lasonsi ning chethe abangphu aphan vote kejok angtar Arkoi 10 arnisi lakha po. Vote kejokji aphan ni pho anvet lo. Karbi Anglong kaparlo do-an a town committee along methang-methang ratchari asong jabang atum jakong chepalongsi town committee kachari longji aphan song apharman karjap dun abangphu kilik kapachethang amai along kachetong arat aphan than tekang.
Karbi Anglong kaparlo town committee angtar keklang angthek atengsi non kevangji MP kilik along asangtar chini longpo. Karbi Anglong arlo BJP atemon amongvepi along opposition asong atum ko-an cheharjak unji ma laso atengsi non Lok Sabha kilik amang kaheman chini dam po.
Diphu Town Committee ward no 8 alongta BJP pen kachetoi dun abangphu Rangmukrang Ronghang ta ongdung a vote chepalongsi chepahaiji aphan adon tin humri damsi kilik amongve jap lo. Anparta songve pen karjap dun Rustom Tokbi ta keso kacholong angbong seta vote kehang amai along-along pangni dam lo. Alangli atoi-ani atumta vote kehangpi dam dode sangse lo. BJP pen kaparjap dun abangphu atum aphan ke-ongdung a vote pen kapahai aphan pura BJP a high command anparta CEM Tuliram Ronghang kapinkhat ateng pini EM Amarsing Tisso jalinsi DTC Chairman barim Mohonsing Tisso lapen BJP jabang Gobin Terang atum chelang rappet si Ward No.8-A along BJP pen kachetoi dun abangphu Dhiren Tokbi, ward No.9 BJP apharman karjap dun Sotro Teron lapen ward no.10 along BJP pen kachedan dunji Lunse Timung atum apharman vote kehangpi amai pangni. Bangso vote kehang amai kibi dam ahut EM Amarsing Tisso ahin pen Longle Patta kave atum aphan prapjin pen kipiji aphan chechak. Lason si Town Committee Election aphi Town Committee apharman kuti 100 a tangka sorkar pen nangpale po puta mai along pachini tekang anparta rongsopi arlo tovar, meh, mesen kijun a lang pen danglok kaprek kaprek kachingthur asai keklemji aphan ta jai. Lason si SHG atum aphan suri 5 pen lak 5 akerap anparta longle Patta kedo atum aphan PMAY ahemso aphan lakh ni ra suri 10 atangka panong si varsai akerap piji puta jai.
Karbi Anglong Autonomous Council a CEM Tuliram Ronghang, HAD minister lapen BJP song jabang atum along-along vote kehangpi amai pangni dam lo. Lasonsi Congress asong pen MLA barim Bidya Sing Ingleng pen arisangho atum kaprek kaprek a ward along vote kehangpi amai pangni dam lo. Sanchom-sanchom arat pangrumsi BJP akemang alam lapen Congress, ASDC, HSDC atumta longri kapachingthurji aphan archak kehang along nang kachetoi dunji aphan choningri lo.

Leave a Reply

Your email address will not be published. Required fields are marked *

January 2019
M T W T F S S
« Dec   Feb »
 123456
78910111213
14151617181920
21222324252627
28293031  
Archives