ADVERTISEMENT

This area is available for advertisement. Please contact for details.

Arnivang
Get Adobe Flash player

EM Amarsing Tisso prapjin pen diya nang chohang nangji: KRAA

Diphu, Thekar Arkoi 2:  Kedamtang 2018 aningkan Matijong 21 arni arni Hills Times abirta alo along keklang Matijong 20 arni Karbi Anglong Sarkari Gaon Bura atum ningkan esek amaipi along Karbi Anglong Autonomous Council a EM Amorsing Tisso pen Karbi Rong Asar Amei asong mate Rong asarthe atum ke ‘hamphang aphan kaheno dak’ (Anti Social Elements) pu nang kipu lapen akoi nang kipi ke ningduk lo. EM Amarsing Tisso lapuson nang kipu apot nelitum sodak pinrem lo pusi pini District Press Club of Karbi Anglong along pherangke amai kangni ahut KRAA ameiphu Dhormo Sing Teron lapen chunbang Rupen Hanse atum jai.
Lapuson alam alangli kaningje ke, alangli Karbi ajutang jubat, nim-rokom keklem pen chenglok Karbi akhei aphurkimo alam kachinine bangphu lo lapen Karbi akhei along rong asar atum angdeng kopi ma kachinine abangphu pusi nelitum alangli phan hok damji.
Alangli jongsi Karbi aso pu asonte alangli Karbi akhei along arpu lapen kenangsot-sot amonit atum aphan man kipi nangji alam antame chiniji lapen Karbi akhei along rong asarthe atum arpu ko-an the ma alangli chiniji.
Alangli chini nangji KRAA ke kaprek asong ason kali, laso asong along klem bangphu atum antame rong asarthe saide lapen methang arong chedorep anprat klembangphu atum anta sar kachebatang atum lo.
Nelitum kachini dam ke pini arni Karbi atumta khei barim pu kachipu long lapen Sixth Schedule ajakong Bharat Sorkar atum nang kithik pinangkok ke, jutang-jubat bisar-kindar, pindeng-sumpot nim cheraikom lapen rong kachokim anta ingthim lim joine lo. Laso ajoinesi pini arni Karbi Anglong Autonomous Council ta kedo lo puta alangli tum pherangke amai along jong. Lasi lapuson EM Amarsing Tisso pen lapuson karju nodak alam aphuthak diya nang chohangvek nangji lapen nang chingduk vek nangji pusi Karbi Rong Asar atum hang.
Pinpurme, hakok penta arong asar atumsi rong rup nang chari bom lo, bisar-kinder asaita klem bom lo lapen laso joinesi Karbi ajutang nim rokom anparta jutang jubat ta reng bom lo. Jongsi haso ahut pen le rong asar atum methang-methang mekar atum aphan jalin pameme pu asonte pini akai an Karbi aso atum nangle dunji ma? Pini arni Karbi akhei ajutang- jubat, aron atang, bisar-kinder ingbo bom ason thek longsi lahai kacheraikom dunji pusi nelitum kaprek kaprek ahavar along rong kachokim arong asar tum tame chingrum nangkok lo lapen chepeng nang kok lo. Laso along EM Tisso asangho rong asarthe atum aphan ning nang kapathe dunji mate ho-or nang kipi dunji lapen bidi nang kipi dunji kalisi nang kasorsar dun rong ke nelitum ningduk lo.
Tisso asangho aphan ethe alam karju kangtungke, jongsi Rong asarthe atum aman apeng ave le hamphang aphan kaheno asong (anti social elements) pulote pini arni anta chonghoisi Karbi arong amen Rongkachokim vekvek asar irbom lang? Nangli methang ke nangli rongta kedoma kave ma lata matha meme athe nangli ason alam kaningje thekser ke. Lasi Amarsing Tisso pen KRAA mate rong asar atum aphan prapjin diya chohang nangji pusi pusi pherangke amai along KRAA ameiphu Dhormo Sing Teron pen chunbang Rupen Hanse atum pangdak.

Leave a Reply

Your email address will not be published. Required fields are marked *

January 2019
M T W T F S S
« Dec   Feb »
 123456
78910111213
14151617181920
21222324252627
28293031  
Archives