ADVERTISEMENT

This area is available for advertisement. Please contact for details.

Arnivang
Get Adobe Flash player

9 angdeng All India Police Commando Competition kecheng

imageDiphu, Thekar Arkoi 2: Karbi Anglong kedo Assam Rifles atum patirpisi pini Arkoi 2 pen Arkoi 9 an aphan Ingdeng 9 All India Police Commando Competition kapaman pini Diphu KASA pathu aklam along Meghalaya a governor Tathagata Roy pen pangpu si kapangcheng.
Raikom asaikhi angbong okpran kachepameji, keklem kedam la-an sose kachepaduk thekji, ke-ap la-an sose kethekji, inut mesen ajabang kaselamji akemang pensi bangso akapathu kachepate bi lo.
Central Arm Police force 8 pen chenglok kado kave team 22 atum laso along chepate dunji. ni troksi apharman kachepate along Small Team operation (Jungle), Small Team Operation (Urban), Battle obslacle Course firing lapen ron kachedan ahut okpran kachepamesen thekji asai heihui chepateji.
Pini laso kapathu kecheng arni Meghalaya a governor Tathagata Roy alohi sarpo aman pen chetong dunsi All India Police Commando Competition ingpu tekang lo. Kangpu amai along Para Military atum pen kisung kepho atum aphan kapajok dun ahut kosonsi helicopter pen nang kisung nangji lapen kosonsi kepon nangji heihui paklang, la-an chot kali martial Art pen methang apran kosonsi kachepajokji lapen ingtuiving angsong pen kosonsi nang kisun nangji heihui paklang lo.
La-an chot kali Manipuri atum aching thepi heihui kithip rat athengno paklangsi kangpu amai alon chipi lo.
Kangpu amai along Director General Assam Rifles Lt. Gen Sukhdeep
Sangwan pen kedeng alamthe jai. Laso ahut alohi sarpo aman pen kachetong dun Meghalaya Governor Tathagata Roy aphan kurvangthu pajir, lason thakthak kaprek kaprek manpeng pen kachetong dun alohi atum aphanta kachoro pajir lo. La-an chot kali kapathu pen ok pran kachepaheme nangji alam pen chengsi kaprek kaprek ardi kedoklong alamthe jai.
La-an chot kali det angkang monsam kapadoji aphan raikom asaiphu atum keklem kedam nangji alam pen chenglok Assam riffles atum ajok North East India angkang monsam kapado along kacherap dun aphuthak than.
Assam Rifles atum lapuson kachepate kibi thek apot Governor Tathagata Roy pen kachoro pajir tekang. Lason along kado kave atum cheto dunsi methang aok apran lapen det keraikom thekji aphan ale chepalong dun nangpo pu heihui alam jai tekangsi kapathu kachepate ingpu tekang. Non kevangji Arkoi 9 arni All India Police Commando Competition kapajut arni Assam chief Minister Sarbananda Sonowal kachetong puta raikom asaikhi atum pen pachini lo.

Leave a Reply

Your email address will not be published. Required fields are marked *

January 2019
M T W T F S S
« Dec    
 123456
78910111213
14151617181920
21222324252627
28293031  
Archives