ADVERTISEMENT

This area is available for advertisement. Please contact for details.

Arnivang
Get Adobe Flash player

Town Committee kilik aronre pen kibi aphuthak Hamphang asong 24+ atum kekhamkhe

Diphu, Thekar Matijong 31: Sixth Schedule constitution along kedo Paragraph 2(7) lapen Paragraph 20 ateng council aron kaselamji aphan Guwahati High Court pen chiklo jontrok apor pidet aphita CEM Tuliram Ronghang kejalin Karbi Anglong Autonomous Council atum kaselam kapalen. Lapuson alangli keklem ke schedule tribe aphan kekroikre asaisi keklem lo, laso aphuthak hamphang asong 24+ atum ningduk chepaklang. Lapuson CEM Tuliram Ronghang kejalin KAAC atum HC alamtoi kapatepek lapen inglong aso atum aning kachethe apot kapapleng pipe det ke amethang aphansi anong kachepajuno lapen alanglitum methang asai aphansi nong kachejo lo. HC alamtoi kekroiji alar ke KAAC atum inglong aso amonit atum amek along inkti kapatip asai klemsi inglong aso aphan thangnat keraikom pipe lapen aron ave pin pen town committee kilik pangdak lo. La-an chot kali laso kilik along inglong aso pu kapangthek aphan schedule tribe certificate anta kehanghe det ke katherak meme asaisi KAAC atum klem lo. India Constitution along kedo Sixth Schedule a constitution ateng lamrai kedengde det apot KAAC EC aphan pinrem lo lapen CEM Tuliram Ronghang kejalin KAAC atum kechengsi KAAC aron selam nangji, laso aphi KAAC kaparlo ajat a kilik tame pado nangji pusi hamphang asong 24+ atum pini District Press Club of Karbi Anglong along pherangke amai kangni ahut jai. Sixth schedule Paragraph 2 Sub Paragraph 7 clause (a), Paragraph 3 pen Paragraph 20 clause (e) ateng Mikir Hills District (Administration of Town Committee) act 1954 lapen Mikir Hills District (constitution of town committee) Rules 1958 ke non puta aron along palutle lang. India Constitution pen la hini aron ke thangnat ajakong ave. Sixth schedule a paragraph 11 ke Assam Gazette kapaklang aphan chot, lake aron kaselam aphan kali. La hini act ke Assam Autonomous District (constitution of District Council)  Rules 1951 ke non ke ke-en no dak asonsi man lo. Act 1954 Section 5 clause 3 and 4 ateng Assam Municipal Act 1923 ke-enji ajakong KAAC aphansi pidet lo seta nonputa laso aron en eh lang. Lasi aron kimi lapen kilik aron selam tangte tik an aphan kapangdak tang town committee kilik che-en nangji pusi hamphang asong 24+ atum kehang paso. Jongsi kehang ateng pachunche bom pulote inglong aso akhei angbong kejokvang chethek longle bompo. Laso kejokvan mate keraikom kachethek longle ajoinesi hamphang lapen charli hamphang asong atum kangkir pha nangkok titi lo. Lasi non aphong tame jongsi komatne hamphang asong lapen charli hamphang asong atum jongsi kangkir pha det pulote Karbi Anglong Autonomous Council a CEM Tuliram Ronghang si arpu che-en nangji athe alangli inglong aso atum aning kehang ateng mate raikom kipiji aphan klem thekthe det lo. Lasi CEM Tuliram Ronghang kaningje ver sai keklem ajutang pachan nangpo lapen kangkir ajutang pavir nangpo puke rat aphan kapamanghu asai chot, athe alangli keklem ke akaprek asai pinak. Inglong aso angbong lapuson monsam kave det ke, KAAC atum inglong aphan kekroi ke asai keklem lapen kecho panglim asai kedo pik apot puta hamphang asong 24+ atum a convenor Angtong Ingti Kathar jai. Jongsi kehang ateng town committee kilik che-en eh pulote non kevangji Arkoi 8 arni adap porphai pen arni kangsam porphai 5 an ghonta 12 Karbi Anglong lapen West Karbi Anglong kangkir phaji pusi Hamphang asong 24+ a convenor Ratan Terang pherangke amai long pangdak.
Pherangke amai along Hamphang asong 24+ ajabang Rajesh Tisso, Jona Terang lapen kaprek kaprek atum chetong dun.

Leave a Reply

Your email address will not be published. Required fields are marked *

January 2019
M T W T F S S
« Dec   Feb »
 123456
78910111213
14151617181920
21222324252627
28293031  
Archives