ADVERTISEMENT

This area is available for advertisement. Please contact for details.

Arnivang
Get Adobe Flash player

Ingdeng 26 Chinthong Havar Riso-Nimso rong aje alir alon pen kapajut

imageChinthong, Matijong 30: Langtuk Apam Morinto ahithi aklam along Kedamtang Matijong 27 arni pen kapacheng ingdeng 26 Chinthong havar Karbi Riso-Nimso rong aje atumi Matijong 29 arni alir alon pen pachekak lo.
Ni thom arong aje along Chinthong KCS havar amei kaparlo KCS unit 9 atum angbongsi jutang akekan, lun barim, kan barim pen chenglok lun kimi, kan kimi anparta jutang kapathu heihui chepate lo.
Atumi ingdeng 26  kapajut arni KCS Chinthong Havar amei ameiphu Longsing Kro  kachepahemphu amai along alohi sarpo man pen KCS tiri amei ameiphu Chandrasing Kro, MLA Dr. Mansing Rongpi, KAAC EM Prodeep Rongpi, Ulukunchi Police Out Post a IC Udit Boro anparta kaprek kaprek man kedo atum chetong dun.
Rong aje kapachunji aphan rat atum kachirung kacherek along Chinthong MAC EM Prodeep Rongpi cheto dunsi kedorde lang an padordun lo.
Atumi arnikangsam porphai 6 apor along kehai atum aphanta Karbi Anglong Autonomous Council a EM Prodip Rongpi pensi pajir lo. Laso ajoine jutang kachinghon rong aje along kachetong dun arat atum aphan aning parong lo.
Nong-eh kapajir amai pajut det aphi ajo porphai 8:30 apor pen lotun ajo paman, laso alotun ajo Alom Rongpi pen pangpusi kaprek kaprek anong kachethang klong lunsepi, lunsepo atum pen lun parju lapen kekan paklang rinti lo.
Lotun ajo along Aseng alam arjan adilung Dilip Bey, Longsing Ingti, Borsing Teron, Kaban Rongpharpi, Bajong Teron atum chetong dunsi rat aphan aning parong tekang. La-an chot lunsepo Jeten Terang, Bari Rongpharpi lapen Bijoy Lekthe anparta Semson Ingti atum penta ingdeng 26 ZKYF alotun ajo along chetong dunsi rat aphan parju dun. EM Prodeep Rongpi amethang a constituency aphan kachinghon kethekpik ajoine rong aje kapachunji aphan thedung kacherap kacheto dun apot KCS Chinthong havar amai lapen rat atum ning aklong pen kachoro pajir.
Chinthong havar Karbi Riso Nimso rong aje Matijong 27 arni kachepate atum aphan deng det pen adunthu arni mate Matijong 28 arni adap porphai 10 apor pen Rangsina sarpo achatai along chong kedam chepate lo. Laso aphi Lor choti achatai along Bathali ke-ap lapen serdihun achotai along Temoso ketok kachepate heihui pado lo.
Ingdeng 26 Chinthong Havar Karbi Riso Nimso Rong aje along Harlongbi KCS Unit, Rangsina KCS Unit, Thong Nokbe KCS Unit, Songbang KCS Unit, Karbi Langpi KCS Unit, Hetatar KCS Unit, Serdihun KCS unit, Centre Manai KCS Unit, Ovechingri KCS Unit atum angbongsi kaprek kaprek asai along chepate lo.

Leave a Reply

Your email address will not be published. Required fields are marked *

December 2018
M T W T F S S
« Nov   Jan »
 12
3456789
10111213141516
17181920212223
24252627282930
31  
Archives