ADVERTISEMENT

This area is available for advertisement. Please contact for details.

Arnivang
Get Adobe Flash player

Koila pen-pen Excavator hum 6 Klurdung along kenep

Diphu, Thekar Matijong 29: Forest West Division a DFO Joysing Bey, Central Range a Ranger DD Shyam, Northern Range Ramnagar a Ranger Harinat Ronghang atum kejalin ingnam raikom asaikhi atum adilung atum Langpher Constituency angkang Klurdung along humri damsi ahaladak aronre pen koila kiphur nep dun lo.
Laso ahut ingnam raikom atum pen koila kiphur i-bom Excavator hum trok lapen keplengset diesel a drum nerkep heihui ta nep (seize) longlo.
Joi-joi pen aronre koila kiphur pu abirta kelong atengsi todap porphai 11 apor DFO Joysing Bey kejalin ingnam raikom asaikhi atum adim along pale dam lo. Birta kelong atengsi klurdung along aronre koila kiphur ta thek dam longsi koila kiphur aphan ke-en excavator hum trok lapen diesel keplengset a drum nerkep dum dam longlo. Seta ingnam raikom atum kedam ahut madu aphanta kethek longle det ajoine monit ke inutnat aphanta nep ingnang longle.
La-an chot kali kedamtang aningkan pen kiphurtang akoila ta pini ingnam raikom asaikhi atum pen seize tekang lo.
Laso kedamtang ahut Ramnagar ahavar survey asai keklem geological asaikam atum aphanta DFO Joysing Bey chetong tekang. Koila kiphur ke Geological asaikam pen isivet lo, lasi lahai aronre koila kiphur kekhang thekji aphan klem rappet lonang pusi Joysing Bey choningri tekang. Laso ateng angdeng kangtui along kedo atum aphan charju det aphi keklem rappetji aphan Ramnagar along survey asai keklem bom atum chechak.
Laso aphuthak lamhoi kipitangta dolo, pini Klurdung along Koila pen chenglok Excavator hum trok lapen Deasel a drum nerkep seize et lo. Lasonsi kevangji arni anta lapusonsi khang po lapen Karbi Anglong arlo lapuson aronre koila paphur longle anparta pasalon longle pusi Karbi Anglong Autonomous Council a CEM Tuliram Ronghang pherangke pen kachingki ahut ningje.

Leave a Reply

Your email address will not be published. Required fields are marked *

December 2018
M T W T F S S
« Nov   Jan »
 12
3456789
10111213141516
17181920212223
24252627282930
31  
Archives