ADVERTISEMENT

This area is available for advertisement. Please contact for details.

Arnivang
Get Adobe Flash player

Daini aphuthak cheroktok asaimo kedeng

imageBAKALIA, Thekar Matijong 29: Daini pen kacheraplok aphuthak kitin thap lapen kahonthe thap pen Karbi Anglong district along adai kave ongdung abangphu bangphi atum areng keso lapen apran kedam nang atumta dolo. Laso atemon langno kapavirji aphan pura Sahajog Asom patirpisi kaprek-kaprek adim along cheroktok asai deng bomlo. Kedamtang Vosik niphai 8 arni lapuson kitinthap lapen kahonthe thap ajoine Kangthilangso along bang hini abangphu atum apran dam nang jui aphi kitinthap aphuthak khamkhesi Sahajog Asom atum rong-rup arlo damsi cheroktok asai denglo. Laso atengsi kedamtang Matijong niphai 27 arni pen nithom apharman panongsi Bakalia police station angkang Klurdung pen Disobai ahavar along chepardun ron cheroktok asaimo denglo. Nonhetjong Klurdung along daini kahonthe thap pen penanso aphan areng kapaso lapen Disobai along inut asarbura aphan apran karmut dolo. Laso ajoine Klurdung along non malom Sahajog Asom atum hadak arat atum aphan pangrumsi cheroktok asai denglo. Kitinthap lapen kahonthe thap pen kosonsi chepahelo nangjima lapen lahai aketer kamatha ason kosonsi ning arlo pen papraiji nangjima aphuthak than parelo. Lason thak thaksi pini Disobai along setame porphai kre isi apor cheroktok amai pangni damlo. Rong pli rong asar lapen rong amekar atum kacheto dun amai along Purabi Baruah jalinsi non science & Technology akai kachikirla aphuthak than pare. Halapu pherangke Sanju Bora setame kitinthap lapen kahonthe thap pen kephoji meme akisung lapen aron atang heihui aphuthak than pajirmisi lapuson alamki jongsi dokok pulote prapjin pen police aphan kapachini phereduk pulote pherangke atum aphan than pachini ta chok pusi rat aphan than pare lo. Laso amai along apran kedam nangjui asarbura asopo Bimal Teron kaningje ke neli hem akesar aphan apran armut det aphi Jail along kachethap nangbom angbong pen komane inut abangke neliphan nangkether atengke jongsi jail pen jokdetlo pulote neliphan apran nang ar mutsi langroi nangvarchorji pusi nangkether lo pusi mai along ningje. Bimal Teron aphan lapuson kether-kehap aphuthak kapajok dunji aphan rong asar lapen rong amekar atum aphan kachoningri ajoine Bimal Teron lapen ahem asor atum an aphan rai dunpo pusi rong asar atum lamthe chipi. Lason thak thaksi Sahajog Asom atum kedamtang nini angbong KLurdung lapen Bamunbari Koch arong anparta Hojai district Lalmati alongta cheroktok asaimi deng lo.Cheroktok amai along Parasmoni Kakoti, Inu Sarma, pherangke Lambudhar Bora lapen Dipankar Das atumta chetong dun.

Leave a Reply

Your email address will not be published. Required fields are marked *

December 2018
M T W T F S S
« Nov   Jan »
 12
3456789
10111213141516
17181920212223
24252627282930
31  
Archives