ADVERTISEMENT

This area is available for advertisement. Please contact for details.

Arnivang
Get Adobe Flash player

Pini alir-alon pen Christmas talonpo

DIPHU, Thekar Matijong 24: Penap Matijong 25 arni pirthe angkangpi Christian adhorom kirim arat do-an aphan arni kethe mate kangthir et arnilo. Hemphu Jishu Christo pirthe kahache Matijong achiklo nang kilut pen monit atum Christmas achiklo pu hoksi ning arong chipi rinti lapen methang-methang a monduli along setame Pre-Christmas pen Advance Christmas talon lo setame penap Matijong 25 arni abangke kethenai arnilo athe penap henlo Hemphu Jishu Christa Pirthe kahache arnilo. Laso apharman ajahak adet along monit atum nong-eh chipi seroi lapen ajahak adet along kecho-kijun ning arong kachipi pensi Christmas talon po.
India adet along ta Christian adhorom kirim atum Christmas talon dunpo. India adet along Christian kachingrum ke-ong North-East ahavar along Christmas katalon penang an alon chipi po. Laso ajoine Christmas arui monit atum kachingthang ape-ari kenam lapen hem kapamat mate abolon chipilo. Lasonsi penap girja (church) tin along aklim angphar, riso-ejang pen danglok sarpi-sarphu atum bile kaporhi arnam alun kilun pensi Jisu Kristo aphan kardom-karcho pen anong pathesi Christmas talon po.
Karbi Anglong arongsopi along kedo Hidisajir Baptist Church, Diphu Baptist Church, Presbyterian Church, Don Bosco Catholic Church, Klirdap, Rongchingdon, Rongchingri Baptist Church, City lapen kaprek-kaprek amonduli along talonji pusi birta longdun. Lason ahut Karbi Anglong angkang atok-ano along kedo Christian adhorom kirim atum alon dojot chisik chedangsi Matijong 25 arni Jisu mahang kethek arni alir-alon pen Christmas talon po pusi kaprek-kaprek ahavar penta birta nangpale.
Bangso katalon ahut dhorom jabang atum pen Jisu Kristo mahang kethek alam than pajirmijipo lapen riso-ejang atum pen Jisu Kristo aphan kero karcho pen jumesen jumesen alun parju po.

Leave a Reply

Your email address will not be published. Required fields are marked *

December 2018
M T W T F S S
« Nov   Jan »
 12
3456789
10111213141516
17181920212223
24252627282930
31  
Archives