ADVERTISEMENT

This area is available for advertisement. Please contact for details.

Arnivang
Get Adobe Flash player

Rafael arot ahem alamki aphuthak BJP EKADC atum pinpur aloh kapajir

imageDiphu, Thekar Matijong 19: Indian National Congress ameiphu mate lok Sabha MP Rahul Gandhi pen Rafael arot kenam ador aphuthak ahokhe alam ningjesi pachethang thap lo. Lapuson alangli kaningje ke rat aphan kapamanghu lapen det aphan ahok-he akrong keja pon asonsi man lo.
Laso aphuthak India along kethenai kangsai adim Supreme Court alongta phong pli anbak lamhoi pi dam lo. National security alam ke court along van nangne lapen angkur kave kahonthe tap ke van nangne puta court pen pachini.
Rahul Gandhi akoi kipi ateng Court pen thangnatta kethedung kahonthe meme athai, det aphan Air force akenangsot, lasi lapuson kemesen ron kachedan arot ahem chenam vek nangji puta Supreme pen pangdak. Laso along kahonthe dun meme alam thangnatta theklongle puta SC pachini.
Kedamtang 2001 aningkan Congress kejalin UPA ratpangri atum det kachari bom ahutsi kachedan arot ahem kenamji alam paklang lo, seta Congress atum kachari tik ahut laso alam pachethang lin asonsi bikok. Laso aphi BJP kejalin NDA atum chari pen PM Narendra Modi kado kave asai klemsi klardak pen klem lo. Congress atum kachari ahut ke kapader lok lapen non NDA atum kachari ahut MP Narendra Modi patirpi pen kachedan arot ahem nam api ahok-he alam pachethang thapsi pasiksak dun lo.
Lasi Rahul Gandhi ke det aphan katora asaisi keklem ason man det lo, la-an chot kali alangli keklem kedam ke det akejokvan aphuthak kapathenthon asonsi man lo. Lasi alangli rat apharman keklem arpu pen hekjok nangji pu heihui alam jong dunsi India a President aphan kapanong apinpur aloh Karbi Anglong  DC arideng pinpur aloh pajir dam.
Pinpurme, pinpur aloh kapajir dam ahut anerlo porphai 12:30 apor malom Karbi Anglong District BJP asaihem pen armu chejengsi Deputy Commissioner asaihem along pale lo.
BJP EKADC ameiphu Roton Teron, dun meiphu Bharat Kr. Timung, dun meiphu Bhaskar Handique, sankur chunbang Ajit Kr. Dey, chunbang Khorsing Rongpi, chunbang Dipty Gogoi atum jalinsi pinpur aloh pajir dam lo.
Laso along Dhansiri VDC chairman Dilipsing Bey, BJP klembang Khorsing Terang atum pen chenglok ongdung BJP ajabang lapen rat atum cheto dun.

Leave a Reply

Your email address will not be published. Required fields are marked *

December 2018
M T W T F S S
« Nov   Jan »
 12
3456789
10111213141516
17181920212223
24252627282930
31  
Archives