ADVERTISEMENT

This area is available for advertisement. Please contact for details.

Arnivang
Get Adobe Flash player

Ingdeng 5 KYDO mahang kethek arni katalon

Akeme asai along an ke KAAC pen kaike ta nangcherap dunji: CEM

imageDiphu, Thekar Matijong 19: Pini Diphu Joysing Doloi Auditorium Hall along Karbi Youth Development Organisation atum ingdeng 5 mahang kethek arni katalon.
Ingdeng 5 mahang kethek asaimo ateng adap porphai 10 apor malom KYDO chunbang Rahul Hanse pen jalinsi meiphu Kiron Tokbi pen song alama pachipur lo, laso aphi meiphu Kiron Tokbi pen amatsi lama aphuthak kethan lapen kachikimo tame jalin lo.
Laso aphi anarlo porphai 12 malom pen meiphu Kiron Tokbi chepahemphusi rat amaipi pangni, mai along sankur chunbang Rahul Hanse pen mai kepha alamthe kejai lapen alohi kapachini apor en.
Mai along alohi sarpo aman KAAC CEM Tuliram Ronghang, alohi aman pen EM Horen Sing Bey, EM Mongal Sing Timung, MAC Richard Tokbi, chopha alohi aman Thekar Chapbang Longsing Teron, KNCA ameiphi pen chunbang lapen, SPKLA achunbang Johny Timung, KAMS sengcheng a chunbang George Rongpi lapen kaprek kaprek man kedo atum chetong dun.
Mai along alohi sarpo man pen kachetong dun KAAC CEM Tuliram Ronghang kejai ke, Assam University Diphu Campus aphan keplenglim University kapinchongji aphan neli pen chenglok thekar editor Longsing Teron atum jokje Delhi damsi haladak Human Resource a union minister atum pen chingki chingvai damji pusi chethan.
Mai along Karbi akhei atum kachingri do nangji, jongsi kachingri dolote kachingthur ta dopo puta CEM Tuliram Ronghang jai. La-an chot kali kachingri dolote kachingthur asaideng pen chenglok kaprek kaprek asai do-anta chunvekji puta alangli.
Ahoi alamki, BLT alamdon Clause 8 lapen Article 244(A) heihui ke kado kave aphan kero et alam pinak lasi lahai aphuthak kachesong along dhorom lapen ratchari alam van nangne kado kave chelangpetsi klem nangji, jongsi chelangpet pen klem lote chun vekji puta CEM jai.
Seta kangkir ajutang rimbom pen kaike kangkir phan bom pulote ajat asaita klem pachun thekthe detji, lasi kangkir ajutang pavirsi sai keklem ajutang pachan nangpo. Sai keklem ajutang pachethang klem lote arnisi Assam angbong chot kali India angbong kemenai a district Karbi Anglong man vekji puta CEM jai.
Bodo lapen kaprek kaprek inglong aso kali det atum aphan ST(H) pinang pu alamrai ke Dr. Joyanta Rongpi CEM kikhi ahut kacherai, neli CEM kikhi ahut 2016 aningkan ke pilongle mate pipe pusi kacherai puta mai along CEM Tuliram Ronghang jai.
Kedamtang laso alam kacherai ahut Sarat Brahma nang chekroi dunde det ajok EM arpu pen pasungtuk lo. Lasi non kedo Tarendra Brahma ta jongsi nang chekroi dunde pulote alangli phanta pasungji, seta non amat alangli netum alongsi kado kave alamta nang chekroi dun bom lang puta CEM Tuliram Ronghang mai along jai tekang.
Mai along Thekar Chapbang Longsing Teron pen ratpangri aphan choton prongpresi methang akeng pen kacharjapji aphan bor-i nangji pusi jai tekang.
Laso ahut alangli kejai ke council along mate ratpangri a chokomar kelong ke bor kelong ateng lo, lasi inuttin ke long et un-eh, lasi sai tikisi methang along keklang ahormu pen beha keklem anatthu kekam chejor dun nangpo puta thekar chapbang Longsing Teron jai tekang.
Beha kosonsi keklem dunji aphuthak alangli along penang an bidisore pi pajir tekangsi lamthe kejai pajut lo.
Lasi aphi mai along kachetong dun Johny Timung pen chenglok kaprek kaprek alohi atum pen song kapatang nangji alam pen chenglok Karbi alam kivir bom ahut kapareng thuji aphan keklem kedam nangji anparta ove kimi atum methang alam kaningje kapanglum nangji alamthe heihui mai along jai tekang.
Mai kapajut along meiphu Kiron Tokbi pen maiphu alamthe jai lapen KYDO dun meiphu Mongol Ingti pen kachoro alamthe jaisi mai ingsamjin pen pachekak lo.
Mai along KYDO ahin pen KAAC CEM Tuliram Ronghang arideng pinpur aloh pajir dun, laso ateng ajahak ke kacherap dunji aphan CEM chechak tekang lapen ajahak keklem rappetji aphan CEM pen pachini tekang.

Leave a Reply

Your email address will not be published. Required fields are marked *

December 2018
M T W T F S S
« Nov   Jan »
 12
3456789
10111213141516
17181920212223
24252627282930
31  
Archives