ADVERTISEMENT

This area is available for advertisement. Please contact for details.

Arnivang
Get Adobe Flash player

Chikli kahijuk ahut kosonsi kachepajok nangji aphuthak penap paklang: DDMA

imageDiphu, Thekar Matijong 19: National Disaster Management Authority (NDMA) lapen Assam State Disaster Management (ASDM) kacherap dun pen District Disaster Management Authority (DDMA) atum patirpisi penap Matijong 20, 2018 arni adap porphai 10 AM apor pen Assam angkang kedo an Diatrict Headquarter along Chikli kahijuk ahut kisung kepho pen kachepajok thekji aphuthak cheroktok asaimo (mock exercise) kedengji chesik chedang lo. Laso atengsi Karbi Anglong arongsopi Diphu alongta District Disaster Management Authority Karbi Anglong atum patirpisi chikli kahijuk ahut kachepajok thekji aphuthak longpli adim along paklang po. Bangso ahut chikli kevang ahut kosonsi kachepajok thekji ma aphuthak lamkan ason paklangji. Bangso asaimo Diphu Rongsopi kedo Vishal Megamart,  District Agriculture Office, UBI/MICE lapen Dey Engineering alongsi chikli kevang ahut keklem kedam nangji aphuthak paklang po. Lahai asai kapaklang along Health & Family Welfare Department, 108 Ambulane, Fire Brigade, Indian Army,  Civil Defence, Police pen chenglok Home Guard atum penta cheto dunsi chikli kahijuk akisung kepho atum aphan kapajok dunji aphan methang methang asai cheklem po pusi Karbi Anglonh Deputy Commissioner Mukul Kr. Saikia,  ACS pen pini arnikangsam methang Conference Hall along kangni pherangke amei along pangdak.
Chikli kevang ahut kosonsi rat atum kepho ma lapen kapajok dun thekji aphan lamkan kapaklang along rat atum kamanghu dunde detji aphan choningri lo. Athe chikli kevang alamkan kapaklang along DC asaihen along kedo District Emergency Operation Centre (DEOC) ahin pen chikli kevang pu Siren hangsi ason son chikli kevang ahut kachepajok thekji aasaimo dengji. Bangso cheroktok asaimo School alongta kapadoji aphan DDMA atum pen chesik lo, bonta non malom satlang kedokok ajoinesi pado ponpe detlo puta DC Mukul Kr. Kalita than pachini.
Pherangke amei along DDMA Karbi Anglong Project Officer Smita Chetia ahin penta chetong dunsi penap kedengji asaimo aphuthak klardak than pachini lo.

Leave a Reply

Your email address will not be published. Required fields are marked *

December 2018
M T W T F S S
« Nov   Jan »
 12
3456789
10111213141516
17181920212223
24252627282930
31  
Archives