ADVERTISEMENT

This area is available for advertisement. Please contact for details.

Arnivang
Get Adobe Flash player

BJP pen danglok kaprek-kaprek ratchari ongdung jabang atum Congress kidunji aphan MP Election aphansi kachonghong

Bhaiti Ingti, DIPHU:
Nonhetjong India angkangpi long pho a state along MLA kilik angthek pangdak det aphi long thom a state Madhya Pradesh, Chhattisgarh lapen Rajasthan alongke Congress si hailo lapen ratpangrita ingni phitlo. Halapu Mizoram pen Telengana alongke regional asong kangtang munak ajok BJP-Congress ta hai dun un-eh detlo. Long pho a state MLA kilik aphanke non kevangji 2019 aningkan MP kilik a semi final lo pusi ongdung ratchari jabang atum hotlo. Long thom a state along Congress hai pusetame Assam along Panchayat kilik abangke BJP atumsi hailo lapen aduthu ke Congress asong atumsi dunlo. Assam along BJP ingtangkring aphita Congress atum mesen angthek kelong aphuthak Chief Minister barim Tarun Gogoi pen danglok ongdung Congress jabang atum ning cheparong. Non ateng pulote kevangji MP kilik ahut Congress atum aphan mesen angthek longpo puta ongdung Congress jabang atum joi-joi pen ning chethe bomlo. 2019 MP kilik henlo angdung kiti athe laso kilik pensi India adet komat atumsi chari longjima asatlang angthek chelangpo. Longpho a state along nonhetjong MLA kilik angthek kapangdak pen Assam lapen Karbi Anglong alongta atemon nangjap lo. Lasi non ephong MP kilik ahut abangke Congress pen BJP angbongsi chedai koipo. Nonhetjong Assam along Panchayat kilik abangta jongsi long pho a state along MLA kilik angthek pangdak det aphisi Assam along panchayat kilik pado nangji apotlo, lalo pulote atemonta nangchelar etji apotlo pusi Assam along ongdung Congress jabang lapen klembang atum ningjesi ajat setame non kevangji MP kilik ahutke jakong chepherang long pamekapo pusi ningje. Longp ho a state along MLA kilik angthek kapangdak pen amatsi BJP asongta kathirik tet ason dokok lo. Laso ajoine detpi arlo Congress atemon puthot kejap thuji angring dokok lo. Assam lapen ladak Karbi Anglong alongta kachepharlepji angring thetan lo. Non chiklo jonthom-pli aphi lote MP kilik ta dopo. Laso MP kilik aphansi kaprek-kaprek ratchari jabang atumta inghong pronglo. Jongsi MP kilik ahut Congress haithor pulote BJP pen danglok kaprek-kaprek asong ongdung jabang atum Congress kidunji aphansi akeng chejar e-ah lo. Lason thak thaksi non Karbi Anglong alongta ongdung BJP jabang atum Congress kidunji aphansi arlo-arlo pen chisik bomlo pusi isi angkrak pen birta longdun. Kachini dun atengke non alanglitum MP kilik aphansi kanghonga nchot lo. Jongsi MP kilik ahut Congress hai pulote Congress dunvekpo pu atumta do lapen laso along kacherap dun abangphu bangphi atumta aphi kidun toiji aphansi chisik bomlo pusi chini dun. Laso ateng pulote MP kilik aphi KAAC ta BJP aratchari chepharlep phit ta thek. Tiri penle kachepharlep lo pulote ladak KAAC ke malomsota chok puta ongdung ratchari asong along kacherap dun atum ningje.

Leave a Reply

Your email address will not be published. Required fields are marked *

December 2018
M T W T F S S
« Nov   Jan »
 12
3456789
10111213141516
17181920212223
24252627282930
31  
Archives