ADVERTISEMENT

This area is available for advertisement. Please contact for details.

Arnivang
Get Adobe Flash player

Kachesong chunche tik ke kangkir ajutang virve

DS Bey, Diphu:
Kangkir kepha hen lo democratic adet along kekhamkhe, kachesong angthek kachepaklang kejoinai asai lo. Komatne ratchari asong, hamphang asong atum kopine kehang ason kachepaplengji aphan dharna kangni, pinpur aloh kapajir lapen kaprek kaprek asai klemsi kachesong angthek chepaklang.
Kangkir kepha asong atum pherangke amai kangni lapen birta pachetak aloh pen kangkir kepha lapen kopi ajoinesi kepha pachethang kangkir kepha arni lapen ahavar ta hot bom lo.
Laso kapachethang ateng kehot arni angbong kado kave kulat lapen hithi heihui anta ingkir dunpo.
Kangkir ajoine pen ratpangri aphan thedung akanahok lapen rat aphan kaike ta katora kethedung ajoine India along kethenai kangsai ahem Supreme Court pen kedamtang 2000 aningkan aprang pensi kangkir pha longle mate kangkir kepha aronre (illegal) pu hok det lo. Laso aphi anta kangkir kepha atum ratpangri pen kachesong atum pinap ajoine kangkir kepha ingtontesi pha lo.
Kedamtang 1986 aningkan ASDC atum hemprek kehang kachesong ahut aphong aphong Karbi Anglong kepha lapen kaprek kaprek asai pen kachesong kapardunron ajoine Karbi Anglong arlo kangkir ajutang araki kilut pame asonsi man det lo.
Alongri pen amatsi kangkir kachechak araki kilutchok lapen kangkir kachechak abe kedo pu anuttinta chinisi non ke ongdung atum avarsai che-en lo.
Laso ajutang araki kijumpik ajoine non apor anke ingkir chiklo jonni jonthom anbak madu asonta ingkir abang ave pulote ajahak abeha klembang atum ke kangkir aphan kachetung asonsi dokok, laso ajoine komat asongsi kangkir kephajima pusi kaike ta kachonghong. Lason ahut jongsi komat asong atum kangkirji pu alam kaningje lapen social media along pilok anta Karbi Anglong inghap kling titi si thek long.
Social Media, facebook, Watt apps along kipi lok anta kangkir kepha asai kechok det titi ajoine kangkir ajutang non puthot inglum thu lilo.
Pinpurme, kedamtang ASDC atum hemprek kehang kachesong kangtang chit ahut penang an kangkir pha lo. Laso pen 2000 aphi aningkan malom pen Karbi Anglong arlo kangkir kepha jum muchot asonsi theklong. Laso aphi kedamtang kedamtang 2013 aningkan United Progressive Alliance (UPA) ratpangri atum pen Karbi Anglong lapen Dima Hasao arat atum ajirdingklui pen hemprek apharman kachesong aphuthak panungkuk Andra Pradesh thak pen Telengana aphan stata kipi apot Karbi Anglong along arat thurpak aning kipung chepaklang lo. Laso rat aning kipung angthek JACAS amahang nang thek lo. JACAS amahang nang thek det aphi kachesong aprang ponsi kangkir kepha lapen choche junje kachesong heihui dolo. ASDC atum kachesong sangkok aphi puthot rat thurpak hemprek apharman kachesong kedo thu ke JACAS ahut hen lo. Laso ajoine aphong aphong kangkir pha ta lo, laso angthek ratpangri atum sai jokjesi penang an aphong dilung kethom kachingki aphan JACAS aphan nang pha lo. Seta lapu laben amat kachesong ingsamri asonsi thek lo.
Laso aphi kachesong kangsam asonsi Karbi Anglong kangkir ta jumthu hek sonsi thek long lo.
Lahai kado kave angbong klempar asong KPLT, UPLA lapen PDCK anparta kaprek kaprek atum penta ahut adak kangkir pha seta aphi ajahak aklempar asong atum monsam pen kachingkiji pu akemang ajok hong vangsi kado kave ateng nang dun nang thak dun lo.
Lahai aphi kangkir kepha kijumhek ajoine rat atum laso kangkir ajutang mate kangkir araki pen asapso kachelo asonsi thek long lo.
Kedamtang 2015-16 malom pen ajahak ahamphang asong atum kaprek kaprek kehang ason kachepaplengji aphan pusi kangkir kepha kachesong angthek chepaklang lo. Laso aphi Supreme Court pen kangkir kepha aronre pu alamthe ensi isi-hini asai deng lo. Laso ajoine Hamphang asong 24+ lapen ASDC atum pen kangkir kepha ahut komatne abangphu pen Guwahati HC along PIL alamhoi pidam lo.
Laso aphi non Karbi Anglong lapen Dima Hasao along kedo Bodo akhei atum aphan ST(H) kipiji pu alam kangdak pen ajok Karbi Anglong arlo kedo kaprek kaprek hmphang asong atum pen kachesong asai deng lo. Laso ahutta ajahak ahamphang asong atum pen kangkir pha kekhamkhe chepaklang lo.
Lapuson angthun angthun kachesong aphongtinsi Karbi Anglong arlo kangkir tame do lo. Laso ajoine birta pachetak chot lapen social media along pilok anta Karbi Anglong district hini ingkir kling titi asonsi man det lo.
Karbi Anglong Autonomous Council a CEM Tuliram Ronghang pen kangkir ajutang kapavir nangji aphuthak mai meeting along aphong aphong ningje seta lake isi ajutang mate raki kilut asonsi kemang det ajoine menmen kijut kokji lapen kave det pu ason kali asonsi man lo.
Kangkir ahut jasetmet pen arnivang kechoji aphan kachoklem nangrok atum aphan kanahok thetan. La-an chot kali kibihek abeha keklem atum aphanta kanahok thetan, la-an chot kali kacharli osomar atum aphan kanahok do. Kangkir ajoine kachingthur ahin tame kesang kok asonsi aphongtin kangkir ta dolo. Non akai ke keprap mate kachebai akai lasi kangkir ajoine sang nangkok pulote kachebai along aphi kedo dun lo.
Kangkir ajoine ongdung atum aning kasiksak do seta ajahak atum ke kangkir kepha apot sang longpo pupen aning karong ta do.
Kangkir ajoine akisung lapen kanahok do pusetame Karbi Anglong arat aphan kangkir ta akenang do, athe, Karbi Anglong arat atum asontin akehang mate methang ajakong kelong nangji ason anta kelongle asonsi ke-ong. Laso ajoine kachesong pensi methang aphan nang kibipikok ajakong anta chepalong nangji. Rat atum kangkir ajutang araki kachepalut longchot along tiri ratpangri lapen state ratpangri atum ajahak along ke adai do athe ingsamjin kelong nangji ajakong amokha chelong et pulote kachesong nangji lapen kachesong kachepaklangji aphan kangkir kepha nangji akenang amatsi ave detji.
Karbi Anglong arlo kangkir ajutang kapavirji pulote kemang asonsi an chun kali puseta ongdung ke chun nangji, jasetmep pen hemprek mate article 244(A) chun nangji, jongsi chunche pulote lapuson kachesong dobom po lapen kachesong le dolote kangkir ta dopo. 
Kachingthur pen chenglok kemang ason chunche tik ke Karbi Anglong arlo pen kangkir ajutang kapavirji aphan akisung doji, ratpangri atum pen Karbi Anglong arat akar-i kapachun serakji aphan bor-i dun nangji kali pulote laso ajutang pavir un-eh detji.

Leave a Reply

Your email address will not be published. Required fields are marked *

December 2018
M T W T F S S
« Nov   Jan »
 12
3456789
10111213141516
17181920212223
24252627282930
31  
Archives