ADVERTISEMENT

This area is available for advertisement. Please contact for details.

Arnivang
Get Adobe Flash player

Ahoi kacheraiji aphan Langkar-om, Terenglangso along EM Rupsing Teron long-e kesom dam

HAMREN, Thekar Matijong 12: Karbi Anglong, Dima Hasao lapen West Karbi Anglong angkang kedo Bodo akhei aphan ST (Hills) kipi pu aphuthak kekhamkhe lapen Article 244 (A) hemprek pachun serak nangji pu akehang ITPKA atum ghonta 48 District kethom kangkir phalo. Kangkir kepha angbong tame ahoi kacheraikomji aphan pu ajoine sangsesi sai keklemsi pini KAAC Art & Culture, Fishery a EM Rupsing Teron ahoi along long-eh kesom dam.
Laso ahut Langkar-om adap porphai 11 apor humri damsi haladak kedo arat akar-i ateng kapathu aklam (Football Field) along-eh som dam, laso aphi Terenglangso arong arat aphan kapanongpi EM Rupsing Teron pen ajok langteng kehut piji aphan long-e SOPD pen Fishery Project along-eh som dam lo. Long-eh kesom asai along Socheng VDC Chairman Romen Pator pen chenglok ongdung BJP ajabang atum chetong.
Long-eh kesom ahut horbong horthe arnam pusi sai keklem mesenji aphan ahirjume hangsi long-eh som lo. Laso asai along Longsing Tokbi pensi cherap dun lo.
MAC kilik aprang EM Rupsing Teron pen Rongtereng arong arat aphan lamchak kachipi tekang atengsi pini bangso along-eh som lo pusi long-eh kesom ajaimek ahut alangli chethan. Long-eh kesom ajok Langktengta ok chopangreng longpo lapen parai-harai arat atum kachalat atovar longpo puta alangli ajai.
Puthot arnitili porphai 1:30 apor Hamren amethang aboha pen barsi Mokoiram pen kahelo km-4 Lahalangso (Pamdikhar) aroi Meghalaya pen West Karbi Anglong ahoi along kedo Border Out Post (BOP) kikim kerangji aphanta KAAC EM Rupsing Teron adim pathir dam. Laso along West Karbi Anglong SP Mrinal Talukdar anparta cheroktok arat Augustin Hanse, Klish Amsong, Health Enjoy Teron pen kechenglok rong kachokim rong asarthe atum chetong dunsi EM Rupsing Teron aphan kurvangthu pipajir.

Leave a Reply

Your email address will not be published. Required fields are marked *

December 2018
M T W T F S S
« Nov   Jan »
 12
3456789
10111213141516
17181920212223
24252627282930
31  
Archives